ភ្នំពេញ៖ បន្ទាប់ពី អង្ករ ពូជផ្ការំដួលរបស់កម្ពុជា ទទួលបានជ័យលាភីលេខ១ ល្អដាច់គេលើពិភព​លោកប្រចាំឆ្នាំ២០២២ កាលពីពេលកន្លងទៅថ្មីៗ ​នៅពេលនេះ សហព័ន្ធស្រូវអង្ករកម្ពុជា បាន​បញ្ជាក់ពីមូលហេតុសំខាន់ៗ​មួយចំនួនជុំវិញ​ អង្ករ ​ពូជផ្ការំដួលរបស់កម្ពុជា ទទួលបាន​ជ័យលាភី​លេខ១ ​ល្អដាច់គេលើពិភពលោកប្រចាំឆ្នាំ២០២២ហើយ។

ផ្តល់កិច្ចសម្ភាសន៍ឱ្យទូរទស្សន៍បាយ័ន លោក ឡាយ ឈុនហួ​ អនុប្រធានសហព័ន្ធ​ស្រូវអង្ករកម្ពុជា​ បានប្រាប់ថា ​មូលហេតុដែលអង្ករ ​ពូជផ្ការំដួលរបស់កម្ពុជា ​ទទួលបានជ័យលាបភីលេខ១ ល្អដាច់​គេលើពិភពលោកប្រចាំឆ្នាំ២០២២ ​ជម្រើសទី១​កើតចេញពីការខិតខំរបស់ប្រជាកសិករ ហើយនៅ​ពេល​ដាក់​ប្រកួតប្រជែងជាក់ស្តែង​ គឺ​គណៈកម្មការផ្តល់ពិន្ទុ ​បាន​ពិនិត្យឃើញថា អង្ករផ្កា​រំដួល​កម្ពុជា​មាន​រូប​សម្បត្តិ​នៃអង្ករល្អ ​មានប្រវែង​គ្រាប់​អង្ករល្អស្មើគ្នា, ​ពណ៌សភ្លឺរលោងស្អាត, មានការ​តុបតែង​វេចខ្ចប់​អង្ករមាន ​លក្ខណៈទាក់ទាញ​ ប្រៀបដូចគ្រាប់​ពេជ្រ ​ហើយនៅពេលអង្ករនេះ​ត្រូវបាន​ចម្អិន​ឱ្យឆ្អិន ​គឺបាយមានភាពទន់ល្អ, ក្លិនក្រអូបប្រហើរ ​និងមានឱជារស់ឆ្ងាញ់។ ការវាយតម្លៃនេះត្រូវឆ្លងកាត់គណៈកម្មការជំនាញ​ដែលមកពីសហរដ្ឋអាមេរិក បូករួមនឹងអ្នកជំនាញ​ចុងភៅផ្នែកអង្ករពិភពលោក។

លោកបន្តថា ​តាមរយៈភាពល្បីល្បាញនេះ ​នឹងធ្វើឱ្យអង្ករកម្ពុជា ​កាន់តែមានទីផ្សារ ឆ្ពោះទៅកាន់​ទីផ្សារជុំវិញ​ពិភពលោក​បន្ថែមទៀត​ជាក់ជាពុំខាន។

សូមបញ្ជាក់ថា ការប្រកួតប្រជែងនេះ ​បានធ្វើនៅប្រទេសថៃ កាលពីថ្ងៃទី១៦.ទី១៧​ ខែវិច្ឆិកាកន្លង​ទៅថ្មីៗ ​ដោយប្រកួតជុំដំបូងមាន៤៥ សំណាកអង្ករ ​បានមកពីប្រទេសចំនួន៨ ​ហើយនៅជុំទី២ ក្រោយ​ជំរុះចេញ៤ប្រទេស ​និងត្រូវជាប់៤ប្រទេស ​ក្នុងនោះរួមមាន កម្ពុជា វៀតណាម​ ថៃ​ និងឡាវ ហើយជុំទី៣ ​ផ្ដាច់ព្រ័ត្រ​ កម្ពុជាជាប់ចំណាត់ថ្នាក់លេខ១ ​និងថៃជាប់លេខ២។

សូមបញ្ជាក់ដែរថា ​សម្រាប់ការទទួលបាន​ចំណាត់ថ្នាក់នេះ កម្ពុជាធ្លាប់ជាប់ចំណាត់ថ្នាក់​ចំនួន៥​ដងមកហើយក្នុងប្រវត្តិ នៃការរៀបចំប្រកួតចំនួន១៤ដង​ ដោយ​លើកទី​១ កម្ពុជាទទួល​បាន​នៅ​ឆ្នាំ២០១២, លើកទី២ ឆ្នាំ២០១៣ លើកទី៣ ឆ្នាំ២០១៤ ​លើកទី៤ ឆ្នាំ២០១៨ ​និងលើកទី៥ឆ្នាំ២០២២៕ ផលិត៖ គង់ រ៉េន