កំពង់ឆ្នាំង៖ ឯកឧត្តម ស៊ុន សុវណ្ណារិទ្ធិ ប្រធានគណៈកម្មាធិការសាខាកាកបាទក្រហមកម្ពុជាខេត្តកំពង់ឆ្នាំង នៅល្ងាចថ្ងៃទី០៦ ខែធ្នូ ឆ្នាំ២០២២នេះ បានចុះជួបសួរសុខទុក្ខ និងណែនាំដល់ប្រជាពលរដ្ឋទាំង ៦គ្រួសារ ឲ្យយកចិត្តទុក្ខដាក់ខិតខំឡើងវិញជាមួយមុខរបររបស់ខ្លួន ដើម្បីកសាងសេដ្ឋកិច្ចគ្រួសាររបស់បងប្អូន ជាពិសេសខិតខំថែរក្សាសុខភាពរបស់ខ្លួនគ្រប់ៗគ្នា ព្រោះឧប្បទវហេតុនេះ គ្មានអ្នកណាដឹងមុននោះឡើយ។ រួមដំណើរមានលោកជំទាវ កែ ច័ន្ទមុនី អនុប្រធានកិត្តិយសសាខាកាកបាទក្រហម រួមនិងក្រុមការងារផងដែរ។
ក្នុងពេលចុះសួរទុក្ខ និងផ្តល់អំណោយមនុស្សធម៌កាកបាទក្រហមកម្ពុជាដល់បងប្អូនប្រជាពលរដ្ឋ លោកជំទាវ កែ ច័ន្ទមុនី បានថ្លែងថា ក្នុងពេលកើតហេតុនោះ លោកជំទាវ បានចុះមកដល់ទីតាំងកើតហេតុផ្ទាល់ជាមួយថ្នាក់ដឹកនាំខេត្តក្រុង និងបានជួយអន្តរាគមន៍ទាំងអស់គ្នាផងដែរ។
បន្ទាប់ពីសម្តេចកិត្តិព្រឹទ្ធិបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានដឹងពីហេតុការណ៍នេះរួចមក សម្តេចមានក្តីអាណិតអាសូរដល់ប្រជាពលរដ្ឋរបស់សម្តេចជាពន់ពេក និងបានអោយក្រុមការងារសាខាកាកបាទក្រហមកម្ពុជាខេត្តកំពង់ឆ្នាំង ដែលមានឯកឧត្តម ស៊ុន សុវណ្ណារិទ្ធិ ជាប្រធាន បានចុះយកអំណោយមនុស្សធម៌ មកផ្តល់ជូនប្រជាពលរដ្ឋទាំង ៦គ្រួសារភ្លាមៗផងដែរ។
សម្តេចកិត្តិព្រឹទ្ធិបណ្ឌិត ប៊ុន រ៉ានី ហ៊ុនសែន បានផ្តាំផ្ញើនូវការសាកសួរសុខទុក្ខបងប្អូនពីចំងាយ ថ្វីត្បិតតែសម្តេចមិនបានចុះមកជួបផ្ទាល់ ក៏ប៉ុន្តែ សុខទុករបស់ប្រជាពលរដ្ឋទាំងអស់ គឺជាសុខទុករបស់សម្តេច និងក្រុមការងារកាកបាទក្រហមទាំងអស់ផងដែរ។
គួររំលឹកថា៖ ហេតុការណ៍អគ្គិភ័យនេះបានកើតឡើងកាលពីវេលាម៉ោង១០និង៣០នាទីយប់ ថ្ងៃទី០៥ ខែធ្នូ ឆ្នាំ២០២២ នៅចំណុចចុងកោះ សង្កាត់ផ្សារឆ្នាំង ក្រុងកំពង់ឆ្នាំង ដែលបណ្តាលអោយផ្ទះប្រជាពលរដ្ឋ ៦ល្វែង ត្រូវភ្លើងឆាបឆេះស្ទើទាំងស្រុង។
ក្នុងឧប្បត្តិហេតុនេះ រថយន្តពន្លត់អគ្គិភ័យរបស់ស្នងការការដ្ឋាននគរបាលខេត្តកំពង់ឆ្នាំងជាច្រើនគ្រឿង បានចេញជួយអន្តរាគមន៍បាញ់ពន្លត់ ដែលធ្វើឱ្យស្ថានភាពបាន ធូរស្រាលមិនបង្ករឱ្យឆេះរាលដាលបន្តទៅ ផ្ទះផ្សេងទៀតឡើយ។ ការខូចខាតនៅក្នុងហេតុការណ៍នេះមានផ្ទះចំនួន១ល្វែងឆេះអស់គ្មានសល់ និង ៥ល្វែងទៀតឆេះតែមួយកំណាត់ក្រោយ រួមនិងឆេះសម្ភារៈនៅក្នុងផ្ទះអស់មួយចំនួនធំ។ ដោយឡែកក្នុងហេតុការណ៍នេះ មិនបណ្តាលអោយអ្នកណាម្នាក់រងរបួសឡើយ៕ អត្ថបទ៖ ហុង វាស្នា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
