នៅថ្ងៃស្អែក ព្រឹត្តិការណ៍បុណ្យសមុទ្រជុំទី៣ អមដោយព្រឹត្តិការណ៍មហាសន្និបាតក្លឹបឆ្នេរសមុទ្រស្អាតជាងគេលើពិភពលោក នៅខេត្តព្រះសីហនុ នឹងចាប់ផ្តើមបើកដំណើរការ។ ប្រជាពលរដ្ឋនៅខេត្តព្រះសីហនុ បានត្រៀមខ្លួនរួចរាល់ ទទួលភ្ញៀវមកពីចម្ងាយមកចូលរួមកម្សាន្តសប្បាយបុណ្យសមុទ្រ ហើយករណីភ្ញៀវណាគ្មានបន្ទប់ស្នាក់នៅ គឺភ្ញៀវនោះអាចទៅស្នាក់នៅផ្ទះ ឬអាចបោះតង់នៅក្នុងបរិវេណដីផ្ទះរបស់ពួកគេបាន។
ពលរដ្ឋខេត្តព្រះសីហនុ ថ្លែងប្រាប់BTV នៅថ្ងៃទី៨ ខែធ្នូនេះថា ព្រឹត្តិការណ៍បុណ្យសមុទ្រនេះបានអាក់ខានរៀបចំ ២ឆ្នាំកន្លងមកហើយ ដោយសារវិបត្តិកូវីដ១៩ ហើយសម្រាប់ការរៀបចំព្រឹតិ្តការណ៍បុណ្យសមុទ្រឡើងវិញនេះ យើងរំពឹងថា នឹងមានភ្ញៀវជាតិអន្តរជាតិចូលរួមច្រើនកុះករ និងមានភាពសប្បាយរីករាយជាងបណ្តាឆ្នាំកន្លងមក ហើយគេក៏មានការទន្ទឹងរង់ចាំព្រឹតិ្តការណ៍នោះឈានចូលមកដល់ដែរ ជាពិសេសគឺការត្រៀមចាំទទួលភ្ញៀវចម្ងាយមកស្នាក់នៅក្នុងបរិវេណផ្ទះរបស់ពួកគេ ខណៈរដ្ឋបាលខេត្តព្រះសីហនុ ត្រៀមទីតាំងតាមតំបន់ឆ្នេរសមុទ្រច្រើនកន្លែង ទុក សម្រាប់ពលរដ្ឋបោះតង់ស្នាក់នៅផងដែរ។
បើតាម ឯកឧត្តម គួច ចំរើន អភិបាលខេត្តព្រះសីហនុ នៅក្នុងកិច្ចប្រជុំបុណ្យសមុទ្រ បានថ្លែងថា ករណីពលរដ្ឋមកលេងកម្សាន្តសប្បាយបុណ្យសមុទ្រនៅខេត្តព្រះសីហនុ ហើយមិនអាចរកបន្ទប់ស្នាក់នៅ នៅតាមផ្ទះសំណាក់សណ្ឋាគារបាន គឺរដ្ឋបាលខេត្តព្រះសីហនុ បានរៀបចំទីតាំងដីទំនេរធំៗចំនួនពីរកន្លែងដែលភ្ញៀវអាចបោះតង់ស្នាក់នៅបាន ទីតាំងទី១ ដីទំនេរ នៅម្តុំផ្លូវកែង២៣មិថុនា និងទី២ទីតាំងដីនេរនៅម្តុំពយជំទាវម៉ៅ ខណៈបច្ចុប្បន្ននៅខេត្តព្រះសីហនុមានបន្ទប់ស្នាក់នៅតាមសណ្ឋាគារ និងសេវាកម្មស្នាក់នៅទេសចរណ៍ជាង៩០០០បន្ទប់ ។
សូមបញ្ជាក់ថា ព្រឹត្ដិការណ៍បុណ្យសមុទ្រ អមដោយមានការចូលរួមពីគណៈប្រតិភូជាសមាជិកក្លឹបឆ្នេរសមុទ្រស្អាតបំផុតលើពិភពលោកចំនួន ៣៤ក្លឹបឆ្នេរ មកពី ២១ប្រទេស នឹងបង្កើតឲ្យមានសប្បាយជាច្រើន រួមមានពិធីសម្តែងទស្សនីយភាព សិល្បៈ ការប្រគុំតន្ត្រី តាំងពិព័រណ៍ មហោស្រពម្ហូបអាហារ ព្រឹត្តិការណ៍កីឡា ពិធីដាំដើមឈើអនុស្សាវរីយ៍ និងការតាំងពិព័រណ៍សមិទ្ធផលនានា៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
