ភ្នំពេញ៖ អគ្គនាយនៃអគ្គនាយកដ្ឋានពន្ធដារថា ប្រព័ន្ធបច្ចេកវិទ្យាអនឡាញ បានចូលរួមចំណែកយ៉ាងសំខាន់ ដល់ប្រសិទ្ធភាព គណនេយ្យភាព និងមានតម្លាភាពនៃការប្រមូលពន្ធដោយការអនុវត្តបានយ៉ាងល្អប្រសើរ ទោះបីស្ថិតនៅក្នុងវិបត្តិការនៃរីករាលដាលជំងឺកូវីដ១៩ក៏ដោយ។

ឯកឧត្តម គង់ វិបុល រដ្ឋមន្ត្រីប្រតិភូអមនាយករដ្ឋមន្ត្រី និងជាប្រតិភូរាជរដ្ឋាភិបាលទទួលបន្ទុកជាអគ្គនាយក នៃអគ្គនាយកដ្ឋានពន្ធដារ លើកឡើងក្នុងវិបស្សនាស្តីពី វឌ្ឍនភាពនៃប្រព័ន្ធគ្រប់គ្រងទិន្នន័យ សម្រាប់ផ្តល់សេវាតាមអនឡាញ (e-Tax Services) នៅថ្ងៃទី៩ ខែធ្នូ ឆ្នាំ២០២២ នេះថា ដើម្បីពង្រីកប្រសិទ្ធភាពក្នុងការប្រមូលចំណូល អគ្គនាយកដ្ឋានបានគិតគូរដល់ការពង្រឹងប្រព័ន្ធបច្ចេកវិទ្យា (IT) ជាក់ស្តែងការធ្វើវិបស្សនាក្នុងថ្ងៃនេះ គឺដើម្បីប្រមូលនូវធាតុចូលពីអ្នកជាប់ពន្ធទាំងឡាយ ក្នុងគៅលដៅយកទៅកែលម្អ ឲ្យកាន់តែល្អប្រសើរ ប្រកបដោយស័ក្តសិទ្ធភាព និងប្រសិទ្ធភាព ក្នុងការទទួលប្រាក់ពន្ធ ក៏ដូចជាការបង់ពន្ធ, ហើយម្ស៉ាងទៀត ក៏ចង់ប្រមូលធាតុចូលពីអ្នកគ្រង់គ្រង មន្រ្តីពន្ធដារ និងអ្នកអនុវត្តផ្ទាល់ ដើម្បីយកបញ្ហាទាំងនេះទៅកែលម្អបន្ថែម។

ឯកឧត្តម បន្តថា ទាក់ទង់ការអភិវឌ្ឍផ្នែកបច្ចេកវិទ្យានេះ បន្ទាប់ពីការដាក់ឲ្យប្រើប្រាស់ប្រព័ន្ធអនឡាញ ក្នុងពេលបច្ចុប្បន្ននេះ អ្នកប្រើប្រាស់បានគាំទ្រយ៉ាងច្រើន ព្រោះការអនុវត្តតាមប្រព័ន្ធបច្ចេកវិទ្យា វាបានផ្តល់ភាពងាយស្រួលជាងការអនុវត្តដោយដៃ ដោយបំពេញតម្រូវការបានទាន់ចិត្ត និងបានកាត់បន្ថយពេលវេលា និងចំណាយផ្សេងៗ។ ដូច្នេះប្រព័ន្ធបច្ចេកវិទ្យានេះ វាមានគុណប្រយោជន៍ច្រើនសម្រាប់អ្នកជាប់ពន្ធ និងអ្នកគ្រប់គ្រង ។

ចំណែកការអនុវត្តប្រមូលចំណូលវិញ ប្រព័ន្ធបច្ចេកវិទ្យាអនឡាញពន្ធដារ បានចូលរួមចំណែកយ៉ាងសំខាន់ ដល់ប្រសិទ្ធភាព គណនេយ្យភាព និងមានតម្លាភាពនៃការប្រមូលពន្ធ ទោះបីស្ថិតនៅក្នុងវិបត្តិការនៃរីករាលដាលជំងឺកូវីដ១៩ក៏ដោយ។

​សូមបញ្ជាក់ថា៖ ជុំវិញការប្រមូលចំណូលនេះ នៅក្នុងរយៈពេល ១១ ខែ ឆ្នាំ ២០២២ អគ្គនាយកដ្ឋានពន្ធដារ ប្រមូលចំណូលពន្ធ-អាករគ្រប់ប្រភេទ បានចំនួនជាង ៣ ២០០ លានដុល្លារអាមេរិក ស្មើជិត ១១៤ ភាគរយ នៃច្បាប់ហិរញ្ញវត្ថុសម្រាប់ការគ្រប់គ្រងឆ្នាំ២០២២។ ចំពោះការប្រមូលចំណូលក្នុងឆ្នាំនេះដែរ ឯកឧត្តម គង់ វិបុល រដ្ឋមន្ត្រីប្រតិភូ រំពឹងថា ក្នុងបំណាច់ឆ្នាំ ២០២២ នេះ ចំណូលពន្ធនឹងអាចប្រមូលលើសផែនការជាង ២០ ភាគរយ៕អត្ថបទ៖ សុន រ៉ាឌី