​បាល់ទាត់៖ ​សង្គម​បាល់ទាត់​នៅ​តំបន់​អឺរ៉ុប​ កំពុង​ស្ថិតក្នុង​ផ្លូវ​បែកបាក់​ប្រេះឆាបន្ទាប់ពី​ក្លិប​ធំៗ​នៅ​អឺរ៉ុប ១២ យល់ព្រម​ចូលរួមប្រកួត​ពាន European Super League​។ ​ប្រធាន​ក្លឹប Real Madrid លោក Florentino Perez គឺជា​អ្នក​ផ្ដួចផ្ដើម​បង្កើត​ពានរង្វាន់​នេះ​ឡើង ជាមួយ​ក្លឹប​យក្ស​នៅ​អឺរ៉ុប​ផ្សេងទៀត​ដូចជា Barcelona, Atletico Madrid, AC Milan, Inter, Juventus, Arsenal, Chelsea, Liverpool, Manchester City, Manchester United និង Tottenham Hotspur ដែលជា​សមាជិក​។​

​​ដោយឡែក​ក្លិប​យក្ស​អាល្លឺម៉ង់​ទាំងពីរ Bayern Munich និង Borussia Dortmund ក៏ដូចជា​ក្លិប​ជើងឯក​បារាំង Paris Saint Germain បាន​បដិសេធ​មិន​ចូលរួម​។ ​​អ្វី​ដែលជា​ដើមទង​ក្នុងការ​បង្កើតអោយមាន European Super League ដែល​រួមគ្នា​បង្កើត​ដោយ​ក្លិប​ទាំង ១២ ខាងលើ​? ​​អ្នកវិភាគ​បាល់ទាត់​មួយចំនួន​បានលើកឡើង​ស្រដៀង​គ្នា ស្របពេល​អ្នកសារព័ត៌មាន​កីឡា​ប្រចាំ​ទូរទស្សន៍ Sky Sport អង់គ្លេស​លោក Kaveh Solhekol បាន​និយាយថា មូលហេតុ​មាន តែមួយគត់ ហើយក៏​មិនមាន​មូលហេតុ​អ្វី​ផ្សេង​លើសពី​នេះដែរ គឺ​បញ្ហា​លុយ​។ ​​ម្ល៉ោះហើយ​ក្លិប​ធំៗ​ទាំងអស់​ដែលមាន​មុខ​នៅ UEFA Champions League ស្ទើរ​គ្រប់​រដូវ​កាល​បាន​មូលមតិ​គ្នា បង្កើតអោយមាន​ពាន Super League នេះ​ឡើង​។ ​​ជាធម្មតា​ឧទាហរណ៍​ដូចជា Manchester United ពេល​ពួកគេ​លេង​នៅ Champions League គឺ​បាន​ប្រាក់ចំនូល​ប្រហែល ៤០ ទៅ ៨០ លាន​ផោន​ប៉ុណ្ណោះ​ទៅតាម​កំរិត​ជោគជ័យ​នៃ​រដូវ​កាល​នីមួយៗ​។

​​តែ​ប្រសិនបើ​ពួកគេ​បង្កើតពាន​ដោយ​ខ្លួនឯង មិន​ជ្រក​ក្រោម​ការគ្រប់គ្រង​របស់ UEFA ពួកគេ​នឹង​អាច​រកប្រាក់​ចំនូល​បាន​ចន្លោះ​ពី ២៥០ ទៅ ៣០០លាន​ផោន​ក្នុង​មួយ​រដូវ​កាល ​ពោលគឺ​គុណ​នឹង ៣ ឯណោះ​។ ​គិត​ត្រឹម​ការលក់​សិទ្ធិ​ផ្សាយ​ផ្ទាល់​របស់​ក្លិប​ដោយ​ខ្លួនឯង​ ទៅអោយ​ក្រុមហ៊ុន​ទូរទស្សន៍​ទូទាំង​សកលលោក ក៏​ក្លិប​នីមួយៗ​នឹង​អាច​បាន​ប្រាក់ចំណូល​ពី ២០០ ទៅ ២៥០លាន​ផោន​ដែរ​ក្នុង​មួយ​រដូវ​កាល​។ ​​តែ​អ្វី​ដែលជា​ការប៉ះទង្គិច​នោះ​គឺ European Super League នឹងមាន​កាល​វិភា​គប្រ​កួត​ពាក់កណ្តាល​សប្តាហ៍​ដូច UEFA Champions League រឺ UEFA Europa League ដែរ​។ ​​មិនតែប៉ុណ្ណោះ អ្នកគាំទ្រ​ភាគច្រើន​បាន​សំដែង​ការមិន​ពេញចិត្ត​ចំពោះ​ការបង្កើត​រឿង Super League នេះឡើយ ជាក់ស្តែង​ការប្រកួត​យប់មិញ​រវាង Leeds United និង Liverpool មាន​កីឡាករ​របស់ Leeds ម្នាក់​សរសេរ​ពាក្យ​នៅ​ខ្នង​អាវ​ថា “​បាល់ទាត់​គឺ​សម្រាប់​អ្នកគាំទ្រ​”​។ ស្រដៀង​គ្នា​នេះដែរ​ខ្សែបំរើ Liverpool, James Milner បាន​និយាយថា “​គេ​មិន​ចូលចិត្ត Super League អី​នោះទេ ហើយ​សង្ឃឹមថា​វា​នឹង​មិនអាច​កើតមានឡើង​”​។​ ​​អំឡុង​ការប្រកួត​នោះដែរ​ក៏មាន​យន្តហោះ ហោះ​កាត់​កីឡដ្ឋាន Elland Road របស់ Leeds ដែរ​ដោយបាន​បង្ហោះសារ​ប្រឆាំងនឹង Super League​។

​​មិនទាន់​អស់​ទេ អ្នកគាំទ្រ Liverpool នៅក្រៅ​កីឡដ្ឋាន​ក៏បាន​នាំគ្នា​ដុត​អាវ Liverpool ដែរ​ក្នុង ការសំដែង​ការមិន​ពេញចិត្ត​ដែល Liverpool ក្លាយជា​ផ្នែក​មួយ​នៃ Super League​។ ​​នៅពេលនេះ European Super League បានក្លាយ​ជាស​ត្រូ​ជាមួយ UEFA ទៅហើយ​ខណៈ​ភាគី​ទាំងពីរ​នៅពេលនេះ​កំពុង​សាចទឹក​ដាក់គ្នា ដែលជា​សញ្ញាណ​មិនល្អ​សោះ​នៃ​បាល់ទាត់​។ ​​ក្រុម​ទាំង ១២ ដែល​មូលមតិ​គ្នា​បង្កើត Super League នឹងមិន​ចូលរួម Champions League ហើយ UEFA ក៏​គម្រាម​វិញ​ដែរ​ថា កីឡាករ​ដែល​ប្រកប​អាជីព​ជាមួយ​ក្លិប​ទាំង ១២ ខាង​លើក​នោះ UEFA មិន​អោយចូល​រួមការ​ប្រកួត​ណាមួយ​ក៏ដោយ​ក្រោម​ការគ្រប់គ្រង​របស់ UEFA​។ មិន​ទាន់​ថា​ភាគី​ខាង​ណាល្អ​ជាង​ខាង​ណា​ទេ ស្របពេល​មតិ​ពី​មជ្ឈដ្ឋាន​ទូទៅ មិន​ថា​អ្នកវិភាគ អ្នកគាំទ្រក្លិប​បាល់ទាត់​នៅ​អឺរ៉ុប គ្រូបង្វឹកក៏ដូចជា​កីឡាករ​សុទ្ធ​តែមាន​មតិស្រប និង​ខ្វែង​ផ្សេងៗ​គ្នា​។ ​​ជាមួយគ្នា​នោះដែរ UEFA និង English Premier League ក៏ដូចជា​នាយករដ្ឋមន្ត្រី​ចក្រភព​អង់គ្លេស​លោក Boris Johnson បានប្រកាស​ថ្កោលទោស​ ចំពោះ​ការបង្កើតអោយមាន​ពាន European Super League នេះ​។​ ​យ៉ាងណា​យើង​នៅតែ​រង់ចាំ​បន្តទៀតថា អនាគត​បាល់ទាត់​អឺរ៉ុប​ដែលសំបូ​រលីគ​ ដែល​គេ​ពេញនិយម​ពេញ​ពិភពលោក​នោះ នឹង​ទៅជា​យ៉ាងណា​៕

​អត្ថបទ​៖​នាង សុភា​វុ​ធ