បាល់ទាត់៖ ខ្សែប្រយុទ្ធស្នូលរបស់ក្លិបនគរបាលជាតិ Booysen Shane បានឲ្យដឹងថា ពេលនេះស្ថានភាពជំងឺរបស់ខ្លួនបានល្អប្រសើរច្រើនហើយ ពោលគឺមានសភាពដូចដើមវិញ។ ទន្ទឹមជាមួយគ្នា គេក៏ចាប់ផ្ដើមធ្វើការហាត់រត់ជាបណ្ដើរៗ ដើម្បីប្រមូលកម្លាំងឡើងវិញផងដែរ។
កីឡាករសញ្ជាតិអាហ្វ្រិកខាងត្បូងរូបនេះបានបន្ថែមថា មកទល់ពេលនេះជិត ២សប្ដាហ៍ហើយ ដែលខ្លួនបានចេញពីមន្ទីរពេទ្យ បន្ទាប់ពីមានបញ្ហាគាបសរសៃឈាម ហើយបច្ចុប្បន្នខ្លួនហាក់មានសុខភាពដូចដើមវិញ និងអាចហ្វឹកហាត់ដោយខ្លួនឯងបានខ្លះ ដូចជាការរត់ និងការហាត់ប្រមូលកម្លាំងជាដើម។ ប៉ុន្តែចំពោះការវិលត្រឡប់ចូលទីលាន ដើម្បីហ្វឹកហាត់ជាមួយក្រុម Booysen Shane បានបញ្ជាក់ថា រង់ចាំការជួបពិគ្រោះ និងតាមដានសុខភាពជាមួយក្រុមវេជ្ជបណ្ឌិតសិន ដែលខ្លួនគ្រោងទៅជួបពេទ្យនា ១សប្ដាហ៍ទៀត ហើយបើវេជ្ជបណ្ឌិតអនុញ្ញាតឲ្យហាត់ធម្មតា ខ្លួននឹងចូលរួមជាមួយក្រុមវិញក្រោយបញ្ចប់វិធានការបិទខ្ទប់ ឬ Lock Down របស់រាជរដ្ឋាភិបាលកម្ពុជា។ ទន្ទឹមជាមួយគ្នាលោក សារ៉េត ស៊ីដន អ្នកចាត់ការក្លិបនគរបាលជាតិបានឲ្យដឹងថា បច្ចុប្បន្នក្លិបនៅតែបន្ដធ្វើការជាមួយក្រុមវេជ្ជបណ្ឌិត ដើម្បីតាមដាន និងពិនិត្យសុខភាពរបស់ Booysen តាមការណែនាំរបស់ឯកឧត្តម ជួន ណារិន្ទ ដែលជាប្រធានក្លិប។ ដូច្នេះការវិលចូលទីលានហ្វឹកហាត់ជាមួយក្រុមរបស់ខ្សែប្រយុទ្ធវ័យ ៣២ឆ្នាំរូបនេះគឺអាស្រ័យលើស្ថានភាពជាក់ស្ដែង និងការអនុញ្ញាតរបស់វេជ្ជបណ្ឌិត។
ជាមួយគ្នាផងដែរ Booysen Shane បានថ្លែងអំណរគុណយ៉ាងជ្រាលជ្រៅចំពោះបងប្អូនអ្នកគាំទ្រ និងកីឡាកររួមអាជីពដែលបានសួរសុខទុក្ខ និងជូនពរខ្លួន ពិសេសក្លិបនគរបាលជាតិ ព្រះខ័នរាជស្វាយរៀង និងក្លិបផ្សេងៗទៀតដែលបានជួយជ្រោមជ្រែង និងផ្ដល់កម្លាំងចិត្តដល់ខ្លួនរហូតបានជាសះស្បើយពីជំងឺ ហើយគេប្ដេជ្ញានឹងខិតខំហ្វឹកហាត់ឡើងវិញ ដើម្បីវិលត្រឡប់ចូលទីលាន និងការប្រកួតប្រជែងដ៏អស្ចារ្យបន្ដទៀត។ សូមរំឭកថា Booysen ត្រូវបានបញ្ជូនទៅព្យាបាលនៅពេទ្យកាល់ម៉ែត្រ កាលពីយប់រំលងអាធ្រាត្រឈានចូលថ្ងៃទី២ ខែមេសា ដោយសារជំងឺស្ទះសរសៃឈាម តែក្រោយពេលក្រុមគ្រូពេទ្យសម្រួលចលនាឈាម បានធ្វើឲ្យសរសៃឈាមមានបញ្ហានោះរត់ធម្មតាវិញ ដែលបង្កឲ្យស្ថានភាពជំងឺរបស់គេបានប្រសើរឡើង រហូតក្រុមគ្រូពេទ្យអនុញ្ញាតឲ្យចេញកាលពីល្ងាចថ្ងៃទី៧ ខែមេសា ប៉ុន្តែក្លិបនគរបាលជាតិបានទុកពេល ១ខែដើម្បីឲ្យរូបគេសម្រាកព្យាបាលឲ្យបានជាសះស្បើយ ១០០%៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
