ព្រះសីហនុ៖ ព្រឹត្តិការណ៍តាំងពិរព័ណ៍​ផលិតផល និងសេវាកម្ម ដែលមានស្តង់តាំងទំនិញប្រមាណ ៣៥០ស្តង់ នៅក្នុងព្រឹត្តិការណ៍បុណ្យសមុទ្រនៅខេត្តព្រះសីហនុ ​បានចាប់ផ្តើមដំណើរការ នៅថ្ងៃទី៩ ខែធ្នូនេះ ក្នុងនោះទំនិញភូមិមួយផលិតផលមួយ ​ដែលផលិតដោយស្នាដៃកូនខ្មែរ ក៏បានចាប់ផ្តើម​ដំណើរការ ​ហើយគេរំពឹងថា ​នឹងមានភ្ញៀវបរទេសទិញ ដើម្បីនាំយកទៅលក់បន្តនៅក្រៅប្រទេស​កាន់​តែច្រើនឡើងវិញ។

អគ្គលេខាធិការរង គណៈកម្មាធិការជាតិជំរុញ ចលនា ភូមិមួយផលិតផលមួយ នៃទីស្តីការ​គណៈរដ្ឋមន្ត្រី ឯកឧត្តម សួង ណយ បានថ្លែងប្រាប់BTV ​នៅថ្ងៃទី៩ ខែធ្នូនេះថា នៅក្នុងព្រឹត្តិការណ៍​បុណ្យសមុទ្រ ​ដែលបានចាប់ផ្តើមនៅថ្ងៃនេះ ​គឺមានស្តង់តាំងបង្ហាញទំនិញ ​សេវាកម្ម សមិទ្ធផល​នានា​ជាតិអន្តរជាតិ ប្រមាណជាង៣៥០ស្តង់ ក្នុងនៅ ​មានស្តង់ចំនួន២០០ស្តង់ ជាស្តង់របស់​ភូមិមួយផលិតមួយ ​ដែលមានតាំងបង្ហាញទំនិញ ​និងសេវាកម្មដែលផលិតដោយស្នាដៃកូនខ្មែរ មកពី២៥រាជធានីខេត្តក្រុង។

បណ្តាតំណាងសិប្បកម្ម ​បានថ្លែងថា តាមរយៈពេលតាំងពិព័រណ៍​បុណ្យសមុទ្រនេះ​ គេរំពឹងថា គ្រប់​ផលិតផល និងសេវាកម្ម នៅក្នុងអំឡុងពេលនេះ នឹងទទួល​បានការគាំទ្រ​ពីភ្ញៀវបរទេសជាតិ​អន្តរជាតិ ​ជាពិសេស ​ជំរុញការនាំចេញ ​ផលិតផលទាំងនោះទៅលក់​នៅក្រៅប្រទេសឡើងវិញ ក្រោយបរិបទ កូវីដ១៩បានធូរស្រាល។

សូមបញ្ជាក់ថា ​បុណ្យសមុទ្រនៅខេត្តព្រះសីហនុ ​មាន​ស្តង់តាំង​ពិព័រណ៍​ជាង៣៥០ស្តង់ រួមមាន​ស្តង់តាមក្រសួងស្ថានប័ន​ ស្តង់ក្លឹបឆ្នេរស្អាត ​ស្តង់ផលិតផលក្នុងស្រុក​ ស្តង់​ស្ថានទូត​បរទេស ស្តង់​បង្ហាញភូមិម្ហូបអាហារ ​ស្តង់មហាវីថីអាហារខ្មែរ ស្តង់សហគ្រាស ​សំភារៈគ្រឿចក្រ​ សំលៀកបំពាក់ គ្រឿង​អេឡិចត្រូនិចជាច្រើនទៀត ​អមដោយព្រឹត្តិការណ៍បាញ់កាំជ្រួច​ ប្រគំដន្ត្រីខ្នាតធំ ​ប្រកួតកីឡា​៦ប្រភេទកីឡា ​និង​មាន​កម្មវិធីកម្សាន្តសប្បាយតូចៗ​ជា​ច្រើនទៀត ៕អត្ថបទ ស៊ុម សុខជា