បាល់ទាត់៖ ​នៅ​ពេល​ដែល​ការសាងសង់​បាន​បញ្ចប់ កាតា​នឹង​មាន​កីឡដ្ឋាន World Cup លើកដំបូង​ដែល​ប្រើប្រាស់​ហើយ​អាចរុះរើ​ចេញ​វិញ​បាន​គឺ​កីឡដ្ឋាន Ras Abu Aboud នៅ​ទីក្រុង​ដូ​ហា​។ ​​ការ​រចនា​សាងសង់​កីឡដ្ឋាន World Cup នៅ​ទីក្រុង​ដូ​ហា​ប្រទេស​កាតា គ្រប់ផ្នែក​នៃ​កីឡដ្ឋាន​ត្រូវបាន​ផ្គុំ​នឹង​សាងសង់ឡើង ដែល​សុទ្ធតែ​អាច​រុះរើ​បាន​ទាំងអស់ ពោលគឺ​គ្រប់​បំណែក​ទាំងអស់​ត្រូវបាន​ផ្ទុក​នៅក្នុង​កុងតឺន័រ​ ដែល​បាន​ដឹកជញ្ជូន​មកដល់​ទីតាំង​សាងសង់​។

​​នៅក្នុង​កុងតឺន័រ​នីមួយៗ​ដែល​ដឹក​មក គឺមាន​គ្រប់ផ្នែក​នៃ​កីឡដ្ឋាន​មិន​ថា ការិយាល័យ បន្ទប់ទឹក កៅអីអង្គុយជាដើម​។ ​​បើតាម​អ្នកគ្រប់គ្រង​គំរោង​សាងសង់​នេះ​គឺ​លោក Mohammed Al Mulla បានអោយដឹងថា ការសាងសង់​ត្រូវ​បានគិត​យ៉ាងលំអិត​ ដោយ​ធ្វើ​យ៉ាង​គ្រប់ផ្នែក​នៃ​កីឡដ្ឋាន​ទាំងអស់ នឹង​អាច​ប្រើប្រាស់​បន្តទៀត​នៅពេល​រុះរើ​ចេញ មិន​ថា​ដំបូល រឺក៏​ដែក​ផ្សេងៗ​។ ​​គំរោង​សាងសង់​នេះ​គ្រោង​នឹង​បញ្ចប់​នៅ​ចុង​ឆ្នាំនេះ ដែលជា​កីឡដ្ឋាន​មួយ​ក្នុងចំណោម​កីឡដ្ឋាន ៧ ដែល​កាតា​សាងសង់​ហើយ​រុះរើ​ចេញ​វិញ​ក្រោយ World Cup ២០២២ បញ្ចប់​។ ​​កុង​តឺ​ន័រ​ដឹក​សំភារៈ​កីឡដ្ឋាន​ចំនួន ១០០០កុងតឺន័​ត្រូវបាន​នាំចូល​ពី​ប្រទេស​ចិន​។

​ក្រោយ​បញ្ចប់ World Cup ២០២២ កីឡដ្ឋាន​នេះនឹងត្រូវ​រុះរើ​ចេញ​វិញ​ដាក់​ចូលក្នុង​កុងតឺន័រ​ទាំងនោះ ដែល​អាច​យកទៅ​សាងសង់​កីឡដ្ឋាន​នៅ​កន្លែង​ផ្សេង ប្រទេស​ផ្សេង​បាន ហើយ​អាច​សាងសង់​បាន​ពីរ​កីឡដ្ឋាន​ក៏បាន ដោយសារ​កីឡដ្ឋាន​មួយ​នេះ​ធំអាច​ផ្ទុក​ទស្សនិកជន​បាន ៤០០០០នាក់​។ ​កាតា​បាន​សម្ពោធ​កីឡដ្ឋាន Al Janoub នៅ​ទីក្រុង Al Wakrah ដែល​នឹងត្រូវ​ប្រើប្រាស់​នៅ World Cup​។ ​គ្រោង​ចំណាយ​លើ​ការសាងសង់​កីឡដ្ឋាន Ras Abu Aboud ត្រូវបាន​គេ​ដឹងថា​មាន​តំលៃថោក​ជាង ១៥ ទៅ ២៥% នៃ​កីឡដ្ឋាន​ធម្មតា​៕

​អត្ថបទ​៖​នាង សុភា​វុ​ធ