ភ្នំពេញ៖ មូសុងឦសាន ឬអាកាសធាតុចុះត្រជាក់នៅកម្ពុជា នឹងចាប់ផ្តើមចូល​មក​ដល់​នា​ពាក់​កណ្តាល​ខែធ្នូនេះ ស្របពេលដែលស្ថានភាពទឹកភ្លៀង ឬភ្លៀងធ្លាក់​ក៏​នឹង​ចាប់​ផ្តើម​អស់​នៅ​អំឡុង​ប៉ុន្មាន​ថ្ងៃ​ខាងមុខនេះដែរ។ នេះបើយោងតាមការបញ្ជាក់របស់ ឯកឧត្តម ចាន់ យុត្ថា រដ្ឋ​លេខាធិការ និងជាអ្នកនាំពាក្យក្រសួងធនធានទឹក និងឧតុនិយម បាន​ប្រាប់​ឲ្យ​ដឹង​កាល​ពី​ព្រលប់​ថ្ងៃ​ទី០៥ ខែធ្នូ ឆ្នាំ២០២២។

ឯកឧត្តម ចាន់ យុត្ថា បានបញ្ជាក់បន្តថា ចាប់ពីថ្ងៃនេះទៅ ធាតុអាកាសនៅកម្ពុជា មាន​ភ្លៀង​ធ្លាក់​បន្តិច​បន្តួច​ទៀតប៉ុណ្ណោះ ប៉ុន្តែចាប់ពីថ្ងៃទី៩ ឬថ្ងៃទី១០ ខែធ្នូ តទៅ នឹងលែង​មាន​ភ្លៀង​ធ្លាក់​ទៀត​ហើយ បន្ទាប់ពីនោះ មូសុងឦសាននឹងចាប់ផ្តើមចូលមកដល់ ពេល​នោះ​សីតុណ្ហភាព​នឹង​ចុះ​ត្រជាក់​ជា​បន្តបន្ទាប់។ ប៉ុន្តែទោះជាយ៉ាងណា ក្នុងករណីមានការប្រប្រួល ក្រសួងធនធានទឹក និង​ឧតុនិយម នឹងធ្វើការជូនដំណឹងជាបន្តបន្ទាប់ទៀត។

មន្ត្រីនាំពាក្យដដែលបានគូសបញ្ជាក់ថា ស្ថានភាពអាកាសធាតុចុះត្រជាក់នៅកម្ពុជាក្នុងឆ្នាំនេះ អាច​នឹង​ត្រជាក់ជាងឆ្នាំមុន និងយូរជាងឆ្នាំមុន ពិសេសតាមបណ្តាខេត្តនៅតំបន់ជួរភ្នំ។

តាមរយៈសេចក្តីជូនរបស់ខ្លួននៅថ្ងៃនេះ ក្រសួងធនធានទឹក និងឧតុនិយមប្រកាសថា ចាប់​ពី​ថ្ងៃ​ទី​០៧-១៣ ខែធ្នូ ឆ្នាំ២០២២ កម្ពុជា នឹងទទួលរងឥទ្ធិពលពីជ្រលងសម្ពាធខ្ពស់ និង​ខ្យល់​មូសុងឦសាន្ត​ក្នុងកម្រិតមធ្យម ដែលនាំឲ្យបន្តមានភ្លៀងធ្លាក់តិចតួច លើកលែងរាជធានី-ខេត្ត ភាគ​ខាង​ក្រោមដែលភ្លៀងអាចធ្លាក់ក្នុងកម្រិតមធ្យមដោយអន្លើតែប៉ុណ្ណោះ៕