បាត់ដំបង៖ ប្រជាពលរដ្ឋ​ក្នុងខេត្តបាត់ដំបង​ចំនួន​ជាង​ ៣ម៉ឺននាក់​បាន​ចុះ​ឈ្មោះ​បោះឆ្នោត​ថ្មី​ឆ្នាំ២០២២ គិត​ចាប់​ពីថ្ងៃទី២០ ខែតុលា ដល់ថ្ងៃទី៦ ខែធ្នូ ឆ្នាំ២០២២ ដែលជាចំនួន​មួយ​ដ៏ច្រើន​លើស​ផែនការ​គ្រោង​ទុក​ ខណៈ​ប្រជាពលរដ្ឋ​មាន​ឈ្មោះ​ក្នុង​បញ្ជី​បោះឆ្នោត​ឆ្នាំ​២០២១​មានចំ​នួន​ជាង​ ៦០ម៉ឺននាក់។

លោក សុខ ហ៊ីង ប្រធានលេខាធិការដ្ឋានរៀបចំការបោះឆ្នោតខេត្តបាត់ដំបងបានថ្លែងឱ្យដឹងថា ប្រជា​ពលរដ្ឋដែលបានអញ្ជើញមកចុះឈ្មោះបោះឆ្នោតថ្មីមានចំនួន ៣៧ ០៥៣នាក់ ប៉ុន្តែ ក្នុង ផែន​ការប៉ាន់ស្មានចំនួនប្រជាពលរដ្ឋដែលគ្រប់អាយុអាចមកចុះឈ្មោះបោះឆ្នោតថ្មីមានចំនួន ២៥ ៥៩៨ នាក់ ។

លោក សុខ ហ៊ីង បានបញ្ជាក់ថា ទោះបីជា​ចំនួន​អ្នក​ចុះ​ឈ្មោះបោះ​ឆ្នោ​ត​ថ្មី​លើស​ផែន​ការ​គ្រោង​ទុក ប៉ុន្តែនៅមានប្រជាពលរដ្ឋដែលគ្រប់អាយុមិនទាន់បានចុះឈ្មោះបោះឆ្នោតមួយចំនួនទៀត ជា​ពិសេស​ប្រជាពលរដ្ឋចំណាកស្រុក។

ប្រធានលេខាធិការដ្ឋានរៀបចំការបោះឆ្នោតខេត្តបាត់ដំបង សំណូមពរដល់ភាគីពាក់ព័ន្ធទាំងអស់ ទាំង​អាជ្ញាធរដែនដី កងកម្លាំង គណបក្សនយោបាយ និងអង្គការសង្គមស៊ីវិល សូមផ្ដល់​កិច្ច​សហការ និង​បង្ក​លក្ខណៈ​ងាយ​ស្រួលគ្រ​ប់​បែប​យ៉ាង​ដល់​បង​ប្អូន​ប្រជាពលរដ្ឋ​បាន​ទៅ​ចុះ​ឈ្មោះ​បោះឆ្នោត និងពិនិត្យបញ្ជីឈ្មោះបោះឆ្នោតឱ្យបានគ្រប់ៗគ្នា។

លោក សុខ ហ៊ីង បានអំពាវនាវដល់ប្រជាពលរដ្ឋក្នុងខេត្តបាត់ដំបងទាំងអស់ សូម​អញ្ជើញ​មក​ពិនិត្យ​បញ្ជី​ឈ្មោះ និងចុះឈ្មោះបោះឆ្នោតឆ្នាំ២០២២ឱ្យបានទាន់ពេលវេលា ដើម្បីត្រៀមខ្លួន​បោះ​ឆ្នោត​ជ្រើស​តាំងតំណាងរាស្រ្តនីតិកាលទី៧ នាថ្ងៃទី២៣ ខែកក្កដា ឆ្នាំ២០២៣ ឱ្យបានគ្រប់ៗគ្នា៕