ព្រះសីហនុ៖ ព្រឹត្តិការណ៍បុណ្យសមុទ្រជុំទី៣ លើកទី៩ រយៈពេលបីថ្ងៃ ចាប់ពីថ្ងៃទី៩ ដល់ថ្ងៃទី១១ ខែធ្នូ ឆ្នាំ២០២២ បានបញ្ចប់ទៅដោយមានភាពជោគជ័យ ហើយកម្មវិធីបានដំណើរការ​តាម​គ្រោង​ទុក ហើយ​បើតាម របាយការណ៍​មន្ទីទេសចរណ៍​ខេត្តព្រះសីហនុ៖ មានភ្ញៀវទេសចរជាតិអន្តរជាតិ និងពលរដ្ឋក្នុងខេត្ត បានចូលរួមដើរកម្សាន្តសប្បាយមានប្រមាណជាង ៧១ម៉ឺន.នាក់ កើន២៩% ធៀបនឹង ​បុណ្យសមុទ្រខេត្តព្រះសីហនឆ្នាំ២០១៧។

បណ្តាពលរដ្ឋ និងភ្ញៀវទេសចរដែលបានចូលរួមដើរកម្សាន្តបុណ្យសមុទ្រថ្ងៃចុងក្រោយ ​បានថ្លែងថា ពួកគេ​សប្បាយរីករាយ ​និងចង់ឲ្យខេត្តព្រះសីហនុ ​និងខេត្តជាប់សមុទ្រផ្សេងទៀត មានកម្មវិធី​កម្សាន្ត​សប្បាយបែបនេះ ​ឲ្យបានច្រើនថែមទៀត ​ដើម្បីផ្សព្វផ្សាយគោលដៅទេសចរណ៍របស់ខេត្ត ទាក់ទាញ​ភ្ញៀវទេសចរជាតិអន្តរជាតិ ទស្សនា​ ឲ្យបានច្រើនថែមទៀត។

ព្រឹត្តិការណ៍បុណ្យសមុទ្រ មានកម្មវិធីកម្សាន្តសប្បាយជាច្រើន​ ដូចជាកម្មវិធីតាំងពិព័រណ៍​បង្ហាញ​សមិទ្ធផល​រាជ​រដ្ឋាភិបាលកម្ពុជា​ និងបណ្តាស្ថានទូតនានានៅកម្ពុជា ការ​តាំង​ពិព័រណ៍​មហោស្រព​ម្ហូបអាហារ​ សំលៀកបំពាក់​ ផលិតផលភូមិ១ផលិតផល១ដែលស្នាដៃផលិតបានដោយកូនខ្មែរ កម្មវិធី​ប្រគុំ​តន្ត្រីប្រមាណបីទីតាំងធំៗ​ កម្មវិធីប្រកួតកីឡាកម្សាន្ត ​និងមានកម្មវិធីកម្សាន្តតូចៗជាច្រើន ដែល​គ្រប់កម្មវិធីទាំងនោះ ​គឺមានភ្ញៀវទេសចរជាតិអន្តរជាតិ ​និងពលរដ្ឋ ចូលទស្សនា ដើរភ្លក់ ទិញផលិតផលជាច្រើនកុះករ។

ឯកឧត្តម គួច ចំរើន អភិបាលខេត្តព្រះសីហនុ ថ្លែងថា ក្នុងឱកាសបិទកម្មវិធីបុណ្យសមុទ្រ​នៅថ្ងៃទី​យប់​ថ្ងៃទី១១ខែធ្នូនេះថា ​មូលហេតុខេត្តព្រះសីហនុ ​មានមកទស្សនាបុណ្យសមុទ្រច្រើនកុះករខ្លាំង គឺ​ដោយសារ ខេត្តព្រះសីហនុ មានសំណង់​អគារខ្ពស់ៗរីកចំរើន ​មាន​ឆ្នេរសមុទ្រស្អាត​ និងមានផ្លូវ​ល្បឿនលឿន ​ហើយតាមរយៈការមានកំណើន​ភ្ញៀវទេសចរជាតិ​អន្តរជាតិនេះ បានធ្វើឲ្យ​ខេត្តមាន​កំណើន​សេដ្ឋកិច្ចកើនឡើងជាលំដាប់។

ឯកឧត្តម គួច ចំរើន បញ្ជាក់ថា តាមរយៈកំណើនសេដ្ឋកិច្ចនេះ បានធ្វើឲ្យប្រាក់ចំណូល​ជា​មធ្យម​របស់ពលរដ្ឋម្នាក់ៗ​នៅក្នុងខេត្តព្រះសីហនុ ​មានទំហំប្រមាណ ៤១៨០ដុល្លា​អាមេរិក​ ក្នុង​មួយឆ្នាំ និង​បានកាត់បន្ថយភាព​ក្រីក្រ​មកនៅត្រឹម១.៨៦% នៅក្នុងឆ្នាំ២០២២នេះ៕ អត្ថបទ ស៊ុម សុជា