ភ្នំពេញ៖ អាស៊ាន បានផ្សព្វផ្សាយនូវគោលការណ៍ថ្នាក់តំបន់ ស្តីពីការពង្រឹងតួនាទីរបស់បុគ្គលិកសង្គមកិច្ច និងកម្លាំងសេវាសង្គម ឲ្យកាន់តែទូលំទូលាយ ក្នុងផ្នែកកិច្ចគាំពារសង្គម ដោយគោលការណ៍នេះ អាចប្រើប្រាស់បាន ដោយរដ្ឋជាសមាជិកទាំងអស់ ហើយជាមូលដ្ឋានបង្កើតសេចក្តីណែនាំ និងផែនការសកម្មភាពដែលពាក់ព័ន្ធ។

​ក្នុងសិក្ខាសាលាផ្សព្វផ្សាយនូវគោលការណ៍នេះ នៅរសៀលថ្ងៃទី១៣ ខែធ្នូ ឆ្នាំ២០២២ ឯកឧត្តម ម៉ែន សុចិត្រ រដ្ឋលេខាធិការ ក្រសួងសង្គមកិច្ច អតីតយុទ្ធជន និងយុវនីតិសម្បទា មានប្រសាសន៍ថា គោលការណ៍ដែលត្រូវដាក់ចេញនេះ គឺដើម្បីបម្រើដល់ផលប្រយោជន៍របស់ប្រជាជន នៅក្នុងតំបន់អាស៊ានទាំងអស់ ដោយមន្ត្រីសង្គមកិច្ច ត្រូវធ្វើឲ្យបានទូលំទូលាយ និងត្រូវអនុវត្តឲ្យមានប្រសិទ្ធភាព និងមានប្រសិទ្ធផល។

​ឯកឧត្តមបានបន្តថា បន្ទាប់ពីមានការធូរស្រាល នៃជំងឺកូវីដ-១៩ គឺជាពេលវេលានៃការគាំពារសង្គម ទន្ទឹមនេះហើយ សមាជិកអាស៊ានត្រូវពង្រឹង និងពង្រីកតួនាទី ការទទួលខុសត្រូវនៃកម្រិតសេវាសង្គម ដោយមានការកំណត់ពង្រឹងបន្ថែម និងធ្វើឲ្យជឿនលឿនទៅមុខ នៃកម្លាំងសេវាសង្គម ត្រូវរកឲ្យឃើញ និងកំណត់ឲ្យបាននូវតម្រូវការរបស់មនុស្ស ហើយអាស៊ានត្រូវធ្វើការបន្តទៀត និងប្ដេជ្ញាទទួលខុសត្រូវ និងធ្វើឲ្យស្អិតរមួតនៃបណ្ដាប្រទេសអាស៊ានទាំងមូល ។

​ជាមួយគ្នានេះ ឯកឧត្តម ម៉ែន សុចិត្រ បានជំរុញបន្ថែមទៅមន្ត្រីសង្គមកិច្ចកម្ពុជា ត្រូវពង្រឹងនូវតួនាទីការងារ នៃការផ្ដល់សេវាសង្គម ដោយមានការត្រៀមទុកនូវអ្វី ដែលអាចកើតឡើង និងមិនបានដឹងមុន ហើយមិនត្រូវទុកអ្នកណាម្នាក់ចោលជាដាច់ខាត ។

​គួរបញ្ជាក់ថា គោលបំណងនៃគោលការណ៍នេះ ដើម្បីគាំទ្រអ្នកបង្កើតគោលនយោបាយ អ្នកគ្រប់គ្រង និងសមាជិកនៃកម្លាំងសេវាសង្គម ក្នុងប្រទេសជាសមាជិកអាស៊ាន ហើយវាក៏បានបំពេញបន្ថែមទៅនឹងគោលការណ៍របស់អាស៊ានស្តីពី ការកំណត់អត្រាអប្បបរមាសម្រាប់បុគ្គលិកសង្គមកិច្ច ក្នុងសមាមាត្រប្រជាជន៕ អត្ថបទ៖ បាន សុខរិទ្ធិ