ភ្នំពេញ៖ រដ្ឋមន្រ្តីក្រសួងកិច្ចការនារីថា ការបង្កើតផែនការសកម្មភាពថ្នាក់តំបន់អាស៊ាន ស្តីពីស្រ្តីសន្តិភាព និងសន្តិសុខ គឺជាជំហ៊ានដ៏ធំមួយ​ ដើម្បីសម្រេចនូវចក្ខុវិស័យរបស់អាស៊ាន ក្នុងការធ្វើឱ្យសម្រេចបាននូវសមភាពយេនឌ័រ ដើម្បីលើកកម្ពស់ និងពង្រឹងនូវតួនាទី នៃការចូលរួមរបស់ស្រ្តីចនៅក្នុងការពង្រឹងសន្តិភាព និងសន្តិសុខក្នុងតំបន់។

​លោកជំទាវកិត្តិបណ្ឌិត អ៊ឹង កន្ថាផាវី រដ្ឋមន្រ្តីក្រសួងកិច្ចការនារី លើកឡើងនៅក្នុង ពិធីសម្ពោធផែនការសកម្មភាពថ្នាក់តំបន់ ស្ដីពីស្រ្តី សន្តិភាព និងសន្តិសុខ នៅថ្ងៃទី ៥ ខែ ធ្នូ ឆ្នាំ ២០២២ នេះថា ការបង្កើតឡើងនៃផែនការសកម្មភាពថ្នាក់តំបន់អាស៊ាន ស្តីពីស្រ្តីសន្តិភាពនិងសន្តិសុខ គឺជាជំហ៊ានដ៏ធំមួយ ដើម្បីសម្រេចនូវចក្ខុវិស័យរបស់អាស៊ាន ក្នុងការធ្វើឱ្យសម្រេចបាននូវសមភាពយេនឌ័រ ក្នុងនោះ ការលើកកម្ពស់ការចូលរួម និងតួនាទីស្រ្តីនៅក្នុងគ្រប់ជ្រុងនៃសន្តិភាព និងសន្តិសុខ ដែលចាប់ចេញពីការទប់ស្កាត់នូវជម្លោះ ការកសាងសន្តិភាព ការទប់ស្កាត់អំពើជ្រុលនិយមដោយហិង្សា និងការដោះស្រាយហានិភ័យសន្តិសុខ ដែលកំពុងកើតមានដូចជាគ្រោះមហន្តរាយ និងជំងឺរាតត្បាតក្នុងតំបន់ គឺជាការចាំបាច់ ដើម្បីឈានទៅដល់គោលដៅរបស់យើង ជាសហគមន៍ដែលមានបរិយាបន្ន និងផ្តោតលើប្រជាជន។ ជុំវិញបញ្ហានេះ អាស៊ាននៅតែប្តេជ្ញាបន្តឆ្ពោះទៅមុខ ជាមួយការជំរុញនូវរបៀបវារៈស្រ្តី សន្តិភាព និងសន្តិសុខ ហើយផែនការសកម្មភាពថ្នាក់តំបន់អាស៊ាន ស្តីពីស្រ្តី សន្តិភាព និងសន្តិសុខ និងជាអ្នកនាំផ្លូវរបស់យើង។

ចំណែក លោក Yohannes A. Abraham បេសកជនសហរដ្ឋអាមេរិកប្រចាំអាស៊ាន បានលើកឡើងផងដែរថា រដ្ឋាភិបាលនៃសហរដ្ឋអាមេរិក និងបន្តនូវកិច្ចសហការជាមួយតំបន់អាស៊ាន និងដៃគូរអភិវឌ្ឍន៍ ដើម្បីលើកកម្ពស់ និងពង្រឹងនូវតួនាទីដ៏សំខាន់នៃការចូលរួមរបស់ស្រ្តីនៅក្នុងការពង្រឹងសន្តិភាព និងសន្តិសុខក្នុងតំបន់ ដែលបញ្ហានេះបានបង្ហាញនូវការសម្រេចបានដ៏មានសារៈសំខាន់ ដើម្បីធានាថា ស្រ្តីគឺជាភ្នាក់ងារដ៏សំខាន់ នៅក្នុងការផ្លាស់ប្តូរ ដើម្បីជំរុញការកសាងសន្តិភាព ការទប់ស្កាត់ជម្លោះ និងការស្តារឡើងវិញនៅក្នុងតំបន់ ហើយក៏បានកត់ត្រានូវជំហានដ៏សំខាន់ សម្រាប់ការអនុវត្តផែនការសកម្មភាពថ្នាក់ជាតិ ដើម្បីពង្រីក និងពង្រឹងការចូលរួមរបស់ស្រ្តី នៅលើតុពិភក្សាគោលនយោបាយ សម្រាប់បញ្ហាទៅលើ សន្តិភាព និងសន្តិសុខ ។

ដោយឡែកលោកស្រី Sarah Knibbs នាយិកាថ្នាក់តំបន់ នៃអង្គការ UN Women នៅអាស៊ី និងប៉ាស៊ីហ្វិក បានលើកឡើងថា ខណៈពេលដែលសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិលេខ ១៣២៥ គឺបានដំណោះស្រាយជាបន្តបន្ទាប់ ស្តីពីស្ត្រី សន្តិភាព និងសន្តិសុខ ក្នុងនោះបានសង្កត់ធ្ងន់លើតួនាទីសំខាន់ៗរបស់ស្រ្តី ដើម្បីលើកកម្ពស់ និងកសាងសន្តិភាពតំបន់អាស៊ាន មានភាពងាយរងគ្រោះ និងការគំរាមកំហែងផ្នែកសន្តិសុខប្រឆាំងនឹងស្ត្រី ដែលបញ្ហានេះ ត្រូវការអន្តរាគមន៍ជាក់លាក់តាមបរិបទ និងការបង្កើនតួនាទីរបស់ស្ត្រីក្នុងដំណើរការសន្តិភាព និងសន្តិសុខ។ បញ្ហានេះ UN Women ប្តេជ្ញា គាំទ្រអាស៊ានក្នុងការអនុវត្តផែនការសកម្មភាពថ្នាក់តំបន់ ក៏ដូចជាការលើកកម្ពស់ និងផ្លាស់ប្តូរចំណេះដឹង និងការអនុវត្តល្អនៅទូទាំងតំបន់អាស៊ាន និងលើសពីនេះទៀត៕ អត្ថបទ៖ សុន រ៉ាឌី