កែប៖ ឯកឧត្តម សោម ពិសិដ្ឋ អភិបាលខេត្តកែប បានអះអាងថា រដ្ឋបាលខេត្ត បានខិតខំប្រឹងប្រែងគិតគូរលើបញ្ហាធំៗចំនួន៣ គឺការថែរក្សាសន្តិភាព ស្ថេរភាព សន្តិសុខ សណ្តាប់ធ្នាប់សង្គម និងការកែលម្អសោភ័ណភាព ដើម្បីបង្កើតបរិយាកាស​សប្បាយរីករាយជូនបងប្អូន​ប្រជាពលរដ្ឋមកកម្សាន្ត។

ការថ្លែងរបស់ឯកឧត្តម អភិបាលខេត្តកែប យ៉ាងដូច្នេះ ​នាឱកាសដែរក្រុមការងារគ្រូពេទ្យស្ម័គ្រ​ចិត្ត​ឯកឧត្តម ហ៊ុន ម៉ានី ចុះពិនិត្យ ព្យាបាលជំងឺជូនប្រជាពលរដ្ឋដោយឥតគិតថ្លៃ និងចាក់វ៉ាក់សាំង​បង្ការកូវីដ-១៩ នៅខេត្តកែប, កាលពីថ្ងៃទី១៣ ខែធ្នូ ឆ្នាំ២០២២។

ឯកឧត្តម សោម ពិសិដ្ឋ បានលើកឡើងទៀតថា ​ការគិតគូរ និងដោះស្រាយចំពោះបញ្ហាធំៗ​ទាំង​៣នោះ ទី១៖ គឺសន្តិសុខ​ សណ្តាប់ធ្នាប់សាធារណៈ ការ​កែលម្អ​សោភ័ណភាព និងការគ្រប់គ្រង​កាក​សំណល់រឹងរាវ(សំរាម-ទឹកស្អុយ), ទី២៖ ការកែលម្អ​សោភ័ណភាព ការអភិវឌ្ឍ​ហេដ្ឋារចនា​សម្ព័ន្ធ​ផ្នែករឹង​ ជា​រូបវន្ត(ផ្លូវថ្នល់-សំណង់សិល្បៈការផ្សេងៗ ​តាមដងវិថីសំខាន់ៗ) និងទី៣៖ ​ខិតខំបង្កើត​បរិយាកាសផ្សេងៗ ​ដើម្បីឲ្យភ្ញៀវជាតិ ​និងអន្តរជាតិ ​មកកម្សាន្តក្នុងខេត្តកែប ឋិតក្នុង​ប្រទេសជាតិ​យើងមានសុខសន្តិភាពពេញបរិបូរ ​ក្រោមការដឹកនាំដ៏ខ្ពង់ខ្ពស់​របស់​សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រី្ត ​នៃព្រះរាជាណាចក្រកម្ពុជា។

ឯកឧត្តម សោម ពិសិដ្ឋ បានបន្ថែមទៀតថា​ ព្រឹត្តការណ៍​ចុងឆ្នាំ២០២២ ដែលរដ្ឋបាលខេត្តរៀបចំ​ឡើងនេះ​ ជា​លក្ខណៈយុទ្ធសាស្រ្ត​នយោបាយ​ និងបង្ហាញជាលក្ខណៈប្រសិទ្ធភាព​ការងារបង្កើន​ជីវភាព​ចំណូលដល់ប្រជាជនក្នុងមូលដ្ឋាន​ និងបង្ហាញពី​សក្តានុពល​ធនធានធម្មជាតិ ភាព​ស្រស់ស្អាត​របស់ខេត្តកែប។

អភិបាលខេត្តកែប បានបញ្ជាក់ថា គ្រប់ព្រឹតិ្តការណ៍​ដែល​រដ្ឋបាលខេត្តបានរៀបចំ គឺដើម្បីបង្ហាញ​សក្តានុពល​របស់ខេត្ត ​ព្រោះថា ភ្ញៀវទេសចរជាតិ​ និងអន្តរជាតិ ក្នុងមួយឆ្នាំៗ បានមកកម្សាន្ត​នៅ​ក្នុងខេត្ត មិនក្រោម១លាន៥សែននាក់នោះទេ​ មុនសម័យកាលកូវីដ-១៩។ ​គិតត្រឹម៩ខែ ដើមឆ្នាំ២០២២ ​ខេត្តកែប ទទួលបានភ្ញៀវទេសចរ ​ជាង៩សែននាក់ ៕ អត្ថបទ រដ្ឋា