ភ្នំពេញ៖ ប្រជាពលរដ្ឋ និងសិស្សនិស្សិតខ្មែរ កំពុងរស់នៅ និងសិក្សាក្នុងទ្វីបអឺរ៉ុប បានបន្ត​បង្ហាញ​ការ​ស្វាគមន៍ និងរងចាំទទួលដំណើរទស្សនកិច្ចរបស់សម្ដេចតេជោ ហ៊ុន សែន នាយករដ្ឋមន្ត្រី ​នៃ​ព្រះរាជា​ណាចក្រកម្ពុជា ដែលនឹងអញ្ជើញទៅចូលរួមកិច្ចប្រជុំអាស៊ាន-អឺរ៉ុបលើកទី៤៥ ក្នុងទីក្រុង​ព្រុចហ្សែល ប្រទេសប៊ែលហ្ស៊ិក នាពេលឆាប់ៗខាងមុខនេះ ។

តាមរយៈវីដូឃ្លីប ប្រជាពលរដ្ឋខ្មែរទាំងអស់នោះ បានលើកឡើងថា ពួកគាត់​នឹង​ទៅ​ទទួល​ស្វាគមន៍​សម្ដេចតេជោ ក្នុងដំណើរទស្សនកិច្ចនេះ ដោយសុទឹកចិត្ត ដោយគ្មានការបង្ខិតបង្ខំ គ្មាន​អ្នក​ណាជួល ហើយពួកគេចាត់ទុក ការអញ្ជើញចូលរួមប្រជុំរបស់សម្ដេចនាពេលនោះ គឺបង្ហាញ​ពី​មុខ​មាត់​របស់ប្រទេសកម្ពុជា នៅលើឆាក់អន្តរជាតិផងដែរ ។

ពលរដ្ឋបន្តថា ពួកគាត់សូមសម្ដែងការស្វាគមន៍ ចំពោះដំណើរ​ទស្សន​កិច្ច​ជា​ផ្លូវ​ការ​របស់​សម្ដេច​តេជោ​នេះ ហើយរំពឹងថា ដំណើរទស្សនកិច្ចរបស់សម្ដេច នឹងផ្ដល់ជាកិត្យានុភាពដល់កម្ពុជា និង​កិច្ច​សហប្រតិបត្តិការជាមួយបណ្ដាប្រទេសក្នុងសហគមន៍អឺរ៉ុប ដើម្បីអភិវឌ្ឍប្រទេសកម្ពុជា ឲ្យ​កាន់​តែ​រីកចម្រើនបន្ថែមទៀត ។

គួរបញ្ជាក់ថា នៅថ្ងៃទី១២ ខែធ្នូ ឆ្នាំ២០២២ខាងមុខនេះ សម្ដេចតេជោ ហ៊ុន សែន ប្រធាន​អាស៊ាន​ប្តូរ​វេនឆ្នាំ២០២២ នឹងដឹកនាំគណៈប្រតិភូកម្ពុជា ទៅកាន់តំបន់អឺរ៉ុប ដើម្បីទៅ​ចូលរួម​កិច្ច​ប្រជុំ​កំពូល​រំលឹកខួបលើកទី៤៥ នៃទំនាក់ទំនងអាស៊ាន និងសហភាពអឺរ៉ុប ហើយដំណើរ​ទស្សន​កិច្ច​នេះ នឹងមានការទទួលស្វាគមន៍យ៉ាងច្រើនកុះករ ពីប្រជាពលរដ្ឋ និងសិស្សនិស្សិតខ្មែរ ដែល​កំពុង​សិក្សា​នៅទ្វីបអឺរ៉ុបផងដែរ ៕ អត្ថបទ៖ បាន សុខរិទ្ធិ