ព្រះសីហនុ៖ នៅក្នុងព្រឹត្តិការណ៍តាំងពិព័រណ៌អបអរសាទរបុណ្យសមុទ្រនៅខេត្តព្រះសីហនុ ក្រៅពីមាន​ការ​តាំង​ពិព័រណ៍ទំនិញភូមិមួយ ផលិតផលមួយ និងតាំង​បង្ហាញ​សមិទ្ធ​ផល​នានា​របស់​រាជ​រដ្ឋាភិបាល​កម្ពុជា និងស្ថានទូតបរទេសនានានៅកម្ពុជា ក៏​មាន​តាំង​ពិព័រណ៍​វិថី​ម្ហូប​អាហារ​ខ្មែរ​ប្រចាំ​តំបន់​នានា​នៅ​កម្ពុជា ហើយមានការទាក់ទាញភ្ញៀវទេសចរជាតិអន្តរជាតិចូលទស្សនា និង​ភ្លក់​រសជាតិ​អាហារ​ចំអិន​ដោយ​ស្នាដៃ​កូនខែ្មរ​។

បើតាមអ្នកផលិតផលកសិកម្ម និងអ្នកចំអិនអាហារខ្មែរ នៅក្នុង​ព្រឹត្តិការណ៍​តាំង​ពិព័រណ៍​វិថី​ម្ហូប​អាហារ​បុណ្យ​សមុទ្រ​ ឆ្នាំ២០២២នេះថា នៅក្នុងដំណើរការតាំងពិព័រណ៍ចំណីអាហារប្រពៃណីខ្មែរ ក្នុង​រយៈ​ពេល​២​ថ្ងៃ​នេះ គឺមានភ្ញៀវទេសចរជាតិអន្តរជាតិ ច្រើនកុះករចូលភ្លក់អាហារ និងលក់ដាច់ខ្លាំង ជាពិសេស​អាហារ​គ្រឿ​ងសមុទ្រ នៅខេត្តព្រះសីហនុ ដែលគេសង្កេតឃើញថា ភ្ញៀវដែលចូលពិសាររួចម្តងហើយ គេ​ម​ក​ពិសារ​ម្តងទៀត។

ចំណែកឯភ្ញៀវទេសចរបរទេសឲ្យដឹងថា នៅក្នុងដំណើរមកទស្សនាកម្ពុជា ជាពិសេសកា​រ​ចូល​រួម​ទស្សនា​បុណ្យ​សមុទ្រ​នៅ​ខេត្តព្រះសីហនុ មានភាពសប្បាយរីករាយ ជាពិសេសនោះគឺមានម្ហូបអាហារខ្មែរជាច្រើន ត្រូវ​គេ​រៀបចំចំអិន ដាក់តាំងបង្ហាញ ហើយមានរសជាតិឆ្ងាញ់ ពលរដ្ឋអ្នកលក់ អ្នកចំអិន មានភាពរាក់ទាក់​។

បើតាមឯកឧត្តម ថោង ខុន រដ្ឋមន្ត្រីក្រសួងទេសចរណ៍ បានថ្លែងថា នៅ​ក្នុង​ព្រឹត្តិការណ៍​តាំង​ពិព័រណ៍​អបអរ​សាទរ​ព្រឹត្តិការណ៍​បុណ្យសមុទ្រជុំទី៣ លើកទី៩ ឆ្នាំ២០២២នៅខេត្តព្រះសីហនុ មានតង់ពិព័រណ៍ចំនួន ៣៦១​ស្តង់ ហើយការតាំងពិព័រណ៌វិថីម្ហបអាហារ ត្រូវបាន​លើក​ទឹក​ចិត្ត​ឲ្យ​ដាក់​តាំង​ដើម្បី​បង្ហាញ​ជូន​ភ្ញៀវ​ទេសចរ​មក​ទស្សនា ក៏ដូចជាការបង្កើតភាពទាក់ទាញទេសចរជាតិអន្តរជាតិ មកទស្សនាកម្ពុជា ហើយ​ចង់​មក​ទស្សនា​ម្តង​ទៀត និងចង់មកភ្លក់ម្ហូបអាហារប្រពៃណីខ្មែរ៕ អត្ថបទ៖ ស៊ុម សុខជា