ភ្នំពេញ៖ លោក Alan Symonette ប្រធានបណ្ឌិត្យសភាជាតិអាជា្ញកណ្តាល សហរដ្ឋអាមេរិក បាន​ដឹកនាំគណៈប្រតិភូចូលជួបសម្តែងការគួរសមជាមួយ ឯកឧត្តមបណ្ឌិត អ៊ិត សំហេង រដ្ឋមន្ត្រី​ក្រសួង​ការងារ និងបណ្តុះបណ្តាលវិជ្ជាជីវៈ ក្នុងគោលបំណងស្វែងយល់ និងផ្លាស់ប្តូរ​បទ​ពិសោធន៍​លើ​វិស័យការងារ ជាពិសេស​យន្តការ​ក្នុងការដោះស្រាយ​វិវាទ​ការងារ​ក្រៅ​ប្រព័ន្ធ​តុលាការ​ក្នុង​ប្រទេស​កម្ពុជា និងការងារមួយចំនួនផ្សេងទៀត។

តាមក្រសួងការងារ និងបណ្តុះបណ្តាលវិជ្ជាជីវៈ បានឲ្យដឹងនៅល្ងាចថ្ងៃទី៨ ធ្នូ ឆ្នាំ២០២២ ក្រោយ​ចប់​ជំនួប​នេះថា ក្រៅពីការស្វែងយល់ និងផ្លាស់ប្តូរបទពិសោធន៍លើវិស័យការងារនេះ ភាគី​អាមេរិក​​បានផ្តោតបន្ថែមទៅលើការងារការបញ្ចូនសំណុំរឿងទៅក្រុមប្រឹក្សាអាជ្ញាកណ្តាល ការ​ពង្រីក​សេវា​កម្ម នៃក្រុមប្រឹក្សាអាជ្ញាកណ្តាល នីតិវិធីដោះស្រាយវិវាទ ក៏ដូចជា​ដើម្បី​ពិនិត្យ​លើ​លទ្ធភាព​ក្នុង​ការកសាងកិច្ចសហប្រតិបត្តិការ និងទំនាក់ទំនងភាពជាដៃគូ រវាង​បណ្ឌិត្យ​សភា​ជាតិ​អាជ្ញា​កណ្តាល ជាមួយនឹងក្រសួងការងារផងដែរ។

នៅក្នុងជំនួបនេះឯកឧត្តមរដ្ឋមន្រ្តី បានចែករំលែកព័ត៌មានពីការវិវត្តន៍ និង​ការ​រីកចំ​រើន​វិស័យ​ការងារ​នៅ​កម្ពុជា ដែលបានចាប់ផ្តើមឡើង តាំងពីដំណាក់​ដែល​ប្រទេស​កម្ពុជា​ទើប​ទទួល​បាន​ការ​រីក​ចម្រើន​ជាបណ្តើរៗនូវវិស័យឧស្សាហកម្ម បន្ទាប់ពីកម្ពុជាទទួលបានសន្តិភាពពេញលេញ ហើយ​កម្ពុជា​បាន​ចុះ​កិច្ច​ព្រម​ព្រៀង​ពាណិជ្ជកម្ម​ដោយ​ផ្សា​ភ្ជាប់​បទ​ដ្ឋាន​ការងារ​អន្តរជាតិ​ជា​មួយ​សហរដ្ឋ​អាមេរិក។ ឯកឧត្តមបានបន្តថា កាលពីការចាប់ផ្តើមដំបូង កម្ពុជា​ពិត​ជា​ជួប​នូវ​បញ្ហា​ប្រឈម​យ៉ាង​ធ្ងន់ធ្ងន់ ដោយសារបញ្ហា ការមិនយល់ពីច្បាប់ស្តីពីការងារ នាំឱ្យទំនាក់ទំនងវិជ្ជាជីវៈ មាន​ការ​ប្រឈម បង្កទៅជាកូដកម្ម បាតុកម្មតវ៉ាទាមទារសិទ្ធិ និងអត្ថប្រយោជន៍ មានចំនួនច្រើន​នៅ​តាម​រោងចក្រ សហគ្រាស។ ប៉ុន្តែតាមរយ: ការពង្រឹងការអនុវត្តច្បាប់ស្តីពីការងារ និងការដាក់​ចេញ​នូវ​ច្បាប់ និងលិខិតបទដ្ឋានថ្មីៗ ការរៀបចំអោយ​មាន​យន្ត​ការ​សន្ទនា​សង្គ​ម​ជា​លក្ខណៈ​ត្រី​ភាគី​ជា​យន្តការរួម ទាំងការពង្រឹងសមត្ថភាពមន្រ្តីអធិការកិច្ចការងារ និងមន្រ្តីផ្សះផ្សារវិវាទការងារ ហើយ​នៅ​ឆ្នាំ២០០៤ ក្រសួងបានបង្កើតក្រុមប្រឹក្សាអាជ្ញាកណ្តាល ដែលជាស្ថាប័ន​ឯករាជ្យ​ក្នុង​ការ​ដោះ​ស្រាយ​វិវាទការងារប្រកបដោយតម្លាភាព ធ្វើឱ្យចំនួននៃវិវាទការងារកាន់តែបន្តធ្លាក់ចុះ ហើយ​ចំនួន​នៃ​ការធ្វើកូដកម្ម បាតុកម្មតវ៉ាក៏ធ្លាក់យ៉ាងខ្លាំងដែរ។

ជាកិច្ចឆ្លើយតបភាគីអាមេរិក បានថ្លែងអំណរគុណដល់ឯកឧត្តមរដ្ឋមន្រ្តី ដែលបានចែក​រំលែក​នូវ​ព័ត៌មាន​ល្អៗ ក៏ដូចជាបទពិសោធន៍របស់កម្ពុជាទៅលើការគ្រប់គ្រងវិស័យការងារ។ នាឱកា​ស​នោះ​លោក ក៏បានចែងរំលែកពីបទពិសោធន៍ បណ្ឌិត្យសភាជាតិអាជ្ញាកណ្តាល សហរដ្ឋអាមេរិក ដែលបាន​ចាប់ផ្តើមវិវត្តន៍រីកចំរើន ចាប់តាំងពីការបង្កើតឡើងនៅឆ្នាំ១៩៤០ ដែលបច្ចុប្បន្ន មានសមាជិក​ប្រមាណ ៦០០នាក់ ហើយដែលទទួល​ស្គាល់​ថា​ជា​ស្ថាប័ន​ឯករាជ្យ​មួយ​ដោះ​ស្រាយ​វិវាទ​ការងារ ក្រៅប្រព័ន្ធតុលារនៅសហរដ្ឋអាមេរិក និងកាដាណា ដែលទទួល​ការ​ជឿទុក​ចិត្ត​ពី​ភាគី​កម្ម​ករ​និយោជិត និងនិយោជក។

លោកបានលើកពីកត្តាជោគជ័យ ផ្តើមចេញ​ពី​ការ​ជឿទុ​ក​ចិត្ត​ពី​ភាគី​ពាក់ព័ន្ធ​ទាំង​អស់​ទៅ​លើប្រ​សិទ្ធភាព និងតម្លាភាពនៃស្ថាប័នរបស់លោក។ តាមការស្នើសុំរបស់ឯកឧត្តមរដ្ឋមន្រ្តី  លោកក៏​​បាន​សន្យាថា​នឹងបន្តកិច្ចសហការជាមួយក្រុមប្រឹក្សាអាជ្ញាកណ្តាលកម្ពុជា ហើយក៏នឹងសិក្សា​លើ​កិច្ច​សហប្រតិបត្តិការជាមួយវិទ្យាស្ថានជាតិការងារផងដែរ ដោយសារ​បណ្ឌិត្យ​សភាជាតិ​អាជ្ញា​កណ្តាល សហរដ្ឋអាមេរិក មានសាស្រ្តា​ចារ្យ​មាន​បទ​ពិសោធន៍​ខ្ពស់​ដែល​អាច​ចែក​រំលែក​នូវ​ចំណេះ​ដឹង​លើច្រើន​មុខវិជ្ជា៕ អត្ថបទ៖ ដោយ ឈិត បូរ៉ាវី