ភ្នំពេញ៖ ក្រុមប្រឹក្សាជាតិគាំពារសង្គម រៀបចំធ្វើសន្និសីទសារព័ត៌មាន ស្តីពីយន្តការ និងនីតិវិធី នៃការអនុវត្តកម្មវិធីឧបត្ថម្ភសាច់ប្រាក់ជូនគ្រួសារងាយរងហានិភ័យ ក្នុងអំឡុងពេលមានសម្ពាធអតិផរណា និងកម្មវិធីជំនួយសង្គមជាសាច់ប្រាក់ ជូនគ្រួសារងាយរងហានិភ័យ ដែលរងផលប៉ះពាល់ធ្ងន់ធ្ងរពីគ្រោះទឹកជំនន់។

នៅព្រឹកថ្ងៃទី១០ធ្នូ ឆ្នាំ២០២២នេះ ក្រុមប្រឹក្សាជាតិគាំពារសង្គម រៀបចំធ្វើសន្និសីទសារព័ត៌មាន ស្តីពីយន្តការ និងនីតិវិធី នៃការអនុវត្តកម្មវិធីឧបត្ថម្ភសាច់ប្រាក់ជូនគ្រួសារងាយរងហានិភ័យ ក្នុងនោះចំពោះដាក់ឱ្យដំណើរការ “កម្មវិធីឧបត្ថម្ភសាច់ប្រាក់ជូនគ្រួសារងាយរងហានិភ័យ ក្នុងអំឡុងពេលមានសម្ពាធអតិផរណា” បើតតាមសាលិខិតរបស់រាជរដ្ឋាភិបាល គ្រួសារដែលរងគ្រោះត្រូវបានកំណត់អត្តសញ្ញាណដោយក្រសួងផែនការ នឹងត្រូវទទួលបានការឧបត្ដម្តសាច់ប្រាក់ចំនួន ៣លើក៖ លើកទី១ ចាប់ពីថ្ងៃទី១០ ខែធ្នូ ឆ្នាំ២០២២, លើកទី២ នៅថ្ងៃទី ១០ ខែមេសា ឆ្នាំ២០២៣ និងលើកទី៣ នៅថ្ងៃទី ១០ ខែកក្កដា ឆ្នាំ២០២៣។

ចំពោះកម្មវិធីឧត្ថម្ភសាច់ប្រាក់ដែលត្រូវទទួលបាន ក្នុងនោះចំពោះគ្រួសារនៅរាជធានីភ្នំពេញ ទទួលបាន ៩៩ ៩០០ រៀល និងសមាជិកបន្ថែមក្នុងម្នាក់ៗ ទទួលបាន ២៨ ០០០រៀល។ ចំណែកទីប្រជុំជន គ្រួសារទទួលបាន ៨៧ ៣០០រៀល សមាជិកបន្ថែមក្នុងម្នាក់ៗ ២៤ ០០០រៀល និងជនបទ គ្រួសារទទួលបាន ៨១ ៣០០រៀល និងសមាជិកបន្ថែមក្នុងម្នាក់ៗ ២០ ០០០រៀល។

ដោយឡែកកម្មវិធីជំនួយសង្គមជាសាច់ប្រាក់ ជូនគ្រួសារងាយរងហានិភ័យ ដែលរងផលប៉ះពាល់ធ្ងន់ធ្ងរពីគ្រោះទឹកជំនន់, បើតាមសាលិខិតរបស់រាជរដ្ឋាភិបាលដ៏ដែល, ការដាក់ឲ្យដំណើរកម្មវិធីជំនួយសង្គមជាសាច់ប្រាក់ ជូនគ្រួសារងាយរងហានិភ័យ ដែលរងផលប៉ះពាល់ធ្ងន់ធ្ងរពីគ្រោះទឹកជំនន់ ត្រូវសម្រេចវិសាលភាពនៅក្នុងតំបន់ភូមិសាស្ត្រគោលដៅនៃរាជធានីភ្នំពេញ, ខេត្តកណ្តាល, ខេត្តតាកែវ, ខេត្តពោធិ៍សាត់, ខេត្តបាត់ដំបង, ខេត្តបន្ទាយមានជ័យ, ខេត្តសៀមរាប, ខេត្តកំពង់ធំ, ខេត្តកំពង់ចាម, ខេត្តត្បូងឃ្មុំ,ខេត្តក្រចេះ, ខេត្តកំពង់ឆ្នាំង, ខេត្តព្រៃវែង, ខេត្តកំពត, ខេត្តស្វាយរៀង, និងខេត្តឧត្តរមានជ័យ។ តំបន់ភូមិសាស្ត្រគោលដៅនៃរាជធានី ខេត្តខាងលើ ត្រូវបានកំណត់ក្នុងឧបសម្ព័ន្ធនៃសេចក្តីសម្រេចនេះ។

ចំពោះគោលដៅដែលបានកំណត់ខាងលើ នឹងត្រូវទទួលបានការឧបត្ថម្ភសាច់ប្រាក់រួមមាន៖ គ្រួសារ ៨០ពាន់រៀល, សមាជិកគ្រួសារក្នុងម្នាក់ៗ ១៦ពាន់រៀល, កុមារអាយុក្រោម ៥ឆ្នាំ ១៦ពាន់រៀល, ជនពិការភាពក្នុងម្នាក់ ១៦ពាន់រៀល និងមនុស្សចាស់ចាប់ពីអាយុ ៦០ឆ្នាំឡើង ទទួលបាន ១៦ ពាន់រៀលផងដែរ។ កម្មវិធីជំនួយសង្គមជាសាច់ប្រាក់ ជូនគ្រួសារងាយរងហានិភ័យ ដែលរងផលប៉ះពាល់ធ្ងន់ធ្ងរពីគ្រោះទឹកជំនន់ ត្រូវអនុវត្តការបើកផ្ដល់ជូនមួយខែម្តង សម្រាប់រយៈពេល ៣ ខែ ចាប់ពីខែធ្នូ ឆ្នាំ២០២២ តទៅ៕ អត្ថបទ៖ សុន រ៉ាឌី​