​ភ្នំពេញ ៖ នៅថ្ងៃនេះ ក្រុមហ៊ុន ខេមបូឌា បេវេរេដ ខមប៉ានី លីមីធីត (ហៅកាត់ថា កូកា-កូឡា កម្ពុជា) បានប្រកាសថា ក្រសួងពាណិជ្ជកម្ម បានឯកភាពបន្តទទួលស្គាល់សិទ្ធិនាំចូល និងចែកចាយផ្តាច់មុខពីក្រុមហ៊ុន The Coca-Cola Company រាល់ផលិតផលភេសជ្ជៈពាក់ម៉ាក Coca-Cola, Coca-Cola Zero, Fanta, Sprite, និង Dasani នៅក្នុងព្រះរាជាណាចក្រកម្ពុជា។

​

នេះបើយោងតាមលិខិតកត់ត្រា និងតម្កល់សិទ្ធិផ្តាច់មុខលេខ ០៧៧៩ ព.ណ កសប, ០៧៨០ ព.ណ កសប និងលេខ ០៧៨១ ព.ណ កសប ចុះថ្ងៃទី០២ ខែមេសា ឆ្នាំ២០២១ របស់ក្រសួងពាណិជ្ជកម្ម។ តាមរយៈលិខិតកត់ត្រា និងតម្កល់សិទ្ធិផ្តាច់មុខនេះ ក្រុមហ៊ុនកូកា-កូឡា កម្ពុជា គឺជាអ្នកទទួលបានសិទ្ធិផ្តាច់មុខស្របច្បាប់តែមួយគត់ ក្នុងការនាំចូល និងចែកចាយផលិតផលដែលមានពាក់ម៉ាកខាងលើ ទូទាំងព្រះរាជាណាចក្រកម្ពុជា ចាប់ពីថ្ងៃទី០២ ខែមេសា ឆ្នាំ២០២១នេះ។ តាមរយៈលិខិតនេះដដែរ ក្រសួងពាណិជ្ជកម្ម បានបញ្ជាក់ថា ក្រោយរយៈពេល៩០ថ្ងៃ គិតចាប់ពីថ្ងៃទី២ ខែមេសា ឆ្នាំ២០២១ ក្រុមហ៊ុនកូកា-កូឡា កម្ពុជា មានសិទ្ធិក្នុងការប្ដឹងទៅអាជ្ញាធរមានសមត្ថកិច្ច ដើម្បីចាត់វិធានការតាមផ្លូវច្បាប់ ប្រសិនបើមានការនាំចូល និងចែកចាយដោយគ្មានការអនុញ្ញាតពីក្រុមហ៊ុន។

លោក រស់ សោភា នាយកផ្នែកច្បាប់ និងទំនាក់ទំនងកិច្ចការសាធារណៈប្រចាំប្រទេសរបស់ក្រុមហ៊ុន បានមានប្រសាសន៍ថា ក្រុមហ៊ុន សូមលើកទឹកចិត្តដល់ប្រជាជនកម្ពុជា ឱ្យជួយគាំទ្រផលិតផលដែលផលិតនៅក្នុងប្រទេសកម្ពុជា ឬផលិតផលដែលនាំចូល និងចែកចាយស្របច្បាប់ ដើម្បីជំរុញឱ្យក្រុមហ៊ុនស្របច្បាប់ក្នុងស្រុកមានភាពរីកចម្រីន ដើម្បីផ្តល់ការងារដល់កូនខ្មែរយើង៕អត្ថបទ ៖ រដ្ឋា