ព្រះសីហនុ៖ សម្តេចតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា នៅតែរម្លឹកផ្តាំ​ផ្ញើ​ឱ្យ​ប្រជាពលរដ្ឋកម្ពុជាបន្តរួបរួមគ្នា ដើម្បីរក្សាការពារនូវសន្តិភាព ដែលយើង រកបានទាំងលំបាក និងមិនត្រូវឱ្យប្រទេសណាមួយ ឬ ក្រុមណាមួយមកបំផ្លាញ សន្តិភាពនៅក្នុងប្រទេសនេះទេ ទោះក្នុងតម្លៃណាក៏ដោយ ។

សម្តេចតេជោ នាយករដ្ឋមន្ត្រី​នៅ​តែ​បញ្ជាក់​អំពី​កត្តាសន្តិភាព​ជា​អាទិភាព នៃ​ការ​អភិវឌ្ឍ​លើ​គ្រប់​វិស័យ​ ខណៈ​អញ្ជើញជាអធិបតីដ៏ខ្ពង់ខ្ពស់ថ្លែងបើកបុណ្យសមុទ្រលើកទី ៩ ជុំទី ៣ ក្រោម​ប្រធាន​បទ​៖ “ឆ្នេរនៃសន្តិភាព ឆ្នេរនៃក្តីសង្ឃឹម នៅខេត្តព្រះសីហនុ នាល្ងាចថ្ងៃទី១០ខែធ្នូនេះ។

សម្តេចតេជោបានថ្លែងថា៖ដូចដែលសម្តេចបានលើកឡើងនាឱកាសពិធីបើកមហាសន្និបាតព្រឹកមិញ​ម្តង​ហើយថាយើងត្រូវ រក្សាវត្តមានជាអចិន្ត្រៃយ៍នៃសន្តិភាព ដែលជា​ចំណុច​ធំជាង​គេ​ក្នុង​ចំណោម​ចំណុច ដែលទាក់ទងជាមួយការអភិវឌ្ឍ នៃបណ្តាប្រជាជាតិនៅលើសកលលោក។

សម្តេចបានបន្តថា នៅចំពោះវត្តមានរបស់ថ្នាក់ដឹកនាំ និង សមាជិកក្លឹបឆ្នេរសមុទ្រ​ដែល​ស្អាត​បំផុតលើសកលលោក, សម្តេចក៏សូមស្នើជាថ្មីម្ដងទៀតឱ្យអាជ្ញាធរខេត្តតំបន់ឆ្នេរសមុទ្រទាំង ៤ រួម ជាមួយ​បងប្អូនប្រជាពលរដ្ឋក្នុងខេត្តទាំង ៤ ត្រូវរួបរួមគ្នារក្សាឱ្យបាននូវកិត្តិនាមជា សមាជិកក្លឹប​ឆ្នេរ​សមុទ្រ​ដែលស្អាតបំផុតលើសាកលលោក និង ឱ្យស័ក្តិសមជាមួយ នឹងការទទួល​បាន​នូវ​កិត្តិនាម​ជា “តារារះនាទិសនិរតី» ។

ក្រសួង-ស្ថាប័នពាក់ព័ន្ធ ត្រូវបន្តផ្តល់អាទិភាពដល់ការអភិវឌ្ឍតំបន់ឆ្នេរ, ការកសាង ហេដ្ឋា​រចនា​សម្ព័ន្ធ​ចាំបាច់​បម្រើឱ្យវិស័យទេសចរណ៍ និង ការតភ្ជាប់ពីតំបន់មួយទៅ តំបន់មួយ ទាំងការ​តភ្ជាប់​តាម​ផ្លូវ​គោក និង តាមផ្លូវដែក និង តាមផ្លូវអាកាស ។ ត្រូវជំរុញ​ការ​ផលិត ដើម្បីផ្គត់ផ្គង់​ដល់​ទេសចរ​ដែលជាទិសដៅ «នាំចេញនៅនឹងកន្លែង» ។ ប្រជាពលរដ្ឋរបស់យើង​មាន​ឱកាស​ច្រើន​ណាស់ ដើម្បីចិញ្ចឹម និង បំពេញតម្រូវការរបស់ភ្ញៀវទេសចរអន្តរជាតិ ដែលកំពុង​ត្រលប់​មក​កម្ពុជា​វិញ​ជា​បណ្តើរៗ រួមជាមួយនឹងទេសចរក្នុងស្រុករាប់លាននាក់ផងដែរ ។ យើងត្រូវ​ខិតខំ​ជំរុញ​ការ​ផលិត ឱ្យត្រឹមត្រូវតាមស្តង់ដារបម្រើឱ្យវិស័យទេសចរណ៍, ពិសេសត្រូវបង្កើតឱ្យមានខ្សែក្រវាត់ បៃតង​នៅ​ក្នុងតំបន់ទេសចរណ៍ ។ ត្រូវបន្តយក​ចិត្តទុកដាក់ខ្ពស់ក្នុងការថែរក្សាសន្តិសុខ និង សណ្តាប់ធ្នាប់ ។ សន្តិភាព ជាក្របខណ្ឌម៉ាក្រូ ឯបញ្ហាសន្តិសុខសណ្តាប់ធ្នាប់សង្គម វាជាក្របខណ្ឌ​ម៉ាក្រូ​ផង និង មីក្រូផង ។ ក្នុងន័យនេះ, តំបន់ទេសចរណ៍ទាំងអស់មិនគ្រាន់តែខេត្តព្រះសីហនុ តែ​តាម​បណ្តាខេត្តជាប់មាត់សមុទ្រ និង គ្រប់ទីកន្លែង ដែលមានភ្ញៀវទេសចរទៅ គឺ ត្រូវខិតខំ​រក្សា​ឱ្យ​បាន​នូវ​សន្តិសុខ និង សណ្តាប់ធ្នាប់សង្គម ។

សម្តេចបាន​អំពាវនាវដល់ក្រសួង-ស្ថាប័ន្តែពាក់ព័ន្ធ, អាជ្ញាធរគ្រប់លំដាប់ថ្នាក់, កងកម្លាំង ប្រដាប់​អាវុធ​គ្រប់​ប្រភេទ, បងប្អូនជនរួមជាតិទាំងអស់ និង វិស័យឯកជន ចូលរួមឱ្យ បានផុស​ផុល​ប្រកប​ដោយ​ស្មារតី​ទទួលខុសត្រូវខ្ពស់ ធ្វើឱ្យពិធីបុណ្យសមុទ្រនៅឆ្នាំនេះ ប្រកបដោយភាពជោគជ័យ និង ចូលរួមឱ្យកាន់តែសកម្មក្នុងចលនាប្រឡងប្រណាំង «ទីក្រុងស្អាត, រមណីយដ្ឋានស្អាត, សេវាល្អ, បដិសណ្ឋារកិច្ចល្អ» និង សហការថែរក្សា សោភ័ណភាព, អនាម័យ និង បរិស្ថាន ដែល​ជា​​កត្តាចម្បងមិនអាចខ្វះបាន ក្នុង ការថែរក្សាតំបន់ឆ្នេរសមុទ្រឱ្យស្រស់ស្អាតយូរអង្វែង ដើម្បី​បន្ត​ជា​មរតកដ​ល់កូនចៅ ជំនាន់ក្រោយ ៕ អត្ថបទ៖ មុត សុទ្ធ