ភ្នំពេញ៖ ក្រុមការងារជំនាញ សារមនី្ទរឧក្រិដ្ឋកម្មប្រល័យពូជសាសន៍ទួលស្លែង កំពុងតាមដាន​អភិរក្ស ​ឆ្អឹងលលាដ៍ ​និងបំណែកឆ្អឹង ​និងខ្នោះឃ្នៀងធ្វើទារុណកម្ម ​ដើម្បីធ្វើការអភិរក្សឯកសារ និង​វត្ថុតាងប្រវតិ្តសាស្រ្ត។

បើតាមលោកស្រី ខូ ចិន្តា ប្រធានផ្នែកអភិរក្ស និងជួសជុល នៃសារមនី្ទរឧក្រិដ្ឋកម្មប្រល័យពូជ​សាសន៍​ទួលស្លែង ​ប្រាប់BTV ព័ត៌មាន នាព្រឹកថ្ងៃទី៦ ​ខែធ្នូ ឆ្នាំ២០២២នេះថា បច្ចុប្បន្ន​ក្រុមការងារ​កំពុងធ្វើការអភិរក្ស ​វត្ថុតាង​ នៅក្នុងសារមនី្ទរ មានដូចជា៖ ខ្នោះជើង កេសគ្រាប់ ច្រវ៉ាក់ជាដើម មួយវិញទៀត​ក្រុមការងារក៏បានធ្វើការអភិរក្សវាយនភណ្ឌ​ ដែលមានចំនួនសរុប១៣៣៣ ហើយវាយនភណ្ឌ​ដែលជាបំណែក ​មានចំនួនជាង២១ប្រអប់ ដែលបានរក្សាទុកនៅក្នុងឃ្លាំង​មួយ​ចំនួន និងមួយចំនួនទៀត បានរៀបចំដាក់តាំងពិព័រណ៌នៅអគារ«A» និងមួយចំនួនទៀត ដាក់តាំងពិព័រណ៌នៅអគារ«B»។

ចំណែកលោក ហង្ស និស្ស័យ ប្រធានសារមនី្ទរ​ឧក្រិដ្ឋ​កម្ម​ប្រល័យពូជសាសន៍ទួលស្លែង បានឲ្យ​ដឹងដែរ​ថា មកដល់ពេលនេះសារមនី្ទរមានមន្រី្តបច្ចេកទេស ដែលទទួលការបណ្តុះបណ្តាល​ពី​គម្រោង ដែលឧបត្ថម្ភដោយ​ ទីភ្នាក់ងារសហប្រតិបតិ្តការអន្តរជាតិកូរ៉េ​ (កយកា-KOICA) និង​មានការសម្របសម្រួលដោយ​អង្គការ​យូណេស្កូ ភ្នំពេញ។ សព្វថ្ងៃយើងមានមន្រី្តអភិរក្ស ​ក្រដាស​ចំនួន០២រូប ដែលមានសមត្ថភាព ជួសជុល និងអភិរក្ស ដែលក្រដាសដែលខូចខាត និងមាន​មន្រី្តជំនាញថតចម្លងចំនួន០៣រូប ​ជាពិសេសមន្រី្តសារមនី្ទរទួលស្លែង បានជួយការងារ​សារ​មនី្ទរជាតិជាច្រើន ​លើការថតចម្លង។ ក្រៅពីនោះយើងក៏មានមន្រី្តជំនាញ០៣រូប ដែលជាអតីត​និសិ្សតមហាវិទ្យាល័យបុរាណវិទ្យា ​នៃសាកលវិទ្យាល័យភូមិន្ទវិចិត្រ និងសិល្បៈខាងជួសជុល និងអភិរក្ស លើវត្ថុតាងប្រវតិ្តសម្រាប់ធ្វើទារុណកម្មជនរងគ្រោះ។

ជាចុងក្រោយលោក ហង្ស និស្ស័យ ក៏សូមអំពាវនាវដល់ប្អូនៗនិសិ្សត មកពីសាកលវិទ្យាល័យ​ភូមិន្ទវិចិត្រ និងសិល្បៈ ក៏ដូចជាសាកលវិទ្យាល័យភូមិន្ទភ្នំពេញ ​ឬក៏សាកលវិទ្យាល័យដទៃទៀត មាន​បំណង​ហាត់ការ ឬក៏មានបំណងស្វែងយល់អំពីការងាររបស់សារមនី្ទរ ​សូមអញ្ជើញ​ទាក់ទង​មក​ក្រុមការងារសារមនី្ទរ ​ដើម្បីស្ម័គ្រចិត្តចូលរួមការងារជាមួយសារមនី្ទរ ​ដើម្បីទទួលបានចំណេះដឹង លើ​ការងារអភិរក្សឯកសារ​ និងការងារអភិរក្សវត្ថុតាងប្រវតិ្តសាស្រ្ត និងការងាររដ្ឋបាលទូទៅក្នុងសារមនី្ទរ​ឧក្រិដ្ឋកម្ម​ប្រល័យពូជសាសន៍ទួលស្លែងផងដែរ៕អត្ថបទ រដ្ឋា