ភ្នំពេញ៖ សម្តេចក្រឡាហោម ស ខេង នាយករដ្ឋមន្ត្រីស្តីទីនៃរាជរដ្ឋាភិបាលកម្ពុជា បាន​ប្រកាសដាក់​ឱ្យប្រើប្រាស់ជាផ្លូវការឯកសារចក្ខុវិស័យ និងយុទ្ធសាស្ត្រ​ស្តីពី​សុខដុមនីយកម្ម​ការ​កែ​ទម្រង់ ៣បូក១ របស់រាជរដ្ឋាភិបាល ដោយសម្ដេចបានជំរុញស្ថាប័នពាក់ព័ន្ធ ត្រូវអនុវត្ត​ប្រកប​ដោយ​ប្រសិទ្ធ​ភាពខ្ពស់ ។

ក្នុងពិធីប្រកាសដាក់ឲ្យប្រើប្រាស់នូវឯកសារនេះ កាលពីរសៀលថ្ងៃទី៧ ខែធ្នូ ឆ្នាំ២០២២ ឯកឧត្តម ហ៊ែល ចំរើន អគ្គលេខាធិការ​រង​នៃ​គណៈកម្មាធិការ​ដឹកនាំ​ការងារ​កែ​ទម្រង់​ការ​គ្រប់​គ្រង​ហិរញ្ញ​វត្ថុ​សាធារណៈ (អ.គ.ហ) មានប្រសាសន៍ថា ចក្ខុវិស័យ និងយុទ្ធសាស្ត្រ ស្ដីពី​សុខដុមនីយកម្ម​នៃ​ការកែទម្រង់ ៣បូក១នេះ មានគោលបំណងធានាសុខដុមនីយកម្ម នៃការ​កែ​ទម្រង់ ដោយយកសមិទ្ធផល និងបទពិសោធន៍កន្លងមក ធ្វើជាមូល​ដ្ឋាន​ឈា​ន​ឆ្ពោះ​ទៅ​រក​ការ​សម្រេច​បាន​នូវគោលនយោបាយ និងយុទ្ធសាស្ត្ររបស់រាជរដ្ឋាភិបាល ដោយត្រូវ​ឆ្លើយ​តប​ទៅ​នឹង​សភាពការណ៍​វិវត្ត នៃបរិបទសកលលោក ។

នាឱកាសនោះ សម្ដេចក្រឡាហោម បានវាយតម្លៃខ្ពស់ចំពោះក្រុមការងារអគ្គលេខាធិការដ្ឋាន និង​លេខាធិការដ្ឋាន ដែលបានសហការគ្នារៀបចំនូវឯកសារនេះឡើង ដោយសម្ដេចបាន អំពាវនាវ ឱ្យ​មាន​ការ​ចូលរួមកាន់តែសកម្មថែមទៀត ពីគ្រប់ភាគីពាក់ព័ន្ធទាំងអស់ ក្នុងដំណាក់​កាល​នៃ​ការ​ធ្វើ​កំណែ​ទម្រង់​នេះ ។

សម្តេច ស ខេង បានបន្ថែមថា ផ្អែកទៅលើការរីកចម្រើន តម្រូវការសង្គម រួមជាមួយ​ការ​ប្រកួត​ប្រជែង​លើ​ឆាកអន្តរជាតិកម្ពុជាត្រូវផ្តោតការយកចិត្តទុកដាក់ និងត្រូវ​តែ​មាន​ការ​ជំរុញ​លើក​កម្ពស់​ប្រសិទ្ធ​ភាព នៃការធ្វើកំណែទម្រង់ផ្នែកអភិបាលកិច្ច ដើម្បី​ធានា​ដល់​ការ​ឆ្លើយ​តប​យ៉ាង​មាន​ប្រសិទ្ធ​ភាព នៃតម្រូវការសង្គមផង និងដើម្បី​ការ​ទប់ទល់​ទៅ​នឹង​សភាពការណ៍​វិវត្ត​នៃ​បរិបទ​សកល​លោក និងហេតុការណ៍នានា ដែលកើតចេញពីវិត្តបត្តិពិភពលោកផងដែរ ។

សម្តេច​ក្រឡាហោម បានបន្តថា ការធ្វើកំណែ​ទម្រង់​នេះ​មាន​លក្ខណៈ​ជា​អន្តរវិស័យ​មាន​ទំនាក់​ទំនង​ដោយ​ផ្ទាល់ផង និងប្រយោលផង ព្រមទាំងមានលក្ខណៈបំពេញបន្ថែមឱ្យគ្នាទៅវិញទៅមក អាស្រ័យ​ហេតុនេះជោគជ័យ គឺអាស្រ័យទៅលើការរៀបចំដោយការយកចិត្តទុកដាក់ និងភាព​ប្រទាក់​ក្រឡាគ្នា ដើម្បីបំពេញឱ្យគ្នាទៅវិញទៅមក ។

នាយករដ្ឋមន្ត្រីស្តីទី បានបញ្ជាក់ថា ដើម្បីធានាឱ្យឯកសារចក្ខុវិស័យ និងយុទ្ធសាស្ត្រស្តីពី “សុខដុមនីយកម្មការកែទម្រង់ ៣បូក១ នៃរាជរដ្ឋាភិបាលនេះ ត្រូវបានអនុវត្ត​ប្រកប​ដោយ​ប្រសិទ្ធ​ភាព​ខ្ពស់ គឺអគ្គលេខាធិការដ្ឋាន និងលេខាធិការដ្ឋាន នៃកម្មវិធីកំណែទម្រង់ទាំង៤ ត្រូវបន្ត​កិច្ច​សហប្រតិបត្តិការ​រួមគ្នាក្នុងការរៀបចំ និងអនុវត្តផែនការសកម្មភាពរួម ឱ្យកាន់តែមាន​ភាព​ប្រទាក់​ក្រឡា​គ្នា ស្របតាមអភិក្រមដែលបានកំណត់ក្នុងឯកសារនេះ ៕