កំពង់ធំ៖ នៅព្រឹកថ្ងៃទី៨ ខែធ្នូ ឆ្នាំ២០២២ លោក ជា ពុំ ប្រធានលេខធិការដ្ឋានរៀបចំការបោះឆ្នោត​ខេត្តកំពង់ធំ ​បានលើកឡើងថា ចំនួនប្រជាពលរដ្ឋ ​ដែលមកពិនិត្យឈ្មោះ និងចុះឈ្មោះបោះឆ្នោត​នៅក្នុងខេត្ត មានការឡើង។

លោក បញ្ជាក់ថា ការិយាល័យចុះឈ្មោះបោះឆ្នោតមានទីតាំងនៅតាមសាលាឃុំ សង្កាត់ និង​តាមភូមិ នៅក្នុងខេត្តកំពង់ធំ សរុបចំនួន ១.១៥២ការិយាល័យ ​ដែលបានចាប់ផ្តើមដំណើរការពិនិត្យ និងចុះឈ្មោះឆ្នោត ចាប់ពីថ្ងៃទី២០ខែតុលា​ ឆ្នាំ២០២២ រហូតមកដល់ត្រឹមព្រឹកថ្ងៃទី៨​ ខែធ្នូ​ ឆ្នាំ២០២២ មាន​ប្រជាពលរដ្ឋ មកចុះឈ្មោះថ្មីចំនួន ២៨.៩៥៧នាក់ ស្មើរនឹង១៥៥.៣៣% ធៀបចំនួន​ប្រជាពលរដ្ឋ​ប៉ាន់ស្មាន​ ដែលអាចចុះឈ្មោះបាន ក្នុងនោះប្រជាពលរដ្ឋអាយុ១៨ ឆ្នាំឡើង មាន​ចំនួន៩០.០៥% , ប្រជាពលរដ្ឋផ្ទេរឈ្មោះមកពីក្រៅចំនួន៦.០១៩នាក់, ប្តូរការិយាល័យក្នុងឃុំ សង្កាត់ ចំនួន៣.១៧២នាក់ ​និងលុបឈ្មោះចេញពីបញ្ជីបោះឆ្នោត​ ដោយសារផ្លាស់ចេញ ​មរណៈភាព ដកសិទ្ធិ សរុបចំនួន ១៣.១៤៨នាក់។

លោក ជា ពុំ បញ្ជាក់ថា ប្រជាពលរដ្ឋមានការយល់ដឹងអំពីតួនាទីជាពលរដ្ឋល្អ និង​បាន​អនុវត្តន៍​កាតព្វកិច្ច ក្នុងការត្រៀមខ្លួនជ្រើសរើសតំណាង ​ដឹងនាំប្រទេស ​ស្របតាមចន្ទៈ របស់​ពួកគាត់ ដែលនឹងស្តែងចេញតាមរយៈការបោះឆ្នោតជ្រើសរើសតំណាងរាស្រ្តនៅឆ្នាំ២០២៣ ខាងមុខ៕