កំពង់ឆ្នាំង៖ នៅថ្ងៃទី០៧ ខែធ្នូ ឆ្នាំ២០២២នេះ លោកឧត្តមសេនីយ៍ទោ ខូវ លី ស្នងការ នៃ​ស្នង​ការដ្ឋាននគរបាលខេត្តកំពង់ឆ្នាំង បានអំពាវនាវដល់ប្រជាពលរដ្ឋរស់នៅក្នុងខេត្តកំពង់ឆ្នាំងណា ដែល​មានអត្តសញ្ញាណប័ណ្ណសញ្ជាតិខ្មែរអស់សុពលភាព សល់រយៈពេល៩០ថ្ងៃ ត្រូវ​យក​អត្ត​សញ្ញា​ណប័ណ្ណ​នោះ​ទៅឲ្យមន្ត្រីនគរបាលធ្វើអត្តសញ្ញាណប័ណ្ណ សញ្ជាតិខ្មែរ ពិនិត្យនៅស្នងការ។ បើ​មន្ត្រីនគរបាលពិនិត្យឃើញសុពលភាពនៅសល់រយៈពេល៩០ថ្ងៃ អាច​ធ្វើ​អត្ត​សញ្ញាណ​ប័ណ្ណ​សញ្ជាតិ​ខ្មែរ​ថ្មី​ជូនបានហើយ។

លោកឧត្តមសេនីយ៍ទោ ខូវ លី បានអោយដឹងថា ចំណែកអត្តសញ្ញាណប័ណ្ណបាត់ ខូច ត្រូវ​ទៅ​ដាក់​ពាក្យ​សុំ​បញ្ជាក់ពីការបាត់ ខូច នៅប៉ុស្តិ៍នគរបាលរដ្ឋបាល ដែលខ្លួនរស់នៅ។ នៅពេល​មន្ត្រី​បញ្ជាក់​រួចរាល់ហើយ អាចយកមកធ្វើថ្មីនៅស្នងការដ្ឋាននគរបាលខេត្តបានហើយ។ ចំពោះយុវជន និង​យុវនារីណា មានអាយុ​ចាប់​ពី១៨​ឆ្នាំ​ឡើង​ត្រូវ​យក​ឯកសារ​មក​បំពេញ​បែប​បទ​ធ្វើ​អត្ត​សញ្ញាណ​ប័ណ្ណ​សញ្ជាតិខ្មែរថ្មី​នៅស្នងការនគរបាលខេត្ត និងអធិការដ្ឋាននគរបាលក្រុងស្រុក ឬស្នាក់ការធ្វើ​សំណុំ​ឯកសារ​នៅ​តាម​មូលដ្ឋាន​ដែល​មាន​មន្ត្រី​នគរបាល​អត្ត​សញ្ញាណ​កម្ម​កំពុង​ធ្វើ​ជូន​បង​ប្អូន​នៅ​តាម​មូលដ្ឋានទាំង២៣ទីតាំងក្នុងខេត្តកំពង់ឆ្នាំងក៏បាន ដើម្បីយកទៅចុះឈ្មោះបោះឆ្នោតជាតិនា ថ្ងៃទី២៣ ខែកក្កដា ឆ្នាំ២០២៣ ខាងមុខនេះ។ ចំណែក​អ្នក​មិន​ទាន់​មាន​អត្ត​សញ្ញាណ​ប័ណ្ណ​សញ្ជាតិ​ខ្មែរ សូមសាមីខ្លួន ធ្វើការទំនាក់ទំនងមកខាងឃុំសង្កាត់ទាំង៧១ក្នុងខេត្ត។ ក្នុងនោះ ត្រូវ​យក​ឯកសារមកធ្វើអត្តសញ្ញាណប័ណ្ណ សញ្ជាតិខ្មែរថ្មី រួមមានសៀវភៅគ្រួសារ អត្តសញ្ញាណ​ប័ណ្ណ​ហ្វូតូ សំបុត្រកំណើត និងសំបុត្របញ្ជាក់ អាពាហ៍ពិពាហ៍ ជាដើម។

លោកឧត្តមសេនីយ៍ទោបានបន្តថា អត្តសញ្ញាណប័ណ្ណសញ្ជាតិខ្មែរគំរូថ្មីនេះ មាន​សារ​ប្រយោជន៍​ណាស់ ចំពោះ​ប្រជាពលរដ្ឋនៅទូទាំងខេត្តកំពង់ឆ្នាំង ដើម្បីយកទៅប្រើប្រាស់ក្នុងជីវភាពប្រចាំថ្ងៃ ធ្វើ​ជា​ឯកសារផ្សេងៗពិសេសចូលរួមការបោះឆ្នោតថ្នាក់ជាតិឆ្នាំ២០២៣ខាងមុខនេះ។ លោកឧត្តមសេនីយ៍ទោ ខូវ លី បានអំពាវនាវ​ដល់​ប្រជាពលរដ្ឋ​ដែល​មាន​អត្ត​សញ្ញាណ​ប័ណ្ណ​សញ្ជាតិ​ខ្មែរ​ផុត​សុពលភាព ឬមុនផុតសុពលភាពរយៈពេល៩០ថ្ងៃ , បាត់ ឬខូចអត្ត​សញ្ញាណ​ប័ណ្ណ​សញ្ជាតិ​ខ្មែរ និងអ្នកដែលគ្រប់អាយុ១៨ឆ្នាំឡើង ត្រូវរូតរះទៅធ្វើឲ្យ​បាន​ឆាប់​មុន​ថ្ងៃ​បោះឆ្នោត​ជាតិ​នៅ​ថ្ងៃទី២៣ ខែកក្កដា ឆ្នាំ២០២៣ ខាងមុខចូលមកដល់។ ប្រជាពលរដ្ឋ​ណាមា​ន​បញ្ហា​រឿង​អត្ត​សញ្ញាណ​ប័ណ្ណសញ្ជាតិខ្មែរ សូមទំនាក់ទំនងជាមួយអាជ្ញាធរពាក់ព័ន្ធ ដែលនៅជិត​បំផុត​ដើម្បី​មក​បំពេញ​បែប​បទធ្វើអត្តសញ្ញាណប័ណ្ណសញ្ជាតិខ្មែរថ្មី ៕ អត្ថបទ៖ ហុង វាស្នា