ប្រដាល់សកល៖ កីឡាករប្រដាល់សកលខ្មែរ-អាមេរិក Eric Pieroun Pen ដែលជាម្ចាស់ខ្សែក្រវាត់ពិភពលោក WBA Asia បាននឹងកំពុងសម្រុកហ្វឹកហាត់ជាខ្លាំង ជាមួយក្លិបរបស់ខ្លួននៅប្រទេសវៀតណាម ដើម្បីត្រៀមប្រកួតតំណាងប្រទេសកម្ពុជាលើកដំបូង ក្នុងព្រឹត្តិការណ៍កីឡាស៊ីហ្គេមលើកទី៣១ នៅទីក្រុងហាណូយនាចុងឆ្នាំ២០២១ នេះ។
លោក ប៊ុយ សុភ័ណ្ឌ អគ្គលេខាធិការ សហព័ន្ធកីឡាប្រដាល់សកលកម្ពុជាបានឲ្យដឹងថា ក្រោយក្លាយជាសមាជិកក្រុមជម្រើសជាតិកម្ពុជា Eric Pen បានបង្ហាញឆន្ទៈខ្ពស់ក្នុងការត្រៀមខ្លួនប្រកួតតំណាងកម្ពុជា ជាក់ស្ដែងម្ចាស់ខ្សែក្រវាត់ពិភពលោករូបនេះ កំពុងសម្រុកធ្វើរឿង ២យ៉ាងដើម្បីត្រៀមការប្រកួតកីឡាស៊ីហ្គេមនៅវៀតណាម ទី១-គឺការសម្រកទម្ងន់មកនៅក្រោម ៩១គីឡូក្រាម និងទី២-ការខិតខំហ្វឹកហាត់ ដើម្បីត្រៀមប្រជែងមេដាយជូនប្រទេសកំណើតរបស់ឪពុកម្ដាយខ្លួន។ គួរដឹងថា Eric Pen គឺជាកូនខ្មែរកើតនៅអាមេរិក ដែលមានឪពុកម្ដាយជាអ្នកខេត្តកំពត។ កីឡាករគីឡូធ្ងន់រូបនេះបានចាប់ផ្ដើមហាត់ប្រដាល់ដំបូងនៅឆ្នាំ២០១៤ ក្នុងក្លឹប Saigon Sports Club ដែលជាការហាត់កម្សាន្ត និងសុខភាពប៉ុណ្ណោះ។ ប៉ុន្ដែក្រោយមើលឃើញពីទេពកោសល្យដ៏ល្អរបស់គេ គ្រូបង្វឹកក្លឹបបានព្យាយាមបង្ហាត់គេរហូតក្លាយជាកីឡាករអាជីពនៅខែសីហា ឆ្នាំ២០១៨ ខណៈប្រកួតលើកទី៣ ក្នុងឆ្នាំ២០១៩ គេបានផ្ដួលឥណ្ឌូណេស៊ីឲ្យសន្លប់ ដើម្បីគ្រងខ្សែក្រវាត់ពិភពលោក WBA Asia តែម្ដង។
បន្ទាប់មកសហព័ន្ធកីឡាប្រដាល់សកលកម្ពុជា និងកីឡាករខ្មែរ-អាមេរិករូបនេះក៏បានព្យាយាមទំនាក់ទំនង និងធ្វើការជាមួយគ្នារហូតដល់ខែកក្កដា ឆ្នាំ២០០២ សហព័ន្ធក៏បានប្រកាស Eric Pen គឺជាសមាជិកក្រុមជម្រើសជាតិរបស់ខ្លួនជាផ្លូវការ ដើម្បីត្រៀមការប្រកួតអន្ដរជាតិនានា។ Eric Pen បានសម្ដែងការសប្បាយចិត្តជាខ្លាំង ក្រោយបានក្លាយជាកីឡាករតំណាងប្រទេសកំណើតរបស់ឪពុកម្ដាយខ្លួន ហើយគេបានប្ដេជ្ញាចិត្តយ៉ាងមុតមាំក្នុងការប្រកួតប្រជែងដណ្ដើមមេដាយជូនកម្ពុជា រួមទាំងដំណើរឆ្ពោះទៅស៊ីហ្គេមឆ្នាំ២០២៣ ទៀតផង៕
អត្ថបទ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
