​រុស្ស៊ី៖ សហរដ្ឋអាមេរិក និង​រុស្ស៊ី​បាន​ដោះដូរ​អ្នកទោស​តារា​បាល់បោះ​អាមេរិកនាង Brittney Griner ជាមួយ​ឈ្មួញ​លក់​អាវុធ​ដ៏​ល្បីល្បាញ​ជនជាតិ​រុស្ស៊ីលោក Viktor Bout ដែល​បាន​ជាប់ឃុំ​ក្នុង​ពន្ធនាគារ​អាមេរិក​រយៈ​ពេល​ ១២​ឆ្នាំ​។ ​លោកប្រធានាធិបតី​អាមេរិក Joe Biden និយាយថា តារា​បាល់បោះ Griner មាន​សុវត្ថិភាព និង​កំពុងធ្វើដំណើរ​ត្រឡប់មក​ប្រទេស​វិញ​ពី​អារ៉ាប់​រួម​។

​ថ្លែង​នៅ​សេត​វិមានលោក​បាន​និយាយថា ខ្ញុំ​រីករាយ​ណាស់​ដែល Brittney មាន​ស្មារតី​ល្អ នាង​ត្រូវការ​ពេលវេលា និង​ទីកន្លែង​ដើម្បីធ្វើ​ឲ្យ​ស្ថានភាព​ប្រសើរ​ឡើងវិញ។ ​សារព័ត៌មាន​រុស្ស៊ីបាន​រាយការណ៍​ថា លោក Viktor Bout ដែល​ត្រូវគេ​ស្គាល់​ច្បាស់​ថា​ ជា​ឈ្មួញ​មច្ចុរាជ​បាន​ទៅដល់​ទីក្រុង Moscow ហើយ​នៅ​ថ្ងៃ​សុក្រ​នេះ។ ​លោក Bout បាន​និយាយ​នៅក្នុង​សន្និសីទ​សារព័ត៌មានទៅកាន់​អ្នកសារព័ត៌មាន​ម្នាក់​មកពី​ទូរទស្សន៍​ជាតិ បន្ទាប់ពី​មកដល់​ទឹកដី​រុស្ស៊ី​ថា នៅ​ពាក់​កណ្ដាល​អធ្រាត្រ មាន​គេ​មក​ដាស់​ខ្ញុំ​ហើយ​ប្រាប់​ខ្ញុំ​ថា រៀបចំ​ឥ​វ៉ាន់​របស់​អ្នក​ទៅ​។​

​លោក Bout ត្រូវគេ​រាយការណ៍​ថា ​បាន​ចុះ​ពី​យន្តហោះដោយ​កាន់​បាច់ផ្កា​មុនពេល​ឱបម្ដាយ ​និង​ភរិយា​របស់លោក​។ គួររម្លឹកថា តារា​បាល់បោះ Griner ត្រូវបាន​ចាប់ខ្លួន​នៅ​អាកាសយានដ្ឋាន​ក្រុង Moscow កាលពី​ខែកុម្ភៈ​ពីបទ​ប្រើ​ប្រេង​កញ្ឆា ហើយ​បាន​បញ្ជូន​ទៅកាន់​ពន្ធនាគារ​នៅ​ដែនដី​ដាច់ស្រយាល​៕

អត្ថបទ៖ សុខមាន