ព្រះសីហនុ៖ គណៈប្រតិភូក្លឹមឆ្នេរសមុទ្រ ដែលស្អាតជាងគេលើពិភពលោកជាង ១០០នាក់ ចម្រុះជាតិសាសន៍ បាន​អញ្ជើញ​ចូលរួមពិធីដាំដើមកូនកោងកាងជាង ៣.០០០ដើម ជាមួយអាជ្ញាធរ និងប្រជាពលរដ្ឋ នៅភូមិតាពៅ ឃុំតានៃ ស្រុកព្រៃនប់ ខេត្ដព្រះសីហនុ ថ្ងៃទី១១ ខែធ្នូ ឆ្នាំ២០២២។

ព្រៃកោងកាង គឺជាសម្ភពមច្ឆាជាតិ ជាជម្រកជីវៈចម្រុះ ដែលជាប្រយោជន៍មានសារៈសំខាន់សម្រាប់ប្រជាពលរដ្ឋ និង​ប្រជាសហគមន៍នេសាទនៅក្នុងតំបន់ អេកូទេសចរណ៍ ដែលមានសារៈប្រយោជន៍សម្រាប់បរិស្ថាន មនុស្សជាតិ និង​ជួយទប់ទល់នឹងការប្រែប្រួលអាកាសធាតុ ។ល។

ជាមួយនឹងសារៈប្រយោជន៍ព្រៃកោងកាង និងការដាំ​ដើម​ឈើជា​មួយ​នឹងគណៈប្រតិភូជាតិ និងអន្ដរជាតិ ដែល​បាន​បង្ហាញ​ពី​កិច្ច​សាមគ្គីគ្នា​ក្នុង​ការ​រួម​គ្នា​ការ​ពារ​បរិស្ថាន​ធម្មជាតិ ឯកឧត្ដម គួច ចំរើន អភិបាល នៃ​គណៈ​អភិបាល​ខេត្ដ​ព្រះសីហនុ បាន​ប្ដេជ្ញា​ចិត្ដ​ម៉ឹង​ម៉ាតថែរក្សាការពារព្រៃកោងកាងនេះឱ្យបានគង់វង្ស សម្រាប់​ជា​ប្រយោជន៍​រួម​ក្នុង​សហគមន៍​។

ជាមួយគ្នានោះ ភ្ញៀវបរទេស នៃគណៈប្រតិភូក្លឹមឆ្នេរសមុទ្រ ដែល​ស្អាត​ជាង​គេ​លើ​ពិភព​លោក គឺបានបង្ហាញក្ដី​រីករាយ​ចំពោះ​ការ​ដាំដើមកូនកោងកាងនេះ ហើយ​លើក​ឡើង​ពី​សារៈ​ប្រយោជន៍​ព្រៃ​កោង​កាងនេះ ស្រដៀងទៅ​នឹង​ខ្លឹមសារ​ឯកឧត្ដម​អភិបាលខេត្ដព្រះសីហនុដែរ ។

សូមបញ្ជាក់ថា ខេត្ដព្រះសីហនុ មានព្រៃលិចទឹក និងព្រៃកោងកាងសរុបជាង ១ម៉ឺនហិកតា ហើយនៅសល់ទំហំជាង ៩ពាន់​ហិកតា សម្រាប់ឆ្នាំ២០២០ ហើយ​ក៏​ត្រូវ​បាន​រង​នូវ​ការ​រិច​រិល​បាត់​បង់​ដោយ​សារ​ការ​កាប់​ទន្ទ្រាន​កាន់​កាប់​ដី​ធ្វើ​ជា​កម្ម​សិទ្ធិ​ឯក​ជនខ្លះ និងដោយសារការអភិវឌ្ឍខ្លះ ទន្ទឹមនឹងនោះ មន្ទីរសាមី និងអាជ្ញាធរ ក៏​បាន​ធ្វើ​ការ​ដាំដើម​កូន​កោង​កាង​ជួស ឬដាំស្ដារឡើងវិញមួយចំនួនផងដែរ ។ នេះជាការបញ្ជាក់បន្ថែមពី លោក ឯម ភា នាយ​ខណ្ឌ​រដ្ឋបាល​ជល​ផល​កំពង់សោម៕ អត្ថបទ​៖ គង់ ប៊ុនថា