ព្រះសីហនុ៖ សន្និសីទ​អន្តរជាតិស្តីពីការអភិវឌ្ឍ និងការអភិរក្សាឆ្នេរសមុទ្រ នៅខេត្តព្រះសីហនុ ត្រូវបានបើកនៅល្ងាចថ្ងៃទី១១ ខែធ្នូ ដោយឯកឧត្តម ថោង ខុន រដ្ឋមន្ត្រីក្រសួងទេសចរណ៍។

អង្គ​សន្និសីទ​អន្តរជាតិ បណ្តាថ្នាក់ដឹកនាំប្រតិភូសមាជិកក្លឹបឆ្នេរសមុទ្រ​ដែលស្អាតជាង​គេបំផុត​លើពិភពលោក ​បាន​បង្ហាញការ​ប្តេជ្ញា​ចិត្ត​អភិវឌ្ឍន៍ ​និង​អភិក្សតំបន់ឆ្នេរ ​ដើម្បីរក្សាបេក្ខភាព​ឆ្នេររបស់គេ ​នៅក្នុងបញ្ជីក្លឹបឆ្នេរសមុទ្រស្អាត​បំផុតរបស់ពិភពលោក។

លោក ជុក ជំនោរ ប្រធាននាយកដ្ឋានអភិវឌ្ឍន៍​ផលិតផលទេសចរណ៍នៃក្រសួងទេសចរណ៍ បាន​ថ្លែងថា នៅក្នុងសន្និបាតអន្តរជាតិនេះ បណ្តាថ្នាក់ដឹកនាំប្រតិភូសមាជិកក្លឹបឆ្នេរ​សមុទ្រស្អាត​បំផុត​លើពិភពលោក បានធ្វើការចែករំលែកបទពិសោធន៍​ការអភិវឌ្ឍ​តំបន់ឆ្នេរ ឲ្យគ្នាទៅវិញ​ដើម្បី​ធ្វើការអភិវឌ្ឍ ​អភិរក្សតំបន់ឆ្នេរសមុទ្រ ​យ៉ាងផុសផុល​ដើម្បីឲ្យឆ្នេររបស់គេមានភាពស្អាតបៃតង អនាម័យ​ និងការ​ទាក់ទាញ​ភ្ញៀវទេសចរជាតិ​អន្តរជាតិទស្សនាច្រើនកុះករ។

ក្នុងឱកាសថ្លែង​បើក​សន្និសីទ​នេះ ឯកឧត្តម រដ្ឋមន្ត្រី ថោង ខុន ថ្លែង​ប្តេជ្ញា​ជំរុញ​ការអភិវឌ្ឍ​តំបន់​ឆ្នេរសមុទ្រ​មាន​ភាពស្អាតបៃតង​ បរិស្ថានស្អាត អនាម័យ លុបបំបាត់ទឹកកខ្វក់ហូរចូល​ក្នុង​ទឹក​សមុទ្រ​ ខណៈគោលដៅទេសចរណ៍សមុទ្រ គឺជាគោលដៅដែលភ្ញៀវទេសចរជាតិអន្តរជាតិ​ចូលរួម​មកទស្សនាម្តងហើយ ​ចង់មកទស្សនាម្តងទៀត​ ចង់ទស្សនា​ញញឹក​ក្នុងជីវិតរបស់គេ ។

ដើម្បីជម្រុញភ្ញៀវទេសចរអន្តរជាតិមកទស្សនា​កម្ពុជាកាន់តែ ឯកឧត្តម នឹងជម្រុញការតភ្ជាប់​គោល​ដៅ​ទេសចរណ៍តាមតំបន់ឆ្នេរសមុទ្រស្អាត​នានា ភ្ជាប់​គ្នា​ជាមួយគោលដៅ​ទេសចរណ៍​ ទេសចរណ៍​វប្បធម៌​កម្ពុជា​ជាពិសេសគោលដៅប្រាសាទអង្គរវត្ត៕ អត្ថបទស៊ុម សុជា