បន្ទាយមានជ័យ ៖ ច្រកព្រំដែនអន្តរជាតិស្ទឹងបត់-បាណងអៀន ដែលប្រសព្វគ្នារវាងខេត្តបន្ទាយមានជ័យ ជាមួយខេត្ត​ស្រះកែវ​ប្រទេសថៃ គ្រោងនឹងបញ្ចប់ការសាងសង់ និងបើកឲ្យដំណើរការនៅអំឡុងឆ្នាំ២០២៣ខាងមុខនេះ ខណៈការសាងសង់​សម្រេច​បានប្រមាណ៨០%។

ច្រកព្រំដែនអន្តរជាតិថ្មីនេះមិនត្រឹមតែជួយសម្រួលការធ្វើចរាចរណ៍ និងកាត់បន្ថយការកកស្ទះ​នៅច្រកព្រំដែនអន្តរជាតិ​ប៉ោយប៉ែត​នោះទេ ថែមទាំងអាចជួយសម្រួលដល់ការដោះដូរទំនិញ និងជំរុញពាណិជ្ជកម្មរវាងប្រទេសទាំងពីរផងដែរ នៅពេលច្រក​នេះដាក់​ឲ្យដំណើរការ។

ក្នុងពេលឆាប់ៗខាងមុននេះ ខេត្តបន្ទាយមានជ័យ និងខេត្តស្រះកែវប្រទេសថៃ នឹងមានច្រកព្រំដែន​អន្តរជាតិស្ទឹងបត់-បាណង​អៀនមួយបន្ថែមទៀត សម្រាប់បម្រើការធ្វើដំណើរ និងដឹកជញ្ជូនទំនិញចេញចូលរវាងខេត្តទាំងពីរ។ បើតាមការគូសបញ្ជាក់របស់ឯកឧត្តម សេក សុខុម អ្នកនាំពាក្យរដ្ឋបាលខេត្តបន្ទាយមានជ័យ មកទល់ពេលនេះ​ច្រកព្រំដែន​អន្តរជាតិនេះសម្រេចការសាងសង់បានប្រមាណ៨០% ដោយគ្រោងបញ្ចប់ និងដាក់ឲ្យដំណើរការនៅឆ្នាំ២០២៣ ខាងមុខនេះ។ បច្ចុប្បន្នភាគីថៃ បានបញ្ចប់ការសាងសង់ជាស្ថាពរហើយ នៅឡើយតែខាងកម្ពុជា ដែលកំពុងសម្រុកការសាងសង់​អគារ​ការិយាល័យគយ និងអគារមួយចំនួន។

អ្នកនាំពាក្យរូបនេះជឿជាក់ថា ក្រោយច្រកព្រំដែនអន្តរជាតិនេះ ត្រូវបានដាក់ឲ្យដំណើរការ វានឹងជួយធ្វើឲ្យការ​ដឹកជញ្ជូនទំនិញ​ចេញចូលរវាងខេត្តទាំងពីរ កាន់តែមានភាពល្អប្រសើរនិងលឿនជាងមុន ដ្បិតច្រកព្រំដែនអន្តរជាតិនេះ មានទំហំធំជាង​ច្រកព្រំដែនអន្តរជាតិប៉ោយប៉ែត។ បន្ថែមលើនេះច្រកនេះ ក៏នឹងរួមចំណែកជួយជំរុញ ការធ្វើពាណិជ្ជកម្មរវាងប្រទេសទាំងពីរ ឲ្យកាន់តែប្រសើរមួយកម្រិតទៀតផងដែរ។

ស្រដៀងគ្នានេះ លោក ជា ចាន់ដារ៉ា ប្រធានសមាគមពាណិជ្ជករដឹកជញ្ជូនទំនិញ និងខ្សែច្រវាក់ផ្គត់ផ្គង់នៅកម្ពុជាជឿជាក់ថា នៅពេលច្រកព្រំដែនអន្តរជាតិស្ទឹងបត់-បាណងអៀន ដាក់ឲ្យដំណើរការវានឹងជួយជំរុញ ទំហំពាណិជ្ជកម្មទ្វេភាគីកម្ពុជា-ថៃ ឲ្យមានការកើនឡើងមួយកម្រិតទៀត។ ព្រោះលោកសង្កេតឃើញថា បើទោះបីកន្លងមកកម្ពុជា និងថៃបានទទួលរងនូវ​ការឆ្លងរាតត្បាតនៃជំងឺកូវីដ-១៩ តែការធ្វើពាណិជ្ជកម្មរវាងប្រទេសទាំងពីរ នៅតែមានភាពល្អប្រសើរ និងមានការកើន​ឡើងគួរឲ្យកត់សម្គាល់។

គួរបញ្ជាក់ផងថា ច្រកព្រំដែនអន្តរជាតិស្ទឹងបត់-បាណងអៀន បានបើកការដ្ឋានសាងសង់នៅថ្ងៃទី២២ ខែមេសា ឆ្នាំ២០១៩ ដោយមានទុនវិនិយោគជាង២៦លានដុល្លារអាមេរិក ដែលជាហិរញ្ញប្បទានសម្បទាន របស់រាជរដ្ឋាភិបាលថៃ។ តាមគម្រោងច្រកព្រំដែនអន្តរជាតិនេះ សាងសង់ឡើងសម្រាប់បម្រើឲ្យតែការដឹកជញ្ជូនទំនិញតែប៉ុណ្ណោះ ខណៈច្រកព្រំដែនអន្តរជាតិប៉ោយប៉ែត សម្រាប់បម្រើឲ្យការធ្វើដំណើរចេញចូលរបស់ភ្ញៀវទេសចរ និងប្រជាពលរដ្ឋ។ តាមពិតច្រកព្រំដែនអន្តរជាតិស្ទឹងបត់ គ្រោងដាក់ឲ្យដំណើរការសាកល្បង តាំងពីអំឡុងខែកក្កដាមកម្ល៉េះ តែត្រូវបានពន្យារពេលមកដល់បច្ចុប្បន្នដោយសារវិបត្តិកូវីដ-១៩៕ អត្ថបទ ៖ សំ ងីម