កំពង់ឆ្នាំង ៖ ប្រធានក្រុមប្រឹក្សា​ខេត្តកំពង់ឆ្នាំង​ជំរុ​ញ​អោយ​យក​ចិត្ត​ទុក​ដាក់​លើ​តម្រូវ​ការ​របស់​ប្រជាពលរដ្ឋ​នៅ​តាមមូលដ្ឋាន ដោយមិនត្រូវទុកកិច្ចការងារទាំងនោះចោលឡើយ។ វេទិកា​ផ្សព្វ​ផ្សាយ និងពិគ្រោះយោបល់របស់ក្រុមប្រឹក្សាខេត្តកំពង់ឆ្នាំងអាណត្តិទី៣ នាថ្ងៃទី០៧ ខែធ្នូ ឆ្នាំ​២០២២​នេះ មានការអញ្ជើញចូលរួមឯកឧត្តម ឡុង ឈុនឡៃ ប្រធានក្រុមប្រឹក្សាខេត្តកំពង់ឆ្នាំង និងលោក យិន សាវ៉េន អភិបាលរងខេត្ត ដោយមាន​ការ​អញ្ជើញ​ចូលរួម​ពី​ថ្នាក់​ដឹកនាំ​មន្ទីរ​អង្គភាព​ជុំវិញ​ខេត្ត មាតាបិតាសិស្ស សិស្សានុសិស្ស អាជ្ញាធរ និងប្រជាពលរដ្ឋក្នុងក្រុងកំពង់ឆ្នាំង ជាច្រើន​នាក់​ផង​ដែរ។

វេទិកានេះ មានគោលបំណងដើម្បីផ្តល់ឱកាសជូនដល់បងប្អូនប្រជាពលរដ្ឋ អ្នកពាក់ព័ន្ធទាំងអស់ ដែល​បានមកពីក្រុងកំពង់ឆ្នាំង បានស្វែងយល់ពីស្ថានភាពទូទៅនៃការអភិវឌ្ឍខេត្ត ក្រុងសង្កាត់ និង​បញ្ហា​ប្រឈម ដែល កើតមានកន្លងមក ហើយវេទិកានេះ នឹងផ្តល់​ឱកាស​ក្នុង​ការ​បញ្ចេញ​មតិ​យោបល់​របស់​ប្រជាពលរដ្ឋពាក់ព័ន្ធនិង កង្វល់សំណូមពរ តម្រូវការ ជាក់ស្តែងក្នុង​មូល​ដ្ឋាន​របស់​ខ្លួន។

ឯកឧត្តម ឡុង ឈុនឡៃ ប្រធានក្រុមប្រឹក្សាខេត្តបានអោយបញ្ជាក់ថា​ គោល​បំណង​សំខាន់ៗ​ក្នុង​ការ​ផ្តល់​ព័ត៌មានជូនប្រជាពលរដ្ឋ អំពីសមិទ្ធផលដែលក្រុមប្រឹក្សាសម្រេចបានកន្លងមក បញ្ហា​ប្រឈម និងអំពីបញ្ហាអាទិភាពនៃការ អភិវឌ្ឍរបស់ក្រុមប្រឹក្សា សម្រាប់ឆ្នាំបន្ទាប់ និង​ផ្តល់​ឱកាស​ជូន​ប្រជាពលរដ្ឋ ក្នុងការផ្តល់យោបល់ការ ពិភាក្សាលើខ្លឹមសារ និងរបាយការណ៍ ព្រម​ទាំង​ទទួល​យក​នូវ​អនុសាសន៍ សំណូមពររបស់ប្រជាពលរដ្ឋ ដើម្បីពិនិត្យពិភាក្សាដោះស្រាយ និង​ជំរុញ​ឲ្យ​មាន​ការ​ចូលរួម និងបង្កើនភាពសិ្នទ្ធស្នាល រវាងអ្នកផ្តល់សេវាសាធារណៈឲ្យ កាន់តែ​មាន​ភាព​ល្អ​ប្រសើរ​ឡើង​។

សមាជិកក្រុមប្រឹក្សាខេត្ត បានអាននូវបទបញ្ជាផ្ទៃក្នុង និងបង្ហាញពីតួនាទីភារកិច្ច សិទ្ធិអំណាច របស់​ក្រុមប្រឹក្សា និងទិដ្ឋភាពរួមនៃការអភិវឌ្ឍន៍នៅដែនសមត្ថកិច្ចរបស់ខ្លួន។ ក្នុងសំណួរ សំណូម​ពរ និងចម្លើយដែលសមាជិកអង្គវេទិកា បាន​លើក​ឡើង​ពី​ទុក្ខ​កង្វល់​របស់​ពួក​គាត់​នៅ​តាម​មូលដ្ឋាន ដោយផ្តោតទៅលើបញ្ហាអសកម្មមួយចំនួន ដើម្បីបំពេញ​សេចក្តី​ត្រូវ​ការ​របស់​ប្រជាពលរដ្ឋ។ ឯកឧត្តមបានអរគុណដល់បងប្អូន ដែលបាន​ចំណាយ​ពេល​ចូល​រួម​ក្នុង​វេទិកា​ផ្សព្វ​ផ្សាយ និងពិគ្រោះយោបល់របស់ក្រុមប្រឹក្សាកំពង់ឆ្នាំងអាណត្តិទី៣ ដែលបាន​ធ្វើ​ឲ្យ​យើង​បាន​យល់​កាន់​តែ​ច្បាស់​រាល់​ការអភិវឌ្ឍន៍របស់រាជរដ្ឋាភិបាល ក៏ដូចអាជ្ញាធរខេត្ត​ក្រុង​ដឹង​ពី​ទុក្ខ​កង្វល់​របស់​ប្រជាពលរដ្ឋ​នៅ​តាមមូលដ្ឋាន និងតម្រូវការចាំបាច់របស់ប្រជាពលរដ្ឋផងដែរ ៕ អត្ថបទ៖ ហុង វាស្នា