​ភ្នំពេញ៖ ឯកឧត្តម បណ្ឌិត ហ៊ុន ម៉ាណែត អញ្ជើញបើកសម្ពោធជាផ្លូវការផ្សារ ម៉ាក្រូ សាខាទី ៣ ជ្រោយចង្វារ នៅថ្ងៃទី១៤ ខែធ្នូ ឆ្នាំ២០២២។

​ក្នុងពិធីបើកសម្ភោធខាងលើនេះ ឯកឧត្តម បណ្ឌិត ហ៊ុន ម៉ាណែត បានសាទរ និងវាយតម្លៃខ្ពស់​ក្រុមហ៊ុន​ម៉ាក្រូ (ខេមបូឌា) ចំពោះការរីកចម្រើនលូតលាស់ជាលំដាប់ រហូតសម្រេចបាននូវសមិទ្ធផល​ដ៏វិសេស​វិសាល គឺការបើកសម្ពោធសាខាទី៣ ជ្រោយចង្វារ ដែលនេះកើតចេញពីសមត្ថភាព, ការខិតខំប្រឹងប្រែង និងការ​យក​ចិត្តទុកដាក់ប្រកបដោយស្មារតីបុរេសកម្ម, វិជ្ជាជីវៈ និងការទទួលខុសត្រូវខ្ពស់របស់ថ្នាក់ដឹកនាំ និង​បុគ្គលិក-និយោជិតទាំងអស់របស់ក្រុមហ៊ុន។

ឯកឧត្តម បណ្ឌិត លើកឡើងថា ការរីកលូតលាស់នេះ ក៏បានចូលរួមចំណែកយ៉ាងសំខាន់ក្នុង​កិច្ច​ដំណើរ​ការ​​នៃការអភិវឌ្ឍសង្គម-សេដ្ឋកិច្ចកម្ពុជា និងសហគមន៍ ជាពិសេសបានផ្តល់​ឱកាស​ការងារ​ជា​ច្រើន​ដល់ ប្រជាពលរដ្ឋកម្ពុជា ក៏ដូចជាអត្ថប្រយោជន៍ជាច្រើនទៀតដល់មូលដ្ឋាន និងអាជីវកម្មពាក់ព័ន្ធ។

ឯកឧត្តម បណ្ឌិត បន្តថា ក្រុមហ៊ុនបានប្រើប្រាស់បុគ្គលិក-និយោជិតកម្ពុជា រហូតដល់ទៅ ៩៨% និងបាន​ដាក់​លក់ ផលិតផល ក្នុងស្រុករហូតដល់ទៅ ៩០%។

ការណ៍នេះ គឺជាការផ្តល់នូវឱកាសការងារ និងការ​លើក​កម្ពស់ សមត្ថភាព ជំនាញ ដល់ប្រជាពលរដ្ឋ រួមទាំងប្រាក់ចំណូល និងជាការគាំទ្រដល់​ដំណើរការ​អាជីវកម្ម ជាពិសេសការ បើកឱកាស ឱ្យផលិតករក្នុងស្រុកអាចចូលរួមប្រកួតប្រជែងក្នុងទីផ្សារ និង​បន្ត​អភិវឌ្ឍ​ខ្លួន។

ឯកឧត្តម បណ្ឌិត ហ៊ុន ម៉ាណែត មានប្រសាសន៍ថា តាមរយៈស្ថានភាពអំណោយផលនៃសុខសន្តិភាព ប្រជាពលរដ្ឋ ដែលជាវិនិយោគិន, ធុរជន, អាជីវករ និងពាណិជ្ជករទាំង ក្នុងស្រុក និងក្រៅប្រទេស អាច​ផ្តោត​ការ​យកចិត្ត ទុកដាក់ចំពោះគម្រោង ឬសកម្មភាពវិនិយោគ, ធុរកិច្ច, អាជីវកម្ម និង​ពាណិជ្ជកម្ម​របស់​ខ្លួន ប្រកបដោយជំនឿ ទុកចិត្ត និងសុខុមាលភាពផ្លូវចិត្ត នឹងនរដោយគ្មានការព្រួយបារម្ភ ៕