កំពង់ចាម៖ ប្រជាពលរដ្ឋស្រុកកំពង់សៀម សាទរចំពោះសមិទ្ធផលថ្មី ផ្លូវកៅស៊ូ មួយខ្សែ​បាន​ផ្តល់​សារៈសំខាន់ និងផ្តល់ភាពងាយស្រួលក្នុងការធ្វើដំណើរ ។

ពលរដ្ឋដែលរស់នៅក្នុងឃុំទ្រាន ស្រុកកំពង់សៀម ខេត្តកំពង់ចាម ពិតជាសប្បាយរីករាយ ខណៈ​ទទួល​បានសមិទ្ធផលថ្មីពីរាជរដ្ឋាភិបាល គឺផ្លូវកៅស៊ូមួយខ្សែជាង៤គីឡូ ចំណែក​ឆ្នាំ​ក្រោយ​នឹង​ទទួល​បាន​ផ្លូវកៅស៊ូដែល តភ្ជាប់ទៅដល់ឃុំស្រកមួយខ្សែទៀត។ ពលរដ្ឋ រស់នៅតំបន់​នោះ​បាន​បន្ត​ទៀត​ថា ពីមុនផ្លូវដី ស ហ៊ុយផង ជង្ហុកផង ពេលមេឃ​ភ្លៀង​ម្តង​ៗ​តែង​តែ​រអិល​ពិបាក​ធ្វើ​ដំណើរ ហើយត្រូវចំណាយពេលវេលាយូរ។

លោក ម៉ែន សារ៉ុន ជាមេឃុំទ្រាន នៃស្រុកកំពង់សៀម បានបញ្ជាក់ឲ្យBTVដឹងដែរថា ក្រោយពី​ប្រមុខ​រាជរដ្ឋាភិបាល បានកសាង អភិវឌ្ឍន៍ តំបន់នេះឲ្យមានសភាពអ៊ូអរ និងជឿនលឿនជាងមុន ទាំង​ហេដ្ឋារចនាសម្ពន្ធ៍មាន ផ្លូវថ្នល់ ប្រព័ន្ធភ្លើង ទឹកស្អាត សាលារៀន និងវត្តអារាមជាដើម។

លោកមេឃុំទ្រានរូបនេះបានឲ្យដឹងទៀតថា បច្ចុប្បន្ន ក្រសួងសាធារណៈការ និងដឹកជញ្ជូន បាន​កសាង​ផ្លូវកៅ DBST ប្រវែង៤៨៥០ម៉ែត្រភ្ជាប់ ព្រលានយន្តហោះឃុំរអាង ដល់មុខសាលាឃុំទ្រាន រួចរាល់ហើយ ហើយគម្រោងឆ្នាំ២០២៣ តាមរយៈក្រសួងអភិវឌ្ឍន៍ជន បានស្ថាបនាផ្លូវ បេតុង និង​កៅស៊ូ ប្រវែងជាង១៤គីឡូម៉ែត្រ ដែលតភា្ជប់ពីមុខសាលាឃុំទ្រាន រហូតដល់ រង្វង់​មូល​ឃុំ​ស្រក នៃស្រុកកំពង់សៀម ។ ជាមួយគ្នានេះដែរ អាជ្ញាធរ​ស្នើសុំ​ឲ្យ​បង​ប្អូន​ប្រជាពលរដ្ឋ​ដែល​រស់​នៅ​អម​សង​ខាងផ្លូវ មេត្តាយោគយល់ និងអធ្យាស្រ័យ ប្រសិនបើ​មាន​ការ​ប៉ះពាល់​ដោយ​កត្តា​ណា​មួយ​៕ អត្ថបទ៖ សីហា