ចិន៖ ចិនបានរិះគន់ដល់សេចក្តីថ្លែងការណ៍រួមរបស់ជប៉ុន និងសហរដ្ឋអាមេរិកកាលពីថ្ងៃសុក្រសប្តាហ៍មុន និងបានចោទប្រកាន់ប្រទេសទាំង២ ថា ជាការគំរាមកំហែងដល់សន្តិភាព និងស្ថិរភាពក្នុងតំបន់។ លោក វ៉ាង វិនប៊ិន អ្នកនាំពាក្យក្រសួងការបរទេសចិនបានធ្វើការចោទប្រកាន់បែបនេះ អំឡុងសេចក្ដីអធិប្បាយលើសេចក្តីថ្លែងការណ៍រួមគ្នា របស់នាយករដ្ឋមន្ត្រីជប៉ុន លោក យ៉ូស៊ីហ៊ីដេ ស៊ូហ្គា និងប្រធានាធិបតីសហរដ្ឋអាមេរិក លោក ចូ បៃដិន នៅទីក្រុងវ៉ាស៊ីនតោន។
នៅក្នុងសេចក្តីថ្លែងការណ៍រួមមួយ មេដឹកនាំទាំង២ បានជំទាស់ការប៉ុនប៉ងឯកតោភាគី ក្នុងការផ្លាស់ប្ដូរស្ថានការណ៍បច្ចុប្បន្ននៅសមុទ្រចិនខាងកើត។ ពួកគេបានសន្យាផងដែរថា នឹងធ្វើការជាមួយសម្ព័ន្ធមិត្ត និងដៃគូដែលរួមទាំងអូស្ត្រាលី និងឥណ្ឌាដើម្បីបង្កើតតំបន់ឥណ្ឌូ-ប៉ាស៊ីហ្វិកដោយសេរី និងបើកជំហរ ក៏ដូចជាការគាំទ្រដល់អាស៊ាន។ លោក វ៉ាង បាននិយាយប្រាប់ក្រុមអ្នកសារព័ត៌មានកាលពីថ្ងៃចន្ទថា ប្រទេសទាំង២ មិនអាចតំណាងសហគមន៍អន្តរជាតិ ហើយពួកគេក៏គ្មានសិទ្ធិក្នុងការកំណត់បទបញ្ជាអន្តរជាតិ និងបង្ខំស្តង់ដារខ្លួនឯងមកលើប្រទេសដទៃទៀតនោះដែរ។
លោក វ៉ាង បន្តទៀតថា ប្រទេសទាំង២ អាចនិយាយពីសេរីភាព និងការបើកចំហរ ប៉ុន្តែច្បាស់ណាស់ថា ពួកគេកំពុងព្រួតគ្នាបង្កើតជាបក្ខពួក និងការប្រឈមដាក់គ្នា។ នៅក្នុងសេចក្តីថ្លែងការណ៍រួមគ្នានោះដែរ លោក បៃដិន និងលោក ស៊ូហ្គា បាននិយាយថា ពួកគនឹងចែករំលែកក្តីកង្វល់ខ្លាំង ពាក់ព័ន្ធនឹងស្ថានភាពសិទ្ធិមនុស្សនៅទីក្រុងហុងកុង និងតំបន់ស្វយ័តស៊ីនជាំង៕
អត្ថបទ៖ សារ៉ាត់
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
