កំពង់ឆ្នាំង៖ ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង បានថ្លែងថា អាជ្ញាធរខេត្ត​កំពង់​ឆ្នាំង​ រួមនិងមន្ទីរអង្គភាពពាក់ព័ន្ធ កំពុងខិតខំកសាងអភិវឌ្ឍន៍ខេត្តកំពង់ឆ្នាំង អោយ​ក្លាយ​ទៅ​ជា​ខេត្ត​ដែល​ភ្ញៀវមិនអាចមើលរំលងបាន ដោយត្រូវទៅក៏ចូល មកវិញក៏ចូល គឺក្លាយជាខេត្ត​ដែល​ទាក់​ទាញ​ផ្នែកវិស័យទេសចរតែម្តង។ ឯកឧត្តមបានមានប្រសាសន៍បែបនេះ នៅថ្ងៃទី១៤ ខែធ្នូ ឆ្នាំ២០២២ ក្នុងសាលាខេត្តកំពង់ឆ្នាំង។

ឯកឧត្តមបានបន្តថា ខេត្តកំពង់ឆ្នាំង គឺជាខេត្តដែលភ្ញៀវទេសចរតែងមើលរំលង ទៅ​ហួស​មក​ហួស ដោយមិនបានចូលស្នាក់នៅ ឬក៏ដើរលេងនៅក្នុងខេត្តបានច្រើននោះឡើយ។ ក៏​ប៉ុន្តែ​កត្តា​ដែល​នាំ​អោយភ្ញៀវទៅហួសមកហួសនេះ ក៏ដោយសារតែយើងជាអ្នកកំពង់ឆ្នាំង មិនបាន​បង្ហាញ​នូវ​អ្វី​ដែលជាសក្តានុពលលើវិស័យទេសចរ អោយបងប្អូនភ្ញៀវទេសចរជាតិ អន្តរជាតិបានដឹង បាន​ឃើញ និងបានស្គាល់នោះឡើយ។ ខេត្តកំពង់ឆ្នាំងមានសក្តានុពលលើវិស័យទេសចរច្រើន ព្រោះ​ខេត្ត​នេះ​មាន​រមណីយដ្ឋាន​បែប​ធម្មជាតិ​ប្រមាណ​ជាង​ ១០​កន្លែង​ដែល​យើង​មិន​ទាន់​រៀបចំ​អោយ​មាន​ភាព​ទាក់ទាញ, យើងមានទឹក​ជ្រោះ​ចំនួន ៤កន្លែង​កំពុង​អភិវឌ្ឍន៍​អោយ​ក្លាយ​ជា​ទីតាំង​​ទាក់​ទាញ​ភ្ញៀវ​ទេសចរ, យើងមានកោះជាច្រើនសម្រាប់ភ្ញៀវមកកំសាន្តតាមជើងទឹក ដោយ​គ្រាន់​តែ​យើង​ជួយ​បង្ហាត់បង្ហាញពីរបៀបទទួលភ្ញៀវដល់អ្នកភូមិទាំងនោះ, យើងមាន​ទន្លេ​សាប​ដ៏​ស្រស់​ស្អាត ហើយខេត្តកំពង់ឆ្នាំង ក៏មានភូមិទេសចរជាច្រើនកន្លែងដែលមិនទាន់កែច្នៃ។

 ឯកឧត្តម បានបន្ថែមថា សព្វថ្ងៃ អាជ្ញាធរខេត្តកំពុងកសាងអភិវឌ្ឍន៍ និងជួសជុល​ផ្លូវ​នៅ​តាម​រមណីយដ្ឋាន​មួយចំនួន និងផ្លូវនៅក្នុងក្រុងកំពង៉ឆ្នាំងទាំងអស់អោយរួចរាល់នៅក្នុងឆ្នាំ២០២៣ ដើម្បី​អោយបងប្អូនប្រជាពលរដ្ឋ រួមនិងភ្ញៀវទេសចរបានប្រើប្រាស់ កុំអោយមាន​ភាព​លំបាក​ក្នុង​ការ​ធ្វើ​ដំណើរ។ អាជ្ញាធរខេត្តក្រុងកំពង់ឆ្នាំង កំពុង​បំពាក់​នូវ​ភ្លើង​សូឡា​បំភ្លឺ​ផ្លូវ​នៅតា​ម​ផ្លូវ​សំខាន់​ៗ​មួយ​ចំនួនក្នុងក្រុង រួមនឹងការបំពាក់ភ្លើងពណ៌នៅតាមដងផ្លូវ ការកសាងនូវសួនបាញ់ទឹកដ៏ធំ ដែល​នឹងរួចរាល់នៅបំណាច់ឆ្នាំនេះផងដែរ។ ក្រៅពីនេះ អាជ្ញាធរខេត្ត បានយក​ចិត្ត​ទុក​ដាក់​លើ​ផ្លូវ​នៅ​តាម​ដងទន្លេ ដែលជាផ្លូវលិចទឹកនៅរដូវវស្សា គឺបាន និងកំពុងកសាងជាបន្តបន្ទាប់ផងដែរ នៅ​តាម​ភូមិដ្ឋានប្រជាពលរដ្ឋ ដើម្បីអោយភ្ញៀវទេសចរបានធ្វើដំណើរងាយស្រួលនៅរដូវប្រាំង និង​ដើម្បី​អោយ​ខេត្តកំពង់ឆ្នាំង ក្លាយទៅជាខេត្តដែលភ្ញៀវទេសចរមិនអាចបំភ្លេចបាន «ទៅក៏ចូល មកវិញក៏ចូល»៕ ហុង វាស្នា