បេសកកម្មរយៈពេលពេញមួយថ្ងៃលើទឹកដីខេត្តកំពង់ឆ្នាំង អំណោយមនុស្សធម៌​របស់​កាក​បាទ​ក្រហម​កម្ពុជា ដែលមាន ហ្លួងម៉ែ នរោត្តម មុនិនាថ សីហនុ ព្រះប្រធានកិត្តិយស និង​សម្តេច​កិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានបន្ត​ចែក​ជូន​ដល់​ចាស់​ជរា​ឥត​ទីពឹង ស្ត្រីមេម៉ាយជួបការលំបាកចំនួន ៨៥គ្រួសារ បន្ថែមទៀត។

កាលពីរសៀលថ្ងៃទី៨ ខែធ្នូ ឆ្នាំ២០២២ ដដែល លោកជំទាវ ពុំ ចន្ទីនី អគ្គលេខាធិការ កាក​បាទ​ក្រហម​កម្ពុជា និងសហការី ដោយបានការចូលរួមពី គណៈកម្មាធិការសាខា ក្រុមប្រតិបត្តិសាខា-អនុ​សាខា អ្នកស្ម័គ្រចិត្ត យុវជនកាកបាទក្រហមកម្ពុជា បានបន្តចុះជួបសំណេះសំណាល សួរ​សុខ​ទុក្ខ ចាស់ជរាឥតទីពឹង និងស្រ្តីមេម៉ាយកូនច្រើន ជួប​ការលំបាក​ដែល​ត្រូវ​ការ​ជំនួយ​ជា​ចាំបាច់​សរុប​ចំនួន ៨៥គ្រួសារក្នុងឃុំក្បាលទឹក ស្រុកទឹកផុស ខេត្តកំពង់ឆ្នាំង។

ក្នុងឱកាសនោះ លោកជំទាវអគ្គលេខាធិការ បានពាំនាំការផ្តាំផ្ញើសាកសួរសុខទុក្ខ ដល់​ប្រជា​ពលរដ្ឋ​​ទាំងអស់ ដោយក្តីនឹករលឹកពី សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធាន​កាក​បាទ​ក្រហម​កម្ពុជា ប្រកបដោយភាពស្និតស្នាល និងការស្រឡាញ់យ៉ាងជ្រាលជ្រៅបំផុត។ ជា​មួយ​គ្នានេះ​ លោកជំទាវបានគូសបញ្ជាក់បន្ថែមថា «សូម​បង​ប្អូន​ប្រជាពលរដ្ឋ​ទាំង​អស់​ត្រូវ​ថែ​ទាំ​សុខ​ភាព​ឱ្យ​បានល្អ ដោយរក្សាអនាម័យស្អាត ផឹកស្អាត ហូបស្អាត រស់នៅស្អាត ដើម្បី​កុំ​ឱ្យ​កើត​ជំងឺ​ផ្សេង​ៗ ត្រូវប្រកបរបរចញ្ចឹមជីវិត បង្កបង្កើនផល ចិញ្ចឹមសត្វ ដើម្បី​ជួយ​ទ្រទ្រង់​ជីវភាព​គ្រួសារ​បាន​មួយ​កម្រិត​ផងដែរ»។

សូមបញ្ជាក់ថាគ្រួសារងាយរងគ្រោះនីមួយៗទទួលបាន៖ អង្ករចំនួន២៥គីឡូក្រាម មី១កេស ត្រីខ​ ១០កំប៉ុង ទឹកស៊ីអ៊ីវ១យួរ ឃីត១កញ្ចប់ (សារុង មុង ភួយ ក្រមា) ជែលលាងដៃ១ដប និង​សាប៊ូ១​ដប​។ ដោយឡែកសាខាកាកបាទក្រហមកម្ពុជាខេត្តកំពង់ឆ្នាំង បានឧបត្ថម្ភបន្ថែមនូវ (បន្ទះសូឡា និង​អំពូលភ្លើង)ប្រើពន្លឺព្រះអាទិត្យ១គ្រឿង ក្នុងមួយគ្រួសារៗផងដែរ៕ អត្ថបទ៖ សំ ងីម