អាមេរិក៖ រដ្ឋមន្ត្រីការពារជាតិសហរដ្ឋអាមេរិកលោក Lloyd Austin បានប្រកាសកាលពីថ្ងៃអង្គារ បន្ទាប់ពីកិច្ចពិភាក្សាប្រចាំឆ្នាំរវាងសម្ព័ន្ធមិត្តទាំងពីរថា សហរដ្ឋអាមេរិកនឹងបង្កើនវត្តមានកងកម្លាំងប្តូរវេនរបស់ខ្លួននៅក្នុងប្រទេសអូស្ត្រាលី រួមទាំងយន្តហោះទម្លាក់គ្រាប់បែក និងយន្តហោះចម្បាំង។
ទីក្រុងវ៉ាស៊ីនតោនមើលឃើញថា ទីក្រុងកង់បេរ៉ាជាដៃគូដ៏សំខាន់ក្នុងកិច្ចខិតខំប្រឹងប្រែងរបស់ខ្លួន ក្នុងការរុញច្រានប្រឆាំងប្រទេសចិននៅតំបន់ឥណ្ឌូ-ប៉ាស៊ីហ្វិក ហើយអ្នកវិភាគបាននិយាយថា ប្រទេសអូស្ត្រាលីអាចមានតួនាទីដឹកជញ្ជូនដ៏សំខាន់ក្នុងការការពារកោះតៃវ៉ាន់ ប្រឆាំងចំណាត់ការណាមួយរបស់ទីក្រុងប៉េកាំងដើម្បីដណ្តើមយកកោះយុទ្ធសាស្ត្រ និងស្វ័យការពារមួយនេះ។ លោក Austin ពុំបានផ្តល់ព័ត៌មានលម្អិតថា នៅពេលណានឹងបង្កើនការប្តូរវេន ឬថា តើចំនួនកងទ័ព នាវា និងយន្តហោះប៉ុន្មានគ្រឿងដែលនឹងចូលរួមនោះទេ។ លោកនិយាយថា ប្រទេសទាំងពីរបានព្រមព្រៀងអញ្ជើញប្រទេសជប៉ុន ឱ្យធ្វើសមាហរណកម្មទៅក្នុងគំនិតផ្តួចផ្តើមនៃកម្លាំងរបស់យើង នៅក្នុងប្រទេសអូស្ត្រាលី។ ដែនដីភាគខាងជើងរបស់ប្រទេសអូស្ត្រាលី គឺជាទីតាំងទទួលសម្រាប់ការសហការយោធាជាញឹកញាប់ជាមួយសហរដ្ឋអាមេរិក។
កងម៉ារីនសហរដ្ឋអាមេរិករាប់ពាន់នាក់បានប្តូរវេន នៅជុំវិញទឹកដីនេះជារៀងរាល់ឆ្នាំសម្រាប់ការហ្វឹកហ្វឺន និងសមយុទ្ធរួមគ្នាដែលបានចាប់ផ្តើមនៅក្រោមអតីតប្រធានាធិបតី Barack Obama។ យោងតាមប្រភពដឹងពីបញ្ហាបានប្រាប់សារព័ត៌មាន Reuters ថា សហរដ្ឋអាមេរិកមានផែនការដាក់ពង្រាយយន្តហោះទម្លាក់គ្រាប់បែក B-52 ដែលមានសមត្ថភាពបំពាក់នុយក្លេអ៊ែររហូតដល់ ៦គ្រឿងទៅកាន់មូលដ្ឋានទ័ពអាកាសនៅភាគខាងជើងប្រទេសអូស្ត្រាលី ក្នុងពេលមានភាពតានតឹងកាន់តែខ្លាំងជាមួយប្រទេសចិន។ កាលពីឆ្នាំមុន សហរដ្ឋអាមេរិក អង់គ្លេស និងអូស្ត្រាលីបានបង្កើតកិច្ចព្រមព្រៀងសន្តិសុខមួយដែលមានឈ្មោះថា AUKUS ដែលនឹងផ្តល់ឱ្យអូស្ត្រាលីនូវបច្ចេកវិទ្យាក្នុងការដាក់ពង្រាយនាវាមុជទឹកដើរដោយថាមពលនុយក្លេអែរ ដែលធ្វើឲ្យប្រទេសចិនព្រួយបារម្ភ៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
