ភ្នំពេញ៖ ឯកឧត្តម ទិត ចន្ថា រដ្ឋលេខាធិការក្រសួងទេសចរណ៍ ​ស្នើឲ្យអាជីវកម្មទាំងអស់​សូមកុំ​ដំឡើង​ថ្លៃសេវាកម្មនានាក្នុងថ្ងៃបុណ្យសមុទ្រ​ ដែល​នាំ​ប៉ះពាល់​គោលដៅ​ទេសចរណ៍ខេត្តព្រះសីហនុ។

ឯកឧត្តម ទិត ចន្ថា បានលើកឡើងក្នុងសិក្ខាសាលាការពង្រឹងគុណភាពសេវាកម្មទេសចរណ៍ ឆ្ពោះទៅ​អបអរពិធីបុណ្យសមុទ្រលើកទី៩ ជុំទី៣ ឆ្នាំ២០២២​ ក្រោមប្រធានបទ “ឆ្នេរនៃសន្ដិភាព ឆ្នេរនៃក្ដីសង្ឃឹម” នៅខេត្តព្រះសីហនុ ​នៅថ្ងៃទី៨ ខែធ្នូនេះ ។

ឯកឧត្តម ទិត ចន្ថា បានស្នើដល់អាជីវកម្មទាំងអស់ ​ត្រូវខិតខំយកចិត្តទុកដាក់បម្រើសេវាកម្មជូន​ភ្ញៀវ​ប្រកប​ដោយគុណភាពល្អប្រសើរ​ និង​មិន​ត្រូវ​ដំឡើង​ថ្លៃសេវាកម្មច្រើនហួស ​ដែល​អាចបង្ក​ជារូបភាព​មិនល្អនាំឱ្យប៉ះពាល់ដល់គោលដៅទេសចរណ៍ខេត្តព្រះសីហនុ ​និងតំបន់ឆ្នេរ។

ព្រមជាមួយគ្នានេះ ឯកឧត្តម ទិត ចន្ថា ក៏ស្នើដល់រដ្ឋបាលខេត្តព្រះសីហនុ ​អាជ្ញាធរគ្រប់លំដាប់ថ្នាក់ និងភាគីឯកជនទាំងអស់ ​ត្រូវរួមគ្នាថែរក្សាសន្ដិសុខ​ សណ្ដាប់ធ្នាប់សាធារណៈ និង​សោភ័ណភាព​ទីក្រុងឱ្យបានល្អ ​ក្នុងឱកាសពិធីបុណ្យសមុទ្រនេះ ​ដោយឈរលើមូលដ្ឋាន ក្រុងព្រះសីហនុ ជា​ជ័យ លាភី​ផ្ការំដួល ៣ទងនៃចលនាប្រឡងប្រណាំងទីក្រុងស្អាតថ្នាក់ជាតិនាពេលកន្លងមក និងក៏ជាជ័យលាភីទីក្រុងទេសចរណ៍ស្អាតថ្នាក់អាស៊ាន ​នាពេលកន្លងទៅផងដែរ។

ពិធីបុណ្យសមុទ្រ ត្រូវបានរៀបចំឡើងក្នុងគោលបំណង​ដើម្បីអបអរសាទរ​ឆ្នេរសមុទ្រកម្ពុជា​ជា​សមាជិក​ក្លឹបឆ្នេរសមុទ្រដែលស្អាតជាងគេលើសាកលលោក ​ក៏ដូចជាជំរុញ​លើក​តំលៃ និង​ផ្សព្វផ្សាយ​សក្តានុពល​ទេសចរណ៍កម្ពុជា​ ពិសេស ​អេកូទេសចរណ៍នៅតំបន់ឆ្នេរសមុទ្រកម្ពុជា ប៉ុន្តែ ត្រូវបាន​អាក់ខាន​ដោយសារវិបត្តិជំងឺកូវីដ-១៩។

សម្រាប់ពិធីបុណ្យសមុទ្រឆ្នាំ២០២២នេះ ​នឹងមានព្រឹត្តិការណ៍ប្រគុំតន្រ្តីចល័តនៅតាមមាត់ឆ្នេរ, ព្រឹត្តិការណ៍កីឡា, ការតាំងពិព័រណ៍, និងសកម្មភាពកម្សាន្តផ្សេងទៀតនៅតាមមាត់សមុទ្រ៕ អត្ថបទ ស៊ុម សុខជា