អាហ្វហ្គានីស្ថាន៖ រដ្ឋបាល​គ្រប់គ្រង​ដោយ​ក្រុម​តា​លី​បង់​បាន​និយាយថា មនុស្ស​មួយក្រុម​ប្រដាប់​ដោយ​អាវុធបាន​បើក​ការបាញ់ប្រហារ​កាលពី​ថ្ងៃ​ចន្ទ នៅ​ក្នុង​សណ្ឋាគារ​មួយ​កណ្ដាល​ទីក្រុង​កា​ប៊ុលសំបូរ​ដោយ​ធុរជន​ជនជាតិ​ចិន ក្នុង​ការ​វាយប្រហារ​មួយ​ដែល​ក្មាន់កាំភ្លើង​យ៉ាងហោចណាស់ ​៣​នាក់ត្រូវ​បាន​សម្លាប់​ដោយ​កងកម្លាំង​សន្តិសុខ។

សាក្សី​បាន​រាយការណ៍​ថា​មានការ​ផ្ទុះ និង​ស្នូរ​គ្រាប់កាំភ្លើង​ជាច្រើន ខណៈ​ក្រុម​រដ្ឋ​អ៊ីស្លាម (IS) បាន​ចេញមុខ​អះអាង​ថា ​ខ្លួន​ជា​អ្នក​នៅ​ពីក្រោយ​ការវាយប្រហារ​នេះ​។​ អ្នកនាំពាក្យ​ក្រុម​តា​លី​បង់ Zabihullah Mujahid បាន​សរសេរ​នៅលើ​បណ្ដាញ Twitter ​ថា ជនបរទេស ​២​នាក់​បាន​រងរបួស​នៅ​ពេល​ព្យាយាម​គេច​ចេញពី​ការវាយប្រហារ ​ដោយ​លោត​ចុះ​ពី​រានហាល​សណ្ឋាគារ​។​ មន្ទីរពេទ្យ​សង្គ្រោះ​ក្រុង​កា​ប៊ុល​គ្រប់គ្រង​ដោយ​អង្គការ​មិន​ស្វែងរក​ប្រាក់ចំណេញ​របស់​អ៊ីតាលី នៅ​ជិត​សណ្ឋាគារដែល​រង​ការវាយប្រហារ​នៅ​ក្នុង​តំបន់ Shahr-e-Naw បាន​រាយការណ៍​ពី​ការ​ទទួល​បាន​ជនរងគ្រោះ​ចំនួន ​២១​នាក់​ក្នុង​នោះ ១៨​នាក់​រង​របួស​ និង​ ៣​នាក់​ស្លាប់​។​

​ប្រភព​នានា​ពី​ក្រុម​តា​លី​បង់​បាន​និយាយ​ថា ការវាយប្រហារ​នេះ​ត្រូវ​បាន​ធ្វើឡើង​នៅ​សណ្ឋាគារ Longan ជាទី​ដែល​ជនជាតិ​ចិន និង​ជនបរទេស​ផ្សេងទៀត​និយម​ស្នាក់នៅ​។ ​អ្នកនាំពាក្យ​នគរបាល​ក្រុង​កា​ប៊ុល​លោក Khalid Zadran បាន​និយាយ​ថា ​ការវាយប្រហារ​នេះ​បាន​កើត​ឡើង​នៅ​ម៉ោង​ ២​និង​៣០​នាទី​រសៀល​ម៉ោង​ក្នុងស្រុក៕ អត្ថបទ៖ សុខមាន