ភ្នំពេញ៖ ឯកឧត្តម សាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល ស្នើឲ្យគិលានុបដ្ឋាក​ទាំងអស់ ប្រកាន់ខ្ជាប់នូវឥរិយាបទជាអ្នកប្រកបវិជ្ជាជីវៈប្រកប​ដោយក្រមសីលធម៌ខ្ពស់ និងមាន​សមត្ថភាព ផ្តល់សេវាថែទាំដោយផ្តោតលើអ្នកជំងឺ។

ការថ្លែងរបស់ឯកឧត្តមសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល យ៉ាងដូច្នេះក្នុង​ពិធីបើកសន្និបាតសមាគមគិលានុបដ្ឋាកកម្ពុជាឆ្នាំ២០២២ ស្តីពី តួនាទី របស់គិលានុបដ្ឋាក ក្នុងការលើកកម្ពស់ការថែទាំដោយផ្តោតលើអតិថិជន និងអ្នកជំងឺ, នាព្រឹកថ្ងៃទី៩ ខែធ្នូ ឆ្នាំ២០២២នេះ។

ឯកឧត្តមរដ្ឋមន្រ្តី បន្តទៀតថា វិស័យសុខាភិបាលនាពេលបច្ចុប្បន្នមានការរីកចម្រើនគួរជាទីមោទនៈ ដូចជា​កំណើនចំនួនអ្នកជំងឺដែលបានប្រើប្រាស់សេវាសុខាភិបាល​នៅតាមសេវាសាធារណៈ ការ​បង្កើន​គុណភាពសេវាសុខាភិបាលតាមរយៈការចងក្រង ​និងការអនុវត្តស្តង់ដារ និងគោល​នយោបាយ​សុខាភិបាលក្នុងការលើកកម្ពស់ ​គុណភាព​ និងសុវត្ថិភាពរបស់អ្នកជំងឺ និងសមធ៌ម​សុខាភិបាលគ្របដណ្តប់ក្នុងព្រះរាជាណាចក្រកម្ពុជា ជាពិសេសក្នុងអំឡុងពេលមានការរាតត្បាត​ដោយជំងឺកូវីដ-១៩។

ក្រសួងសុខាភិបាលបា នប្រឹងប្រែង​អស់​ពី​កម្លាំងកាយ-ចិត្ត គ្រប់គ្រងគ្រឹះស្ថានសុខាភិបាលគ្រប់​កម្រិត​នៅទូទាំងព្រះរាជាណាចក្រកម្ពុជា ​គ្រប់គ្រងស្ថានភាពបានយ៉ាងល្អប្រសើរ ក្រោមការដឹកនាំ​ដ៏​ឈ្លាសវៃ និងប្រកបដោយគតិបណ្ឌិតរបស់ ​សម្ដេចអគ្គមហាសេនាបតីតេជោ ហ៊ុន សែន នាយករដ្ឋ​មន្ត្រី នៃព្រះរាជាណាចក្រកម្ពុជា ​ដែលជានិច្ចកាលតែងតែយកចិត្តទុកដាក់ និងបន្តធ្វើ​ឲ្យប្រសើរឡើង​នូវសុខភាពប្រកបដោយគុណភាព ​សុវត្ថិភាព ​និងសមធម៌របស់ប្រជាពលរដ្ឋ ដែលត្រូវទទួលបាន​ពី​សេវាសុខាភិបាល។ សមិទ្ធផលទាំងអស់នេះ ពិតជាបានចូលរួមចំណែកយ៉ាង​ធំធេង​ពីគិលានុបដ្ឋាកនៅគ្រប់កម្រិត ​នៅគ្រប់គ្រឹះស្ថានសុខាភិបាល។

ជាមួយគ្នានោះដែរ លោក នោ ហ្យន់ជូន (Rho Hyunjun) ប្រធានតំណាងទីភ្នាក់ងារសហប្រតិបត្តិការ​អន្តរជាតិកូរ៉េ (កយកា-KOICA) ប្រចាំនៅកម្ពុជា ​បានលើកឡើងដែរថា កយកា បាននិងកំពុងផ្តល់​គម្រោង និងកម្មវិធីជាច្រើនក្នុងវិស័យគ្រប់គ្រងធនធានទឹក ​និងសុខភាពសាធារណៈ ការអប់រំ កសិកម្ម ​និងការអភិវឌ្ឍន៍ជនបទ ​និងការដឹកជញ្ជូន ​ដែលមានតម្លៃប្រហែល ៣៣៦.៧ លានដុល្លារអាមេរិក ចាប់ពីឆ្នាំ ១៩៩១-២០២២។

ក្នុងចំណោមគម្រោង និងកម្មវិធីទាំងនោះ វិស័យអាទិភាពរបស់ កយកា-KOICA គឺវិស័យ​សុខាភិបាល​របស់​ប្រទេសកម្ពុជា ពីព្រោះការកែលម្អសុខភាពប្រជាជនមានអាទិភាពខ្ពស់​ក្នុង​ប្រទេសកម្ពុជា។

បន្ថែមពីលើនេះ ក្នុងឆ្នាំ២០២២នេះ កយកា-KOICA មានគម្រោងសាងសង់អគារមួយទៀតនៅ​ក្នុងមន្ទីរ​ពេទ្យ​កុមារជាតិ ហើយ កយកា-KOICA បានពិចារណាថា នឹងសាងសង់អគារមួយ​បន្ថែម​ទៀតនៅ​ក្នុងមន្ទីរពេទ្យបង្អែកដង្កោចាប់ពីឆ្នាំ២០២៤ តទៅ៕ អត្ថបទ រដ្ឋា