ភ្នំពេញ៖ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានថ្លែងថា ប្រទេសកម្ពុជា នឹងមានផ្លូវល្បឿនលឿនមួយខ្សែទៀត​ ដែលតភ្ជាប់ពីរាជធានីភ្នំពេញ ទៅកាន់ក្រុងបាវិត ខេត្តស្វាយរៀង ជាប់នឹងព្រំដែន ​នៃប្រទេសវៀតណាម ។

តាមរយៈបណ្ដាញសង្គម ក្នុងអំឡុងធ្វើដំណើរទៅកាន់ខេត្តព្រះសីហនុ ​នៅថ្ងៃទី៩ ខែធ្នូ ឆ្នាំ២០២២​នេះ ​សម្ដេចតេជោ នាយករដ្ឋមន្ត្រី ​មានប្រសាសន៍ថា ​សម្ដេចកំពុងធ្វើដំណើរ​លើផ្លូវល្បឿនលឿន​ពីភ្នំពេញខេត្តព្រះសីហនុ ​ហើយយើងនឹងខិតខំកសាងផ្លូវល្បឿនលឿន ​មួយខ្សែទៀតតភ្ជាប់​ពី​ភ្នំពេញ​ទៅបាវិត ​ព្រំដែនវៀតណាម។

ជាមួយនេះ សម្ដេចតេជោ ក៏បានអំពាវនាវដល់ភ្ញៀវទេសចរជាតិ ​និងអន្តរជាតិ សូមអញ្ជើញ​ទៅ​លេងបុណ្យសមុទ្រ នៅក្រុងព្រះសីហនុ ​នៅថ្ងៃស្អែក១០ធ្នូ២០២២ ​ខណៈពិធីបុណ្យនេះធ្វើឡើងចំនួន ៩លើកហើយ ។

គួរបញ្ជាក់ថា កាលពីថ្ងៃទី១០ ​ខែវិច្ឆិកា ឆ្នាំ២០២២ ឯកឧត្ដមទេសរដ្ឋមន្ត្រី ស៊ុន ចាន់ថុល រដ្ឋមន្រ្តី​ក្រសួងសាធារណការ និងដឹកជញ្ជូន ​បានចុះហត្ថលេខាលើកិច្ចព្រមព្រៀងក្របខ័ណ្ឌ ជាមួយ​ក្រុមហ៊ុនក្រុមហ៊ុន China Communications Construction Group Co., Ltd. (CCCG) លើ គម្រោង​ហេដ្ឋារចនាសម្ព័ន្ធផ្លូវល្បឿនលឿន​ តភ្ជាប់ពីរាជធានីភ្នំពេញ ទៅក្រុងបាវិត ។

ផ្លូវល្បឿនលឿនភ្នំពេញ-បាវិត (Phnom Penh-Bavet Expressway) ជាខ្សែផ្លូវថ្មីទាំងស្រុង មានប្រវែង​សរុប​ប្រមាណជា១៣៨គីឡូម៉ែត្រ ​ចេញពីរាជធានីភ្នំពេញ ​ត្រង់ចំណុចផ្លូវក្រវាត់ក្រុងទី៣ កាត់តាម​ខេត្តកណ្តាល ​ខេត្តព្រៃវែង ​និងខេត្តស្វាយរៀង​ ឆ្ពោះទៅក្រុងបាវិត ព្រំដែនកម្ពុជា-វៀតណាម ។ គម្រោងនេះរួមបញ្ចូលទាំងការសាងសង់ស្ពានផ្លូវឆ្លងកាត់ទន្លេមេគង្គប្រវែងប្រមាណ​ ៥គីឡូម៉ែត្រ គ្រោង​នឹងបើកការដ្ឋានសាងសង់នៅឆ្នាំ២០២៣ ​និងបញ្ចប់គម្រោងឱ្យរួចរាល់នៅបំណាច់ឆ្នាំ២០២៦ ឬដើមឆ្នាំ២០២៧​ ដោយត្រូវចំណាយថវិកាសាងសង់សរុបប្រមាណ ១ ៦៣៨ លានដុល្លារអាមេរិក ។

បច្ចុប្បន្ននេះ ក្រុមការងារអន្តរក្រសួង នៃគម្រោងហេដ្ឋារចនាសម្ព័ន្ធផ្លូវល្បឿនលឿនភ្នំពេញ-បាវិត រួមជាមួយក្រុមហ៊ុន​ទទួលបន្ទុកសាងសង់ ​កំពុងពិនិត្យកែសម្រួលឱ្យរួចរាល់ចំណុច​សេសសល់​មួយ​ចំនួន ក្នុងកិច្ចព្រមព្រៀងសម្បទាន ​ដើម្បីឈានទៅរកសេចក្តីសម្រេចរួមជាផ្លូវការ ហើយគ្រោង​នឹង​ចុះហត្ថលេខាក្នុងឱកាសដែល ​សម្ដេចអគ្គមហាសេនាបតីតេជោ​ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា អញ្ជើញចុះទៅបំពេញទស្សនកិច្ចផ្លូវការ​ នៅប្រទេសចិន នាដើមឆ្នាំ២០២៣ខាងមុខ ៕ អត្ថបទ បាន សុខរិទ្ធិ