កណ្ដាល៖ គម្រោងពង្រីកប្រព័ន្ធផ្គត់ផ្គង់ទឹកស្អាតក្រុងតាខ្មៅ នឹងដើរតួរនាទីយ៉ាងសំខាន់ ក្នុង​ចូល​រួម​ចំណែក​លើ​បញ្ហាកង្វះទឹកស្អាតនៅរាជធានីភ្នំពេញ និងនៅក្រុងតាខ្មៅ ដើម្បី​ជួយ​ដល់​ប្រជា​ពលរដ្ឋ​មាន​ទឹកស្អាតប្រើប្រាស់ ជាពិសេសការឆ្លើយតបទៅនឹងតម្រូវការ នៃការផ្គត់ផ្គង់ទឹកស្អាត ទៅ​ដល់​ព្រលានយន្តហោះបង្កើតថ្មី និងប្រជាពលរដ្ឋរស់នៅជុំវិញ។

ឯកឧត្តមកិត្តិសេដ្ឋាបណ្ឌិត ចម ប្រសិទ្ធ ទេសរដ្ឋមន្រ្តី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេក​វិទ្យា និងនវានុវត្តន៍ លើកឡើង​នៅ​ក្នុង​ការ​ចុះ​ពិនិត្យ​ការដ្ឋាន​គម្រោង​ពង្រីក​ប្រព័ន្ធ​ផ្គត់​ផ្គង់​ទឹក​ស្អាត ក្រុងតាខ្មៅ រវាងរដ្ឋាករទឹកស្វយ័តក្រុងភ្នំពេញ (PPWSA) និងក្រុមហ៊ុន KKKCT Consortium នៅថ្ងៃទី ៦ ខែ ធ្នូ ឆ្នាំ ២០២២ នេះថា រាជរដ្ឋាភិបាលជប៉ុន បាន​ដើរ​តួនាទី​យ៉ាង​សំខាន់​ក្នុង​ការអិវឌ្ឍន៍​នៅកម្ពុជា ជាពិសេសនៅក្នុងវិស័យទឹកស្អាត ដើម្បីធានានិរន្តភាព ក្នុង​ការ​ផ្តល់​សេវា​ផ្គត់ផ្គង់ទឹកស្អាតជូនប្រជាពលរដ្ឋ ប្រកបដោយគុណភាព សុវត្ថិភាព និរន្តរភាព និង​តម្លៃ​សមរម្យ។ ជាក់ស្តែងតាមរយៈ​គម្រោងដែលកំពុងសាងសង់នេះ បន្ទាប់ពីសាងសង់រួច គម្រោង​ផ្គត់​ផ្គង់​ទឹក​ស្អាតក្រុងតាខ្មៅ នឹងចូលរួមចំណែកដល់បញ្ហាកង្វះទឹកស្អាតនៅរាជធានីភ្នំពេញ និង​នៅ​ក្រុង​តាខ្មៅ ជាពិសេសគម្រោងនេះនឹងអាចឆ្លើយតប ទៅលើតម្រូវការផ្គត់ផ្គង់ទឹកស្អាត ទៅដល់​ព្រលាន​យន្ត​ហោះដែលកំពុងសាងសង់ និង​ការចែក​ចាយ​ទៅដ​ល់​ប្រជាពលរដ្ឋ​នៅ​ជុំវិញ​ព្រលាន​យន្ត​នោះផងដែរ ដើម្បីឲ្យប្រជាពលរដ្ឋទាំងនោះទទួលបានទឹកស្អាតប្រើប្រាស់។

ស្ថិតក្នុងឱកាសនោះ ឯកឧត្តមទេសរដ្ឋមន្រ្តី បានអំពាវនាវដល់អាជ្ញាធរដែនដី និង​អង្គ​ភាពពាក់ព័ន្ធ យកចិត្តទុកដាក់ការពារប្រភពទឹក ការពារសុវត្ថិភាពអាងប្រព្រឹត្តិកម្ម និង​ថែ​រក្សា​ប្រព័ន្ធ​បណ្តាញទុយោក្រោមដីជាដើម ប្រសិនបើមានបញ្ហាកើតឡើង នឹងធ្វើ​ឲ្យ​មាន​ផល​ប៉ះ​ពាល់​​ដល់​ការ​ផ្គត់ផ្គង់ទឹក រាប់ម៉ឺនគ្រួសារ ទាំងខេត្តកណ្តាល ក៏ដូចជារាជធានីភ្នំពេញ ជាពិសេស​ប៉ះ​ពាល់​ដល់​អាកាសយានដ្ឋាន ​ក្នុង​ទឹក​ដី​ខេត្ត​កណ្តាល​នេះ​។

ឯកឧត្តម MIKAMI MASAHIRO ឯកអគ្គរាជទូតជប៉ុន ប្រចាំកម្ពុជា បានសម្តែងនូវការពេញចិត្ត ចំពោះ​ការបំពេញបេសកកម្មកាទូតនៅកម្ពុជា ក្រោមកិច្ច​សហប្រតិបត្តិការ​ដ៏​ល្អ​ពី​គ្រប់​ភាគី​ពាក់ព័ន្ធ​។ ​ឯកឧត្តមឯកអគ្គរាជទូតបានឲ្យតម្លៃខ្ពស់ ចំពោះសុខសន្តិភាព និង​ការអភិវឌ្ឍន៍​រីក​ចម្រើន​នៅ​កម្ពុជា,​ ជាក់ស្តែងសមិទ្ធផលនាថ្ងៃនេះ ជាមោទនភាព និងមានសារៈសំខាន់ណាស់ សម្រាប់​ចូល​រួម​​ចំណែក​នូវគោលនយោបាយអភិវឌ្ឍវិស័យទឹកស្អាតរបស់កម្ពុជា។

សូមបញ្ជាក់ថា ការអភិវឌ្ឍន៍គម្រោងទឹកស្អាតនៅក្រុងតាខ្មៅ គឺស្ថិតនៅ​ក្រោម​ជំនួយ​ឥត​សំណង​រាជ​រដ្ឋាភិបាលជប៉ុន ប្រមាណជាង ២០លានដុល្លារអាមេរិក តាមរយៈ​ទីភ្នាក់ងារ​សហប្រតិបត្តិការ​អន្តរជាតិ នៃ​ប្រទេសជប៉ុន (JICA) ដោយគ្រោងនេះដំណើរសាងសង់រយៈពីរឆ្នាំ ចាប់ផ្តើម​ដំណើរ​ការ​សាងសង់​នៅខែមិថុនា ឆ្នាំ ២០២២ និងបញ្ចប់ការសាងសង់នៅខែ ធ្នូ ឆ្នាំ ២០២៤ មាន​សមត្ថភាព​ផលិត ៣ ម៉ឺនម៉ែត្រគូប ក្នុងមួយថ្ងៃ, ស្ថានីយបូមទឹកឆៅជាង ៣ ម៉ឺនម៉ែត្រគូប ក្នុង​មួយ​ថ្ងៃ, បំពង់​មេនាំទឹកឆៅ, អាងស្តុកទឹកស្អាត, ម៉ូទ័របូមទឹកស្អាតចែកចាយជាដើម។ ដែល​គម្រោង​នេះ​ដែរ ក៏ជាប្រភេទគម្រោង Special Purpose Company ស្ថិតក្រោមការ​ថែទាំ​លក្ខណៈ​បច្ចេក​ទេស និងគុណភាពទឹក ក្នុងរយៈពេល ១០ឆ្នាំរបស់ជប៉ុន នឹង​លក់​ជាវ​ដុំ​ជូន​រដ្ឋាករ​ទឹក​ស្វយ័ត​ក្រុង​ភ្នំពេញ ក្នុងតម្លៃតូចជាង ឬមិនឱ្យលើសពី ៥០០រៀលក្នុងមួយម៉ែត្រគូប៕ អត្ថបទ៖ សុន រ៉ាឌី