ភ្នំពេញ៖ មន្ទីរវប្បធម៌ និងវិចិត្រសិល្បៈខេត្តកំពង់ឆ្នាំង សហការជាមួយនាយកដ្ឋានអភិវឌ្ឍន៍វប្បធម៌ នឹងរៀបចំពិធីប្រឡង ដាល់អំបុក និងប្រឡងបង្ហើរខ្លែង នៅថ្ងៃទី១៧-១៨ ខែធ្នូ ឆ្នាំ២០២២ នាពេលខាងមុខនេះ នៅទីលានចំការដូង នៅភូមិ ដំណាក់កកោះ ឃុំពោធិ៍ ស្រុកកំពង់លែង ខេត្តកំពង់ឆ្នាំង ។

បើតាមលោក នូ សោភណ័ ជំនួយការក្រសួងវប្បធម៌និងវិចិត្រសិល្បៈ បានប្រាប់BTV ព័ត៌មាន​នៅព្រឹកថ្ងៃទី៨ ខែធ្នូ ឆ្នាំ២០២២នេះថា នាយកដ្ឋាន​បានសហការជាមួយមន្ទីរវប្បធម៌ខេត្ត ចាប់តាំងពីដើមទីដំបូង នៃកម្មវិធី បានជួយសម្របសម្រួលជាទម្រង់បែបបទ ​នៃព្រឹត្តិការណ៍ និង​កិច្ចការលើបទពិសោធន៍ ដែលធ្លាប់ធ្វើនាពេលកន្លងមក។ ព្រឹត្តិការណ៍នាពេលខាងមុខនេះ គឺ​ប្រារព្ធ​ឡើងក្នុងនាមជាសហគមន៍ ​សម្រាប់ប្រជាជនរស់នៅក្នុងខេត្តកំពង់ឆ្នាំង។

លោក បានបន្ថែមថា មកដល់ពេលនេះកិច្ចនានា បានរៀបចំជាបណ្តើរៗហើយបាន​ទទួលពាក្យ​បេក្ខជន​ប្រឡង​ដាល់អំបុក មកពីសហគមន៍នានា ​ចំនួន៨ក្រុម​ ក្នុងមួយក្រុម ​មាន៨នាក់។ ហើយបេក្ខជនបង្ហើរខ្លែង មានចំនួន១១ក្រុម ​មកពីទូទាំងខេត្តកំពង់ឆ្នាំង ​ហើយក្នុងមួយក្រុម មាន៤នាក់។ ក្រៅពីប្រឡងប្រធានមូលនិធិអ៊ីងហ្វោនដេសិន (INGFoundation) បានផ្តល់​ថវិកា​ឲ្យមន្ទីរវប្បធម៌ ខេត្តកំពង់ឆ្នាំង ​ស្វែងរកចាស់ព្រឹទ្ធចារ្យ ដែលមានជំនាញធ្វើខ្លែងឯក ធ្វើបាន​ចំនួន៨០ខ្លែង​ សម្រាប់ចែកជូនយុវជន ​យុវនារី ​បងប្អូនប្រជាពលរដ្ឋរស់នៅក្នុងសហគមន៍។

ដូច្នេះសូមបងប្អូនសាធារណជនពិសេស យុវជន យុវនារី ​ដែលមាន ​បំណងចង់ចូលរួមប្រឡង - សូមអញ្ជើញទាក់ទងសួរព័ត៌មានលម្អិតជាមួយមន្ទីរវប្បធម៌និងវិចិត្រសិល្បៈខេត្ត ​ដែលមាន អាសយដ្ឋាន​នៅភូមិទី១ សង្កាត់ខ្សាម ក្រុងកំពង់ឆ្នាំង ​ខេត្តកំពង់ឆ្នាំង​ ឬតាមរយៈលេខទូរស័ព្ទ 011 456 112 ក្រៅពីការប្រឡងដាល់អំបុកនិងបង្ហើរខ្លែង ​មានកម្មវិធី​សម្ដែងសិល្បៈចម្រុះជាច្រើន​ទម្រង់​ទៀតសម្រាប់ជូនបងប្អូន ​ទស្សនាកម្សាន្តសប្បាយក្នុងព្រឹត្តការណ៍វប្បធម៌រដូវរំហើយនេះ ។

អាស្រ័យហេតុនេះ សូមបងប្អូនសាធារណជនអញ្ជើញចូលរួមកម្សាន្តសប្បាយ ក្នុងន័យលើកស្ទួយ​ទំនៀមទំលាប់​ ប្រពៃណីដែលជាមរតកវប្បធម៌អរូបីរបស់សហគមន៍យើងឲ្យបានច្រើនកុះករ ៕អត្ថបទ រដ្ឋា