ភ្នំពេញ ៖ សម្ដេចក្រឡាហោម ស ខេង នាយករដ្ឋមន្ដ្រីស្ដីទី នៃរាជរដ្ឋាភិបាលកម្ពុជា បានជំរុញឱ្យសមត្ថកិច្ចស្រាវជ្រាវ​រកជនល្មើស​ឲ្យឃើញ បន្ទាប់ពីសមត្ថកិច្ចបង្ក្រាបគ្រឿងញៀនបានចំនួនជិត ៩០០គីឡូក្រាម នៅខេត្តព្រះសីហនុ កាលពីថ្ងៃទី១១ ខែធ្នូ ឆ្នាំ២០២២ម្សិលមិញនេះ ។

ក្នុងឱកាសអញ្ជើញជាអធិបតី ក្នុងទិវាជាតិប្រឆាំងការជួះដូរមនុស្ស ១២ ធ្នូ ឆ្នាំ២០២២ លើកទី១៦ ក្រោមប្រធានបទ​«រួមគ្នាលុបបំបាត់អំពើជួញដូរមនុស្ស ឆ្ពោះទៅសម្រេចគោលដៅអភិវឌ្ឍន៍ជាតិប្រកបដោយចីរភាព» នារសៀលថ្ងៃទី១២ ខែធ្នូ ឆ្នាំ២០២២នេះ នៅសាលមហោស្រពកោះពេជ្រ រាជធានីភ្នំពេញ សម្ដេច ស ខេង បានលើកឡើងថា សមត្ថកិច្ចពាក់ព័ន្ធត្រូវ​ធ្វើកិច្ចការស្រាវជ្រាវរកប្រភពឲ្យច្បាស់ទាក់ទង និងករណីគ្រឿងញៀនដែលបង្រ្កាបបានកាលពីម្សិលមិញ ដោយត្រូវវែក​មុខឧក្រិដ្ឋជនឲ្យឃើញ។

សម្ដេចនាយករដ្ឋមន្រ្តីស្តីទី បានសង្កត់ធ្ងន់ថា«កាលពីម្សិលមិញ មានករណីគ្រឿងញៀនមួយដ៏ធំ ដែលសមត្ថកិច្ចបានបង្ក្រាប រហូតទៅដល់ ជិត៩០០គីឡូក្រាម គឺសារធាតុញៀន ជិត៩០០គីឡូក្រាម សមត្ថកិច្ចយើងកំពុងធ្វើកិច្ចការងារនេះ យ៉ាងម៉ឺតចត់បន្ដទៀត។ ប្រសិនបើយើងគ្រាន់តែប្រមូលគ្រឿងញៀន ៨០០គីឡូក្រាមនេះបានមក តែយើងមិនបានចាប់ ឧក្រិដ្ឋជន មេក្លោង ឬអ្នកជួញដូរគ្រឿងញៀននោះ មកដាក់ទោស ហាក់ដូចជា បេសកម្មរបស់យើងមិនទាន់ចប់ទេ ហើយក៏មិនទាន់ជោគជ័យដែរ»។

លើសពីនេះ សម្ដេច ស ខេង បន្ថែមថា អ្វីដែលហៅថា ជោគជ័យ គឺចាប់ជនល្មើសមកដាក់ទោស ទើបហៅថាជោគជ័យ ព្រមទាំងស្រាវជ្រាវបន្ដល្មើសដ៏ទៃទៀត រហូតឈានទៅដល់បទល្មើសសម្អាតប្រាក់ បញ្ហាទាំងនេះ គឺជាបញ្ហាដ៏សំខាន់របស់កម្ពុជាផងដែរ។

សូមបញ្ជាក់ថា កម្លាំងកងរាជអាវុធហត្ថខេត្តព្រះសីហនុ ឆ្មក់ចុះបង្ក្រាបករណីជួញដូរគ្រឿងញៀន​ទ្រង់ទ្រាយធំមួយ ​នៅចំណុចឃ្លាំងជួល​មួយកន្លែង ​ស្ថិតភូមិ២ សង្កាត់លេខ១ ក្រុងព្រះសីហនុ រកឃើញថ្នាំញៀន ៣៤បាវ ដែលមានទម្ងន់ ជិត៩០០គីឡូក្រាម កាលពីរសៀលថ្ងៃទី១១ ខែធ្នូ ឆ្នាំ២០២២៕ អត្ថបទ ៖ បាន ចក់