ភ្នំពេញ៖ នៅបណ្ឌិត្យសភានគរបាលកម្ពុជា នាព្រឹកថ្ងៃអង្គារ ទី១៣ ខែធ្នូ ឆ្នាំ២០២២ បានរៀបចំពិធី​ក្រុងពាលីបញ្ចុះបឋមសិលាសាងសង់អគារស្នាក់នៅ និងការងាររដ្ឋបាលរបស់ការិយាល័យ​ការពារ​និងថែទាំ ក្រោមវត្តមាន ឯកឧត្ដម នាយឧត្តមសេនីយ៍ សាស្រ្តាចារ្យ សេង ផល្លី ប្រធានបណ្ឌិត្យ​សភា​នគរបាលកម្ពុជា ​ដោយមានការចូលរួមពី ឯកឧត្តម លោកជំទាវ លោក លោកស្រី ជាថ្នាក់ដឹកនាំ​បណ្ឌិត្យសភានគរបាលកម្ពុជា និង សិក្ខាកាមវគ្គសុក្រឹតការថ្នាក់ដឹកនាំនគរបាល កម្រិត១ និងកម្រិត២ លើកទី២។

ឯកឧត្ដម នាយឧត្តមសេនីយ៍ សេង ផល្លី មានប្រសាសន៍ថា នេះគឺជាសមិទ្ធផលថ្មីមួយដែលនឹង​លើក​កម្ពស់សន្តិសុខ សណ្តាប់ធ្នាប់ ក្នុងបរិវេណបណ្ឌិត្យសភានគរបាលកម្ពុជា ​ស្របតាមផែនការ​យុទ្ធសាស្ត្ររបស់ខ្លួន​ ក្នុងការអភិវឌ្ឍហេដ្ឋារចនាសម្ព័ន្ធរឹង ​សំដៅលើកកម្ពស់កិត្យានុភាព​ ឧត្ដមភាព និងការជឿទុកចិត្តបន្ថែមទៀ តទាំងក្នុងក្របខណ្ឌជាតិនិងអន្តរជាតិ ព្រមទាំងលើកកម្ពស់គុណ​ភាព​អប់រំ និងសមត្ថភាពវិជ្ជាជីវៈរបស់កងកម្លាំងនគរបាលជាតិ ​ដើម្បីបម្រើជាតិនិងប្រជាពលរដ្ឋ ក្នុង​វិស័យសន្តិសុខ សណ្ដាប់ធ្នាប់ សាធារណៈ និងសុវត្តិភាពសង្គម ប្រកបដោយប្រសិទ្ធភាព ក្រោមដំបូលនៃសន្តិភាព។

ឯកឧត្ដម បន្តថា ថវិកាសម្រាប់សាងសង់អគារនេះ ​បានពីការឧបត្ថម្ភរបស់ សិក្ខាកាមវគ្គសុក្រឹត​ការថ្នាក់ដឹកនាំនគរបាល កម្រិត១និងកម្រិត២ លើកទី២ ដើម្បីចូលរួមចំណែកជាមួយក្រសួងមហាផ្ទៃ​ក្នុងការអភិវឌ្ឍបណ្ឌិត្យសភានគរបាលកម្ពុជា ។

គួរបញ្ជាក់ថា បណ្ឌិត្យសភានគរបាលកម្ពុជា ​បានសិក្សាគម្រោង​សាងសង់​អគារថ្មីនេះ ​ទំហំ ៩ម៉ែត្រ គុណ​នឹង ១១ម៉ែត្រ ​ដែលមាន ២ជាន់ រួមមាន​ ជាន់ខាងក្រោមមានបន្ទប់ប្រជុំ ​បន្ទប់ការិយាល័យ បន្ទប់​ហូបបាយ និងជាន់ខាងលើជាបន្ទប់ស្នាក់នៅ៕ អត្ថបទ៖ ចាន់​ រស្មី