ព្រះសីហនុ៖ លោក ជុក ជំនោរ ប្រធាននាយកដ្ឋានអភិវឌ្ឍន៍ផលិតផលទេសចរណ៍ នៃក្រសួង​ទេសចរណ៍ បានថ្លែងប្រាប់BTV នៅថ្ងៃទី១៣ ខែធ្នូនេះ ថា ប្រតិភូសមាជិក​ក្លឹបឆ្នេរស្អាត​បំផុតលើពិភពលោក​ បានសាកសួរកម្ពុជា​ លើការគ្រប់គ្រង ​និងអភិវឌ្ឍន៍ ពាក់ព័ន្ធនឹងសំណង់​អគារខ្ពស់ៗ​ច្រើន ទីក្រុងបំពាក់ភ្លើងចំរុះពណ៌ ​អាងប្រព្រឹត្តកម្មបំលែងទឹកកខ្វក់​ពីសំណង់​អគារ​ទៅជា​ទឹកស្អាតបង្ហូរទៅក្នុងទឹកសមុទ្រ និងទឹកបឹងនានា ។

នៅក្នុងចូលរួមមហាសន្និបាតក្លឹបឆ្នេរសមុទ្រដែលស្អាតបំផុតលើពិភពលោក ដែលធ្វើឡើងនៅខេត្តព្រះសីហនុ រយៈពេល១សប្តាហ៍នេះ ​បណ្តាវាគ្មិនអន្តរជាតិ បានធ្វើបទបង្ហាញ​លើ​ប្រធានបទជាច្រើន ​ទាក់ទងនឹងការអភិវឌ្ឍឆ្នេរបណ្តាប្រទេសជាសមាជិក ហើយប្រតិភូសមាជិក​ក្លឹប២១ប្រទេស ​នឹងយករបៀបនៃការអភិវឌ្ឍឆ្នេរសមុទ្រនេះ ​ទៅអនុវត្ត ដើម្បី​ធានារក្សា​បេក្ខភាព​ឆ្នេរសមុទ្រស្អាត​បំផុតរបស់គេនៅក្នុងបញ្ជីសមាជិកក្លឹបសមុទ្រស្អាតបំផុតលើពិភពលោក ។ មានបណ្តាប្រទេសមានឆ្នេរស្អាតនានាទៀតបានសិក្សាអនុវត្តតាមកម្ពុជា ដើម្បីស្នើសុំចូល​ជា​សមាជិកក្លឹបផងដែរ ​ដើម្បីជម្រុញកំណើនទេសចរអន្តរជាតិទៅទស្សនា។

ឯកឧត្តម ថោង ខុន រដ្ឋមន្ត្រីក្រសួងទេសចរណ៍ ​ថ្លែងថា​ ការអភិវឌ្ឍឆ្នេរសមុទ្រកម្ពុជា ជាពិសេស​ឆ្នេរនៅខេត្តព្រះសីហនុនេះ ​គឺបានធ្វើឡើងនៅដំណាក់កាល​កម្ពុជា​ជួបការលំបាកច្រើន ហើយ​កម្ពុជាគ្មានធនធានគ្រប់យ៉ាងដើម្បីអភិវឌ្ឍន៍​ ក្រោយពីកម្ពុជាទើបសង្គ្រាមដែល​ទើបនឹងបញ្ចប់​នៅ​ឆ្នាំ១៩៩៨ ​ហើយការ​ខិតខំ​ប្រឹងប្រែងអភិវឌ្ឍន៍​ឆ្នេរ​សមុទ្រនេះ រហូតធ្វើឲ្យឆ្នេរសមុទ្រ​ប្រវែងជាង ៤៤០គីឡូ​ម៉ែតនៅខេត្តកោះកុង ព្រះសីហនុ កំពត ​និងខេត្តកែប បានទទួលស្គាល់ប្រកាសចូល​ជា​សមាជិកក្លឹបឆ្នេរសមុទ្របំផុតលើពិភពលោកនៅថ្ងៃទី២៦ ​ខែឧសភា ឆ្នាំ២០១១ ៕

អត្ថបទ ស៊ុម សុខជា