ភ្នំពេញ៖ ឯកឧត្តមទេសរដ្ឋមន្ត្រី លី ធុជ អនុប្រធានទី១ អាជ្ញាធរមីន បានថ្លែងថា ប្រទេសជប៉ុន គឺជាដៃគូដ៏សំខាន់មួយរបស់កម្ពុជា ហើយប្រទេសមួយនេះតែងគាំទ្រ រាល់គម្រោងបោសសំអាតមីន និងយុទ្ធភ័ណ្ឌមិនទាន់ផ្ទុះ ដើម្បីធ្វើឲ្យដីមានសុវត្ថិភាព ។

ក្នុងជំនួបជាមួយឯកអគ្គរដ្ឋទូតផុតអាណត្តិជប៉ុនប្រចាំនៅកម្ពុជា ឯកឧត្តម មិកាមិ ម៉ាសាហ៊ីរ៉ូ នៅថ្ងៃទី១៣ ខែធ្នូ ឆ្នាំ២០២២ ឯកឧត្តម លី ធុជ មានប្រសាសន៍ថា ការសម្រេចបាននូវសមិទ្ធផលជាប្រវត្តិសាស្រ្ត សម្រាប់សកម្មភាពមីននៅកម្ពុជារយៈពេល ៣០ឆ្នាំនេះ គឺមិនអាចខ្វះបានពីការចូលរួមគាំទ្រពីប្រទេសជប៉ុន ដែលជាដៃគូដ៏លេចធ្លោមួយ ។

ឯកឧត្តមទេសរដ្ឋមន្ត្រី បានថ្លែងអំណរគុណយ៉ាងជ្រាលជ្រៅជូនចំពោះរាជរដ្ឋាភិបាល និងប្រជាជននៃប្រទេសជប៉ុន ដែលបានចូលរួមក្នុងការដំណើរការស្វែងរកសន្តិភាពនៅកម្ពុជា ក៏ដូចជាបានចូលរួមដល់ការអភិវឌ្ឍ នៅកម្ពុជាលើគ្រប់វិស័យ ក្នុងនោះរាប់បញ្ចូលទាំងការគាំទ្រដល់ការងារសកម្មភាពមីនផងដែរ ។

អនុប្រធានទី១អាជ្ញាធរមីន បានវាយតម្លៃខ្ពស់ ចំពោះកិច្ចខិតខំប្រឹងប្រែងរបស់ ឯកឧត្តម មិកាមិ ម៉ាសាហ៊ីរ៉ូ ដែលបានកសាងនូវ​ទំនាក់ទំនងយ៉ាងជិតស្និទ្ធរវាងប្រទេស និងប្រជាជនទាំងពីរ ក្នុងអាណត្តិបេសកកម្មការទូតរបស់ឯកឧត្តម មិកាមិ ម៉ាសាហ៊ីរ៉ូ នៅកម្ពុជា ។

ក្នុងឱកាសនោះ មិកាមិ ម៉ាសាហ៊ីរ៉ូ បានសម្ដែងនូវការសប្បាយរីករាយណាស់ ដែលបានបំពេញបេសកកម្មការទូតនៅកម្ពុជា និងមានអនុស្សាវរីយ៍ច្រើនជាមួយប្រជាជនកម្ពុជា ។ ឯកឧត្តមបានបញ្ជាក់ថា បច្ចុប្បន្ននេះ ទំនាក់ទំនងជាប្រវត្តិសាស្រ្តរវាងប្រទេសទាំងពីរ បានឈានដល់ជាដៃគូយុទ្ធសាស្រ្តគ្រប់ជ្រុងជ្រោយ ហើយឯកឧត្តម នឹងបន្តជំរុញឲ្យមានកិច្ចសហប្រតិបត្តិការបន្ថែមទៀត ជាពិសេសជម្រុញឲ្យមានការវិនិយោគកាន់តែច្រើននៅកម្ពុជា ។

គួរបញ្ជាក់ថា កម្ពុជាកំពុងខិតខំប្រឹងប្រែង និងការយកចិត្តដាក់ ក្នុងការដោះស្រាយបញ្ហាមីន និងគ្រាប់មិនទាន់ផ្ទុះនៅកម្ពុជា ខណៈដែលថ្មីៗនេះ សកម្មភាពមីន បានឈានដល់របត់មួយដែលមានការចូលរួមពីវិស័យឯកជន និងសប្បុរសជននានា ក្នុងចលនាជាតិរបស់សម្តេចតេជោហ៊ុន សែន នាយករដ្ឋមន្រ្តី តាមរយៈគម្រោងសម្តេចតេជោសម្រាប់សកម្មភាពមីន “ផ្តល់ដីសុវត្ថិភាព បង្កើតស្នាមញញឹម” ។ មិនត្រឹមតែប៉ុណ្ណឹង រាជរដ្ឋាភិបាលកម្ពុជា បានសម្រេចបង្កើតនូវមូលនិធិកម្ពុជាគ្មានមីនឆ្នាំ២០២៥ ដោយបានទម្លាក់ថវិកាជាតិចំនួន ៣០លានដុល្លារអាមេរិក ក្នុងផែនការបោសសម្អាតមីន ៕ អត្ថបទ ៖ បាន សុខរិទ្ធិ