ភ្នំពេញ៖ ឯកឧត្តមទេសរដ្ឋមន្ត្រី អៀង មូលី ប្រធានអាជ្ញាធរជាតិប្រយុទ្ធ នឹងជំងឺអេដស៍ បានអញ្ជើញ ជាអធិបតីភាព បើកកិច្ចប្រជុំប្រកាសសេចក្តីសម្រេច ​ស្តីពី ​ការបង្កើតក្រុមការងារស្នូល​ជួយ​ក្រុមការ​ងារ​បច្ចេកទេស​អន្តរ​ក្រសួង​តាក់តែង​គោលនយោបាយលុបបំបាត់ជំងឺអេដស៍ នៅឆ្នាំ២០២៥ និងចីរភាពកម្មវិធី​អេដស៍ សម្រាប់ឆ្នាំ២០២៣-២០២៨, ​នាព្រឹកថ្ងៃទី៧ ខែធ្នូ ឆ្នាំ២០២២​នេះ។

ក្រុមការងារស្នូលជួយក្រុមការងារបច្ចេកទេសអន្តរក្រសួង​តាក់តែង​គោលនយោបាយលុបបំបាត់​ជំងឺ​អេដស៍នៅ​​ឆ្នាំ២០២៥ និងចីរភាពកម្មវិធីអេដស៍សម្រាប់ឆ្នាំ២០២៣-២០២៨​ ត្រូវបានបង្កើត​ឡើងតាម​រយៈ​សេចក្តី​សម្រេច​លេខ ៤៣១ អ.ជ.ប.ជ.អ ចុះថ្ងៃទី៥ ខែធ្នូ ឆ្នាំ២០២២ ដែលមាន​សមាសភាព​ពី​ក្រសួងសុខាភិបាល និងអង្គការ​ដៃគូ​។

ថ្លែងក្នុងកិច្ចប្រជុំ ឯកឧត្តមទេសរដ្ឋមន្ត្រី អៀង មូលី បានផ្តល់អនុសាសន៍ណែនាំ ជាគន្លឹះមួយ​ចំនួន​ដូចជា៖ កំណត់និយមន័យនៃពាក្យ ”បញ្ចប់អេដស៍”, កំណត់និយមន័យនៃពាក្យ ”ចីរភាពនៃកម្ម​វិធី​អេដស៍”, ក្រុម​ស្នូល​គួរ​លើក​ជា​សេចក្តីព្រាង ឬក៏ចំណុច​គោលគន្លឹះជូន​ក្រុមការងារអន្តរក្រសួង, ត្រូវឈរ​លើមូលដ្ឋានសសរស្តម្ភបី៖ ភាពជា​អ្នក​ដឹកនាំ ​និងភាពជាម្ចាស់ ​ភាពជាដៃគូ និងការវិនិយោគ។

ក្រសួង ស្ថាប័ន ដឹកនាំទំនាក់ទំនង សម្របសម្រួល និងក្រសួង ​ស្ថាប័នអនុវត្តសកម្មភាព (បង្ការ ថែទាំ ព្យាបាល គាំពារ) ​ដោយផ្តោតសំខាន់លើការងារបង្ការ និង,​​ពិនិត្យ​លើ​លទ្ធភាពផ្តល់ការពារ​សង្គម​ដល់​ក្រុមប្រជាជនទទួលបានប័ណ្ណសមធម៌ ​និងជំរុញការធ្វើ​តេស្ត​រក​​មេរោគ​អេដស៍ ​និង​ការរៀបចំគោល​នយោបាយជាតិលុបបំបាត់អេដស៍ឆ្នាំ២០២៥​ និង​ចីរភាពកម្មវិធី​អេដស៍​សម្រាប់​ឆ្នាំ២០២៣-២០២៨ ត្រូវបញ្ចប់ជាផ្លូវ​ការ​ឱ្យ​បាន​មុនការ​បោះឆ្នោតជ្រើសតាំង​តំណាងរាស្ត្រ​នីតិកាលទី៧៕ អត្ថបទ រដ្ឋា