​ភ្នំពេញ៖ ក្រសួងសង្គមកិច្ច អតីតយុទ្ធជន និងយុវនីតិសម្បទាន និងស្ថាប័នពាក់ព័ន្ធ កំពុងរៀបចំចង់ក្រង រួមទាំងប្រមូលនូវធាតុចូលនានា ដើម្បីធ្វើច្បាប់ស្តីពីមនុស្សចាស់ ដែលនឹងជួយការពារ និងលើកកម្ពស់សុខមាលភាពរបស់ពួកគាត់ ។

ក្នុងពិធីអបអរសាទរទិវាសិទ្ធិមនុ្សអន្ដរជាតិ១០ធ្នូ ក្រោមប្រធានបទ “ការគាំទ្រផ្នែកច្បាប់ស្តីពីសិទ្ធិសម្រាប់មនុស្សវ័យចាស់” មានការចូលរួមពីឯកឧត្តម ញ៉ែម ប៊ុនធឿន អគ្គនាយករងនៃគណៈកម្មាធិការសិទ្ធិមនុស្សកម្ពុជា រៀបចំដោយអង្គការមនុស្សចាស់កម្ពុជា នៅថ្ងៃទី៩ ខែធ្នូ ឆ្នាំ២០២២ លោក ស៊ុន ហៀង អនុប្រធាននាយកដ្ឋានមនុស្សចាស់ និងអតីតយុទ្ធជន លើកឡើងថា ទិវានេះផ្តោតសំខាន់ទៅលើការស្វែងយល់អំពីតម្រូវការ និងកំណត់នូវអាទិភាពសំខាន់ៗ របស់មនុស្សវ័យចាស់ពាក់ព័ន្ធ ទៅនឹងការគាំទ្រផ្នែកច្បាប់ សម្រាប់សិទ្ធិរបស់ពួកគាត់ ដើម្បីជាធាតុចូលសម្រាប់ក្រសួងជំនាញ និងស្ថាប័នពាក់ព័ន្ធក្នុងការពិចារណា ឬគិតគូរនៅក្នុងដំណាក់កាល នៃការរៀបចំច្បាប់ស្តីពី សិទ្ធិមនុស្សចាស់នៅជំហ៊ានបន្ទាប់ ។

លោកបានបន្តថា ច្បាប់ស្ដីពីមនុស្សចាស់នឹងត្រូវបង្កើតឡើង ដើម្បីធានាដល់សិទ្ធិទទួលបានសន្ដិសុខផ្នែកហិរញ្ញវត្ថុ លទ្ធភាពទទួលបានសេវាសុខភាព ការការពារពីការរំលោភបំពាន និងអំពើហិង្សាការលុបបំបាត់ការរើសអើង ចំពោះមនុស្សចាស់ និងសិទ្ធិដទៃទៀត ហើយសេចក្ដីព្រាងច្បាប់នេះ មានចំនួន១០ជំពូក និង៧៤មាត្រា ដែលសុទ្ធសឹងតែការការពារ និងលើកកម្ពស់សុខុមាលភាពមនុស្សវ័យចាស់ ។ 

អ្នកស្រី អ៊ុក លក្ខិណា តំណាងអង្គការមនុស្សចាស់កម្ពុជា បានឲ្យដឹងថា យោងតាមលទ្ធផលនៃវេទិកាមនុស្សវ័យចាស់ថ្នាក់ជាតិលើកទី១ និងលើកទី២ កាលពីដើមឆ្នាំ២០២១ និងនៅក្នុងអំឡុងខែកញ្ញា ឆ្នាំ២០២២ ដែលមានតំណាងមនុស្សវ័យចាស់ចូលរួមពី២៥រាជធានី-ខេត្ត បានរួមគ្នាលើកឡើងនូវតម្រូវការជាអាទិភាពមួយចំនួន ដែលក្នុងនោះរួមមាន ទាំងតម្រូវការច្បាប់ ដើម្បីគាំពារ និងលើកកម្ពស់សិទ្ធិសម្រាប់ពួកគាត់នៅក្នុងវ័យចាស់ ដែលជាតម្រូវការមួយក្នុងចំណោមតម្រូវការដ៏ចាំបាច់នានារបស់ពួកគាត់ ក្នុងការទទួលបាននូវសេចក្តីថ្លៃថ្នូរ និងសុខុមាលភាពក្នុងការរស់នៅរបស់ពួកគាត់ក្នុងសង្គម ។ 

អ្នកស្រីបន្តថា នៅកម្ពុជាបើទោះជាមិនទាន់មានសេចក្តីរាយការណ៍ជាផ្លូវការណាមួយ អំពីការរំលោភសិទ្ធិមនុស្សវ័យចាស់ ប៉ុន្តែកម្ពុជាក៏ពុំទាន់មានច្បាប់ ឬបទដ្ឋានគតិយុទ្ធ ឬយន្តការជាក់លាក់ដើម្បីគាំទ្រ និងដោះស្រាយនូវបញ្ហាទាំងនេះនៅឡើយ ។

យោងតាមគោលនយោបាយជាតិស្តីពីមនុស្សវ័យចាស់ ឆ្នាំ២០១៧-២០៣០ បានលើកពីបញ្ហា និងកំណត់នូវអាទិភាពមួយ (អាទិភាពទី៧) ដែលបង្ហាញពីតម្រូវការលើការបង្ការមនុស្សវ័យចាស់ពីការរំលោភបំពាន និងអំពើហឹង្សា ។ គោលនយោបាយនេះ ក៏បានចង្អុលបង្ហាញពីតម្រូវការ និងសកម្មភាពបន្ទាប់ដែលកម្ពុជាគួរអនុវត្តចំនួន៧ ដែលក្នុងនោះរួមទាំងការរៀបចំច្បាប់មនុស្សវ័យចាស់ ដើម្បីធានានូវប្រសិទ្ធិភាពនៃការការពារ ឲ្យបានល្អដូចដែលបានធ្វើឡើងនៅប្រទេសនានានៅក្នុងប្រទេសសមាជិកអាស៊ានផងដែរ ៕ អត្ថបទ បាន សុខរិទ្ធិ