ភ្នំពេញ៖ នៅយប់ថ្ងៃទី៥ ខែធ្នូនេះ ​កងទ័ពមួកខៀវកម្ពុជាចំនួន ២កងនាំមុខ បានធ្វើដំណើរចេញ​ទៅបំពេញបេសកកម្មថែរក្សាសន្តិភាពនៅប្រទេសម៉ាលី។

ក្នុងឱកាសជូន​ដំណើរ ​អគ្គនាយកមជ្ឈមណ្ឌលជាតិរក្សាសន្តិភាព​បានណែនាំ​ឲ្យកម្លាំងទំាងអស់ ត្រូវ​បង្កើនការប្រុងប្រយ័ត្នចំពោះបញ្ហាការបង្កៃគ្រាប់មីនកែច្នៃ​នៅក្នុងតំបន់បេសកកម្ម ក្រោយពី​ពេលថ្មីៗនេះ​ មានទ័ពមួកខៀវកម្ពុជា​បីរូបបានរបួសដោយសារគ្រាប់មីនបង្កៃទាំងនោះ។

នាយឧត្តមសេនីយ៍ សែម សុវណ្ណនី អគ្គនាយកមជ្ឈមណ្ឌលជាតិគ្រប់គ្រងកម្លាំងរក្សាសន្តិភាព ថ្លែងថា​ កងកម្លាំងមួកខៀវ២កងនាំមុខ ដែលចេញដំណើរប្តូរវេនបញ្ជូនទៅកាន់ប្រទេសម៉ាលី​នៅ​ពេលនេះ គឺមានកងកម្ទេចគ្រឿង ផ្ទុះ និងកងវិស្វកម្មព្រលានយន្តហោះ ។

ឯកឧត្ត មបន្តថា នៅក្នុងដំណើរបំពេញបេសកកម្មថែរក្សាសន្តិភាពអង្គការ​សហប្រជាជាតិនៅ​ប្រទេសម៉ាលី កងទ័ពមួកខៀវជួបប្រឈមហានីភ័យច្រើន ហើយឯកឧត្តម ស្នើឲ្យ​កង​កម្លាំង​បង្កើន​ប្រុងប្រយ័ត្នស្តាប់បទបញ្ជាអង្គភាព ​ក្រោយពីកម្ពុជា​ មានកម្លាំងបីរូបបានជួបគ្រោះថ្នាក់ ដោយ​បើកបរឡានជាន់មីនកែច្នៃធន់ស្រាលមួយ​ បង្ករបញ្ហារបួសស្នាមនៅក្នុងតំបន់បេសកកម្ម។

កងកម្លាំងសដែលចេញដំណើរប្តូរវេន ​បានថ្លែងថា បន្ទាប់ពីកងកម្លាំងកំពុងបំពេញ​បេសកកម្មនៅ​ប្រទេសម៉ាលី​ បានជួបហេតុការណ៍​បរឡានជាន់គ្រាប់មីនផ្ទុះបង្ករបួសស្នាម​នោះមក បាន​ធ្វើ​ឲ្យកងកម្លាំងដែលនឹងចេញដំណើរនៅពេលនេះរឹតតែមានបទពិសោធន៍​ ដោះស្រាយបញ្ហាប្រឈម និងបង្កើនការពារខ្លួនឲ្យមានសុវត្ថិភាពនៅក្នុងតំបន់បេសកកម្មរក្សាសន្តិភាព។

សូមបញ្ជាក់ថា នៅពេលបច្ចុប្បន្ន កម្ពុជា ​មានកម្លាំងមួកខៀវជាង៨០០នាក់ បាននិងកំពុងឈរជើង​បំពេញ​បេសកកម្មរក្សាសន្តិភាពអង្គការសហប្រជាជាតិនៅតាមប្រទេសចំនួន​ រួមមាន៖ ប្រទេសម៉ាលី ស៊ូដង់ខាងត្បូង លីបង់ និងអាហ្វ្រិកកណ្តាល​ ក្នុងនោះនៅប្រទេសម៉ាលី មានទ័ពមួក​ខៀវកម្ពុជា កំពុងឈរជើងមានចំនួនជិត៣០០នាក់៕ អត្ថបទ ស៊ុម សុខជា