កំពង់ស្ពឺ៖ បន្ទាប់ពីមើលឃើញព័ត៌មានតាមប្រព័ន្ធសង្គម រៀបរាប់យ៉ាងច្រើនអំពីកម្មការិនីកាត់ដេរឈ្មោះ សឿន ស្រីអូន អាយុ២២ឆ្នាំ ដែលជាស្ត្រីរងគ្រោះធ្ងន់ធ្ងរ ក្រោយពេទ្យនៃមន្ទីរសម្រាកព្យាបាល និងសម្ភពដើមអង្ក្រងកាយយកសាកសពទារកក្នុងផ្ទៃ ដោយទាំងពោះវៀនចេញមកក្រៅ ឯកឧត្តមឧ បនាយករដ្ឋមន្ត្រី ហោ ណាំហុង និងលោកលោកជំទាវកាលពីថ្ងៃទី៨ ខែធ្នូ ឆ្នាំ២០២២ បានអញ្ជើញទៅសួរសុខទុក្ខ លើកទឹកចិត្ត និងឧបត្ថម្ភថវិកាចំនួន ៤០លានរៀល ដល់ស្ត្រីរងគ្រោះរូបនេះ ដែលកំពុងសម្រាកព្យាបាល នៅមន្ទីរពេទ្យកាល់ម៉ែត្រ។
ឯកឧត្តមឧបនាយករដ្ឋមន្ត្រី ហោ ណាំហុង ក្នុងនាមប្រធានមូលនិធិ ហោ ណាំហុង-បូរី ហោ បានបរិច្ចាគថវិកា ៤០លានរៀលនោះ ជូនទៅគ្រួសារស្ត្រីរងគ្រោះ ដើម្បីសងបំណុលគេនៅក្នុងភូមិស្រុក និងដើម្បីចៀសវាងការខ្ចីធនាគារ ក៏ដូចជាបញ្ចាំទ្រព្យសម្បត្តិជាដើម ខណៈមន្ទីរពេទ្យកាល់ម៉ែត្រមិនយកថ្លៃព្យាបាល លើស្ត្រីរងគ្រោះរូបនេះទេ។
សូមជម្រាបថា មូលនិធិ ហោ ណាំហុង-បូរី ហោ បានចំណាយថវិកាកន្លងមកជួយសាងសង់អគារ ៣ខ្នង នៅខេត្តកំពង់ចាម សម្រាប់កុមារពិការនិងគថ្លង់ អស់ថវិកាជាង ២០ម៉ឺនដុល្លារអាមេរិក ជួយប្រចាំខែដល់បុរីទារក និងកុមារជាតិ គិតមកដល់ពេលនេះប្រមាណ ៣៤ម៉ឺនដុល្លារដុល្លារអាមេរិក។
បន្ថែមលើនេះ មូលនិធិនេះបានជួយដល់កុមារពិការផ្សេងៗ ប្រចាំខែអស់ថវិកា ៨៤.០០០ដុល្លារអាមេរិក ជាពិសេសជួយយុវជនយុវនារី ចំនួន២នាក់ នៅស្រុកសំឡូត ខេត្តបាត់ដំបង និងខេត្តកំពង់ធំ ដែលពិការដៃទាំងពីរ និងពិការជើងទាំងពីរ បានចូលរៀនមហាវិទ្យាល័យផងដែរ។
មូលនិធិ ហោ ណាំហុង-បូរី ហោ នឹងបន្តចូលរួមបន្តជួយសង្គមបន្ថែមទៀត ដើម្បីរួមចំណែកជាមួយរាជរដ្ឋាភិបាល ក្រោមការដឹកនាំសម្តេចតេជោ ហ៊ុន សែន ក្នុងការអភិវឌ្ឍប្រទេសជាតិ៕អត្ថបទ៖ ជា ធីរិទ្ធ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
